ۇكىمەت باسشىسىنىڭ ءبىرىنشى ورىنباسارى اسقار مامين جۇمىس ساپارىمەن قىتاي حالىق رەسپۋبليكاسىنا باردى. ساپار اياسىندا ا.مامين بىرلەسكەن ينۆەستيتسيالىق جوبالاردى جۇزەگە اسىرۋ ماقساتىندا ءىرى قارجى, ءوندىرىس, كولىك-لوگيستيكا كورپوراتسيالارىنىڭ باسشىلارىمەن ەكىجاقتى كەزدەسۋلەر وتكىزدى. بۇل تۋرالى ۇكىمەتتىڭ ءباسپاسوز قىزمەتى حابارلادى.
– قازاقستان پرەزيدەنتى ن.نازارباەۆ پەن قحر توراعاسى سي ءتسزينپيننىڭ ارقاسىندا ەكى ەل اراسىندا جوعارى دەڭگەيدەگى ىنتىماقتاستىق ورنادى. «نۇرلى جول» جانە « ۇلى جىبەك جولى ەكونوميكالىق بەلدەۋى» باعدارلامالارى قازاقستان مەن قىتاي اراسىنداعى ينۆەستيتسيالىق قارىم-قاتىناستارعا جول اشادى, –دەپ اتاپ ءوتتى كەزدەسۋ بارىسىندا ا.مامين.
پرەمەر-ءمينيستردىڭ ءبىرىنشى ورىنباسارىنىڭ بەيجىڭدەگى كەزدەسۋلەرىندە Export and Import bank of China, China Construction Bank, Industrial and Commercial Bank of China Limited سياقتى ءىرى بانكتەردىڭ باسشىلارىمەن ينۆەستيتسيالىق جوبالاردى قارجىلاندىرۋ ماسەلەلەرى تالقىلاندى. سونىمەن قاتار قازاقستان اۋماعى ارقىلى ترانزيتتىك كونتەينەرلىك تاسىمالداۋ كولەمىن ۇلعايتۋ, «قورعاس-شىعىس قاقپاسى» يندۋستريالىق حابىن دامىتۋ, كەدەندە جۇكتەردى ەسەپتەۋدىڭ جاڭا تەحنولوگيالارىن ەنگىزۋ, سونداي-اق حالىقارالىق شەكارا ماڭى ىنتىماقتاستىعى ورتالىعى قىزمەتتەرىن جەتىلدىرۋ ماسەلەلەرى دە قارالدى.
ا.مامين ليانيۋنگان قالاسىنىڭ مەرىمەن وسى قالانىڭ پورتى مەن قورعاس بەكەتى اراسىنداعى بىرلەسكەن تەرمينالدى دامىتۋ ماسەلەسىن تالقىلادى. سونىمەن قاتار ىسكەرلىك كەزدەسۋلەر اياسىندا, «Gener Tec» كومپانياسىمەن بىرلەسىپ قازاقستانداعى اۆتوموبيل قۇراستىرۋ جۇمىستارىن دامىتۋ, «China National Building Material Group» كومپانياسىمەن بىرلەسىپ شىنى زاۋىتى جوباسىن جۇزەگە اسىرۋ جولدارى قاراستىرىلىپ, مۇناي-حيميا, ەنەرگەتيكا, كەن ءوندىرۋ كومپانيالارىمەن كەلىسسوزدەر جۇرگىزىلدى.