پارلامەنت سەناتى توراعاسىنىڭ ورىنباسارى بەكتاس بەكنازاروۆ نورۆەگيا ستورتينگى (پارلامەنتى) شەتەل ىستەرى جانە قورعانىس جونىندەگى تۇراقتى كوميتەتىنىڭ توراعاسى اننيكەن حيۋتفيلدپەن جانە ستورتينگتىڭ ەنەرگەتيكا جانە قورشاعان ورتا جونىندەگى تۇراقتى كوميتەتىنىڭ مۇشەسى وسماند اۋكريۋستپەن كەزدەستى.
ب. بەكنازاروۆ قازاقستان نورۆەگيانى ەۋروپاداعى ماڭىزدى ساياسي ءارى ەكونوميكالىق ارىپتەسى رەتىندە قاراستىراتىنىن اتاپ ءوتتى. ءبىزدىڭ ەلىمىز بارلىق باعىتتاعى ەكىجاقتى بايلانىستاردى, ونىڭ ىشىندە زاڭ شىعارۋ ورگاندارىنىڭ ءوزارا ءىس-قيمىلى اياسىنداعى ىنتىماقتاستىقتى نىعايتىپ كەلەدى. سەنات توراعاسىنىڭ ورىنباسارى نورۆەگ جاعىمەن پارلامەنتارالىق ۇنقاتىسۋ اياسىندا بايلانىستاردى دامىتۋعا ىقىلاس ءبىلدىردى.
ب. بەكنازاروۆ قازاقستاننىڭ ساياسي ومىرىندەگى سەناتتىڭ ءرولى, سونداي-اق پرەزيدەنت ن. نازارباەۆتىڭ ستراتەگيالىق جوسپارلارىن زاڭنامالىق تۇرعىدا قامتاماسىز ەتۋدەگى دەپۋتاتتاردىڭ جۇمىسى تۋرالى نورۆەگيا دەلەگاتسياسىن حاباردار ەتتى. مەملەكەتتىك ينستيتۋتتاردى جاڭعىرتۋ, ەنەرگيالىق تۇرعىدا ءتيىمدى ەكونوميكا قالىپتاستىرۋ, ءومىردىڭ جوعارى دەڭگەيى مەن ازاماتتاردىڭ الەۋمەتتىك قورعالۋىن قامتاماسىز ەتۋ جونىندەگى مىندەتتەرگە ەرەكشە نازار اۋدارىلدى. وسىعان بايلانىستى ەكونوميكانى, ەكولوگيانى جانە الەۋمەتتىك ءومىردى رەتتەۋ سالاسىنداعى نورۆەگ تاجىريبەسى قازاقستاندى قىزىقتىرىپ وتىر.
ب. بەكنازاروۆتىڭ پىكىرىنشە, ەنەرگەتيكا, ەكولوگيا جانە تابيعي رەسۋرستاردى يگەرۋ سالاسىندا بىرلەسكەن جوبالاردى ىسكە اسىرۋ مەن تاجىريبە الماسۋ ءۇشىن اۋقىمدى مۇمكىندىكتەر اشىلۋدا.
سەنات توراعاسىنىڭ ورىنباسارى ەكى ەلدىڭ جاھاندىق يادرولىق قاۋىپسىزدىك جونىندەگى ۇستانىمدارىنىڭ جاقىندىعىن جانە قازاقستاندا ماگاتە اياسىنداعى تومەن بايىتىلعان ۋران بانكىنىڭ اشىلۋىنا دونورلاردىڭ ءبىرى رەتىندە نورۆەگيانىڭ قاتىسقانىن اتاپ ءوتتى.
نورۆەگ پارلامەنتشىلەرى ءوز ەلدەرىنىڭ وسى ايماقتاعى ماڭىزدى ارىپتەسى قازاقستان ەكەنىن اتاپ ءوتتى جانە ءبىزدىڭ ەلدەرىمىزدىڭ كوپجاقتى ءوزارا ءىس-قيمىلىن ودان ءارى نىعايتۋعا سەنىمدەرىن ءبىلدىردى.
ا. حيۋتفيلد بۇۇ قاۋىپسىزدىك كەڭەسىندەگى تۇراقتى ەمەس مۇشەسى رەتىندەگى قازاقستاننىڭ بەلسەندى ارەكەتىن, جاھاندىق يادرولىق قارۋسىزدانۋ مەن سيريا شيەلەنىسىن رەتتەۋدەگى استانانىڭ ۇلەسىن جوعارى باعالادى.
جۇزدەسۋگە سەنات دەپۋتاتتارى بەكمىرزا ەلامانوۆ, ەربولات مۇقاەۆ جانە ءماجىلىس دەپۋتاتى دارحان مىڭباي قاتىستى.