ەلىمىزدىڭ باس باسىلىمى جانىنداعى جاس جۋرناليستەرگە ارنالعان «ەگەمەن اكادەمياسىنىڭ» كەزەكتى وتىرىسىنا اقپارات جانە كوممۋنيكاتسيالار ءمينيسترى داۋرەن اباەۆ قاتىسىپ, «تسيفرلىق داۋىرگە قادام» تاقىرىبىمەن ءدارىس وقىدى. جيىنعا استاناداعى جوعارعى وقۋ ورىندارىنىڭ ستۋدەنتتەرى قاتىستى.
ءدارىس بارىسىندا مينيستر جاستارعا مەملەكەتتىڭ اقپارات سالاسىنداعى ساياساتى تۋرالى جان-جاقتى اڭگىمەلەدى. اتاپ ايتقاندا مەملەكەت باسشىسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىنىڭ تۇپكى ماقساتى مەن «تسيفرلى قازاقستان» باعدارلاماسىنىڭ, «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىنىڭ ماڭىزىن تارقاتىپ ايتتى. سونىمەن قاتار بۇگىنگى جۋرناليستيكانىڭ جاي-كۇيى, وسى سالاداعى ساپالى ءبىلىم جانە باسەكە, وتاندىق باق-تى دامىتۋعا قاتىستى شارالار, اقپارات الۋ مەن تاراتۋ, اقپاراتتىق قاۋىپسىزدىك ماسەلەلەرى جان-جاقتى ايتىلدى.
ءدارىس سوڭىندا مينيستر داۋرەن اباەۆ جاس جۋرناليستەرگە باسەكەگە قابىلەتتى بولىپ, قازاق جۋرناليستيكاسىنىڭ دەڭگەيىن ارتتىرۋ ءۇشىن جۇيەلى ءبىلىم الۋدىڭ ماڭىزدىلىعىن ايتا وتىرىپ, ولاردى جاڭا تەحنولوگيالاردى ۇيرەنۋگە جانە سول تەحنولوگيالاردىڭ ءتىلى سانالاتىن اعىلشىن ءتىلىن مەڭگەرۋگە, جان-جاقتى بولۋعا شاقىردى. سونىمەن قاتار مينيستر «ەگەمەن اكادەمياسى» جوباسىنىڭ ارتىقشىلىقتارى جايلى, ونىڭ جۋرناليستەردى دايارلاۋدا الاتىن ورنى تۋرالى پىكىرىن ءبىلدىردى.
ءىس-شاراعا جينالعان جاستار دا بەلسەندىلىك تانىتىپ, سپيكەرگە ءوز ساۋالدارىن قويىپ, پىكىرلەرىمەن ءبولىستى.
ايتا كەتەيىك, «ەگەمەن قازاقستان» گازەتىنىڭ جانىنان اشىلعان جوبادا ءار كۋرس ءۇش اي ۋاقىتتى قامتيدى. اپتاسىنا ءبىر رەت بولاتىن ءدارىستى باسىلىم قىزمەتكەرلەرىنەن بولەك ارنايى سپيكەرلەر دە جۇرگىزەدى. جاس جۋرناليستەر بىلىكتى مامانداردىڭ ءدارىسىن تىڭداي وتىرىپ, ماقالا جازۋ, حات قورىتۋدان باستاپ, باسىلىمنىڭ باسپاحانادان شىعۋىنا دەيىنگى پروتسەسىمەن جان-جاقتى تانىسادى.
سونىمەن قاتار, دارىستەر بويىنشا تانىمدىق ماقالا, ەسسە جانە ساراپتامالىق ماقالا جازعان بەلسەندى قاتىسۋشىلارعا كۋرس اياقتالعان كەزدە ارنايى سەرتيفيكاتتار تابىستالادى. اكادەميانىڭ العاشقى ماۋسىمدا تاقىرىپ تاڭداۋ, تاقىرىپ قويۋ, زەرتتەۋ ماقالاسىن جازۋ, ساراپتامالىق ماقالا جازۋ, ءماتىندى وڭدەۋ, سۇحبات الۋ, فوتوجۋرناليستيكا, بەتتەۋ سەكىلدى تاقىرىپتار قامتىلادى.
ءمادينا جالەلقىزى,
«ەگەمەن قازاقستان»