اپتا سوڭىندا قازاقستان پرەمەر-ليگاسىنىڭ كەزەكتى تۋرى ءوتتى. 5-تۋردىڭ نەگىزگى ويىنىندا بىتىسپەس قارسىلاستار – «استانا» مەن «قايرات» كەزدەستى. ال بىرىنشىلىك باستالعالى بەرى جەڭىلىس كورمەگەن «ورداباسى» سىرت الاڭدا كۇتپەگەن جەردەن ويسىراي ۇتىلدى.
قوس كوماندا دا سوڭعى كەزدە ناعىز بابىندا ەدى. «استانا» سىرت الاڭدا «ەرتىستى» 6:1 ەسەبىمەن جەڭىپ, ايقىن باسىمدىق كورسەتتى. ال «قايرات» ورالدىڭ «اقجايىعىن» ءىرى ەسەپپەن ۇتتى – 3:0. سۋپەركۋبوك ويىنىندا ەلوردالىقتار الماتىلىق قوناقتاردى 3:0 ەسەبىمەن جەڭگەن ەدى. اراعا اي سالىپ قوس ۇجىم قايتا كەزدەسىپ, تەرەزەسى تەڭ ويىن كورسەتتى. قازاقستان پرەمەر-ليگاسىندا حەت-تريك جاساعان ەڭ جاس ويىنشى باحتيەر زاينۋتدينوۆ بۇل جولى دا كوزگە ءتۇستى. مارين توماسوۆتىڭ پاسىن باسپەن قاقپاعا ءدال باعىتتاعان جارتىلاي قورعاۋشى ەسەپ اشتى. الايدا 20 مينۋتتان سوڭ باۋىرجان يسلامحاننىڭ ورنىنا الاڭعا الماسىپ كىرگەن اندرەي ارشاۆين كىرە سالا تارازى باسىن تەڭەستىردى. ودان كەيىن دە ءبىرلى-جارىم گول سوعاتىن مۇمكىندىكتەر بولعانىمەن, فۋتبولشىلار قاقپادان قيىس كەتىپ جاتتى. قوس ليدەردىڭ تەڭ تارقاسقانى «ورداباسى» ءۇشىن جاقسى جاڭالىق ەدى. بىراق شىمكەنتتىكتەر «اقجايىقتان» جەڭىلىپ قالدى.
«اقجايىق» العاشقى شابۋىلدارىنىڭ بىرىندە ەسەپ اشىپ, قارسىلاسىنىڭ قاتەلىگىن ۇتىمدى پايدالانىپ كەتتى – يۆان انتيپوۆ كومداسىن العا شىعاردى. قازاقستان جاستار قۇراماسىنىڭ ويىنشىسىن ابدۋللاي دياكاتە شالىپ جىعىپ, ءوز قاقپاسىنا پەنالتي الىپ كەلدى. ايىپ دوبىن ەركەبۇلان نۇرعاليەۆ ءدال ورىنداپ, ەسەپتى ەسەلەي ءتۇستى. «جاۋ جاعادان العاندا, ءبورى ەتەكتەن تارتادى» دەمەكشى, باس تورەشى قاقتىعىستاردىڭ بىرىندە «ورداباسى» ويىنشىسى سپاحيانى الاڭنان قۋدى. 10 ويىنشىمەن قالعان شىمكەنتتىكتەر ءبىر گول سوققانىمەن, الاڭ يەلەرى تاعى 2 گول سالىپ, قورىتىندى ناتيجە 4:1 ەسەبىن تىركەدى.
«استانا» مەن «قايرات» ۇپاي ءبولىسىپ, «ورداباسى» جەڭىلىپ قالعان ساتتەن پايدا شىعارعان جالعىز كلۋب بار. ول – قوستانايدىڭ «توبىلى». سىرت الاڭدا «اقتوبەنى» 1:0 ەسەبىمەن جەڭىپ كەتكەن ۆلاديمير نيكيتەنكو شاكىرتتەرى 12 ۇپايمەن تۋرنير كەستەسىنىڭ 2-ساتىسىنا كوتەرىلدى. وتكەن تۋردا «اتىراۋ» قاقپاسىنا 2 گول سوققان انتون شيندەر بىرىنشىلىكتەگى كەزەكتى گولىنا قول جەتكىزدى. ۋكراينالىق قورعاۋشى قازىر مەرگەندەر قاتارىندا ءجۇر.
پرەمەر-ليگاعا اراعا 9 جىل سالىپ قايتا ورالعان پەتروپاۆل قالاسىنىڭ «قىزىلجار» كومانداسى العاشقى جەڭىسىنە قول جەتكىزدى. ولار ءوز الاڭىندا «جەتىسۋدى» براتيسلاۆ پۋنوشەۆاتستىڭ سوققان جالعىز گولىنىڭ ارقاسىندا جەڭىپ كەتتى. سەربيالىق شابۋىلشى دا بيىل 3 گول سوعىپ ۇلگەردى.
چەمپيونات باستالعالى بەرى جەڭىس دەگەننىڭ نە ەكەنىن بىلمەي كەلە جاتقان «قايسار» بۇل جولى دا «ەرتىسپەن» تەڭ وينادى. سونىمەن قاتار «اتىراۋ» مەن «شاحتەر» اراسىنداعى ويىندا دا گول سوعىلعان جوق.
ەرمۇحامەد ماۋلەن,
«ەگەمەن قازاقستان»