الماتىدا ۆەلوشەرۋدىڭ جاڭا ماۋسىمى اشىلدى. سپورتتىق شاراعا 2 مىڭنان استام الماتىلىق قاتىسىپ, «نۇرلى تاۋ» بيزنەس ورتالىعىنان باستالىپ تۇڭعىش پرەزيدەنت ساياباعىنا دەيىن جالعاسقان 9 شاقىرىمدىق قاشىقتىقتى ەڭسەردى.
سوڭعى جىلدارى الماتىدا قوس دوڭگەلەكتى كولىكتى جانىنا سەرىك ەتكەندەردىڭ سانى ارتقان. «سپورتتىق الماتى» باعدارلاماسىنىڭ اياسىندا ۇيىمداستىرىلعان توعىزىنشى ماۋسىمنىڭ اشىلۋىنا كەلگەن قاتىسۋشىلاردىڭ ساپىنان جاسى جەتپىستى القىمداعان قارتتار مەن مەكتەپ تابالدىرىعىن ەندى عانا اتتاعان جاسوسپىرىمدەردى دە كەزدەستىردىك. ۆەلوماۋسىمنىڭ اشىلۋىنا ارنايى كەلگەن قالا اكىمى باۋىرجان بايبەك قازىرگى تاڭدا قالادا سالاۋاتتى ءومىر سالتىن ساقتاۋ ماقساتىندا بۇقارالىق سپورتقا كوپ كوڭىل ءبولىنىپ وتىرعانىن ايتتى. ماسەلەن, از ۋاقىتتىڭ ىشىندە الماتىدا 68 شاقىرىمدىق ۆەلودالىز سالىنعان.
وعان قوسا ۆەلوسيپەدتەردى جالعا بەرەتىن «Almaty bike» جوباسى قارقىندى جۇمىس ىستەپ, قالانىڭ ورتالىق كوشەلەرىندە 1730 ۆەلوسيپەدكە ارنالعان 200 ۆەلوسيپەد تۇراعى ىسكە قوسىلعان. قالا باسشىسىنىڭ ايتۋىنشا جىل سايىن وتەتىن «الماتى تۋرى» ۆەلوجارىسى قالانىڭ تانىمال برەندىنە اينالىپ, الماتىنىڭ تۋريستىك جانە سپورتتىق قالا ءيميدجى رەتىندە شەتەلگە تانىمالدىعىن ارتتىرۋدا
«وسىنداي ءىس-شارالار قالا تۇرعىندارىنا ۋاقىتىن ءتيىمدى ءارى كوڭىلدى وتكىزۋگە جاقسى مۇمكىندىك بەرمەك. وسى ۋاقىتقا دەيىن ءبىز قوعامدىق كولىكتەردە, كوشەلەردە, ساياباقتاردا, كەز كەلگەن جاستاعى ادامدار تانىسىپ, دەمالىپ, جۇمىس جاساۋىنا قولايلى جاعداي جاساپ كەلەمىز» دەيدى ول.
شاراعا قاتىسقان اۋەسقوي ۆەلوشاباندوزدار اراسىندا 20 ۆەلوسيپەد, سونىمەن قاتار وزگە دە باعالى سىيلىقتار ويناتىلدى. وتكەن جىلى ءدال وسى «سپورتتىق الماتى» باعدارلاماسى بويىنشا قالادا 21 ۆەلوشەرۋ ۇيىمداستىرىلىپ, 21 مىڭ ادام قاتىسقان بولاتىن.
ارمان وكتيابر,
«ەگەمەن قازاقستان»
الماتى