اقپارات جانە كوممۋنيكاتسيالار ءمينيسترى داۋرەن اباەۆ «تەلە راديو حابارلارىن تاراتۋ تۋرالى» زاڭعا سايكەس مەملەكەت جارتى جىل كولەمىندە ەفيرلىك تسيفرلىق تەلە راديو حابار تاراتۋعا اۋىسۋدىڭ ۋاقىتىن بەلگىلەۋى قاجەت», دەپ ۆيدەو مالىمدەمە جاسادى.
اقپارات جانە كوممۋنيكاتسيالار مينيسترلىگى ەفيرلىك تسيفرلىق تەلە راديو حابار تاراتۋعا اۋىستىرۋ جۇمىستارىن جۇرگىزىپ جاتقانىن جەتكىزگەن مينيستر ەڭ الدىمەن تسيفرلىق تەلەۆيدەنيەگە انىقتاما بەردى.
«تسيفرلىق تەلەۆيدەنيەگە – ۆيدەوبەلگى مەن دىبىس تاراتۋدىڭ جوعارى ساپاسى. سونداي-اق, ۆيزۋالدى كەدەرگىلەردى جويىپ, ەفيردە تۇنىق داۋىستى قامتاماسىز ەتۋ. وسىلايشا وتاندىق تەلەارنالاردى اقىسىز, تسيفرلىق ساپادا تاماشالاۋ مۇمكىندىگى», دەدى د.اباەۆ.
ءمينيستردىڭ ايتۋىنشا, تسيفرلىق تەلەۆيدەنيە جۇيەسىنە كوشۋ ارقىلى ءىرى قالالار مەن وبلىس ورتالىقتارىن بىلاي قويعاندا, شالعاي ەلدىمەكەن تۇرعىندارىنىڭ ءوزى 15 وتاندىق تەلەارناعا دەيىن تاماشالاي الادى.
«استانا مەن الماتى قالالارىندا جانە وبلىس ورتالىقتارىندا 30 ارناعا دەيىن كورۋگە بولادى. كەزىندە ەلىمىزدىڭ ەڭ شالعاي ەلدىمەكەندەرى مەن تۇرعىندار از قونىستانعان اۋىلداردا 2-3 ارنا عانا كورۋگە مۇمكىندىك بار ەدى. ەندى 15 وتاندىق تەلەارنانى جوعارى ساپادا تاماشالايتىن بولادى. تسيفرلىق حابار تاراتۋدى ەنگىزۋ – قالا مەن اۋىل اراسىنداعى اقپاراتتىق الشاقتىقتى تومەندەتەدى. انالوگتى حابار تاراتۋ كەزەڭ-كەزەڭمەن توقتاتىلادى», دەگەن د.اباەۆ تۋرا التى ايدان سوڭ ماڭعىستاۋ وبلىسى تولىق تسيفرلى حابار تاراتۋعا كوشەتىنىن, ال ەكى جىل ىشىندە وزگە ايماقتار دا تسيفرلى حابار تاراتۋمەن قامتاماسىز ەتىلەتىنىن جەتكىزدى.