وبلىس ورتالىعىنداعى ۋرالسكايا كوشەسىندە ورنالاسقان باسپانانىڭ ءبىر جاق قابىرعاسى وپىرىلىپ, قۇلاپ ء تۇستى.
نىسان 2015 جىلى اپپاتتى دەپ تانىلعانىنا قاراماستان 13 ادام جانىن شۇبەرەككە ءتۇيىپ, تۇرىپ كەلگەن. اپاتتىق جاعداي بولعان كۇنى اننا رىجكوۆا وتباسىمەن بىرگە جيەنىنىڭ تۋعان كۇنىن تويلاپ جاتقان. بۇل وتباسى زاقىمدالعان پاتەردىڭ ۇستىندە 30 جىلدان ارتىق تۇرىپ كەلگەن. وسىعان دەيىن جاعدايلارىن ايتىپ ءتيىستى ورىندارعا بارعانمەن, ەشقانداي شارا كورىلمەپتى. 8 پاتەرلىك ۇيگە قالالىق اكىمدىك قىزمەتكەرلەرى بىرنەشە كۇن بۇرىن كەلىپ, باسپانانىڭ ىرگەتاسى جوعىن كورگەن.
«قالادا اپپاتتىق ۇيلەر از ەمەس. جاعدايدان حاباردارمىز.اكىمدىك بالانسىندا اپپاتتىق ۇيدە تۇراتىندارعا ارنالىپ جەكە پاتەرلەر سالۋ قاراستىرىلماعان. تەك 3 وتباسىعا عانا ۋاقىتشا باسپانا بەرۋگە قاۋقارلىمىز», دەيدى اكىمدىكتەگىلەر.
پەتروپاۆل قالاسى اكىمىنىڭ ورىنباسارى ەۆگەني گلوتوۆتىڭ ايتۋىنشا ءۇش وتباسى باسپانا كەزەگىندە 100-ءشى ورىندا تۇر. ولارعا پاتەر بەرۋ مۇمكىندىكتەرى ىزدەستىرىلۋدە. اپاتتىق دەپ تانىلعان ۇيلەردى سىرۋ جانە تۇرعىنداردى باسقا ۇيگە كوشىرۋ جاعى قاراستىرىلۋدا. ماسەلە قاراجاتقا تىرەلىپ تۇرعان جايى بار.
اپاتتى ۇيدەگى باسقا تۇرعىندار دا الاڭداۋلى. ويتكەنى كۇن وتكەن سايىن قابىرعاداعى جارىقتار ۇلعايىپ بارادى. كەز-كەلگەن مەزەتتە نىسان ۇيىندىگە اينالۋى مۇمكىن. قازىرگى ۋاقىتتا 5 وتباسى تۇرىپ جاتىر.
وبلىس ورتالىعىندا 187 ادام قونىستانعان 20 ءۇي اپپاتتىق جاعدايدا تۇر.
ءومىر ەسقالي, «ەگەمەن قازاقستان»