الۆارەس جەكپە-جەكتەن نەگە باس تارتتى؟

داۋدىڭ باسى – «ۋلانعان» ەت

الۆارەستى قورعاۋشىلاردىڭ رەسمي نۇسقاسى بويىنشا, تىيىم سالىنعان ءدارى بوكسشىنىڭ اعزاسىنا ەتپەن تاراعان. بۇعان كوميسسيا مۇشەلەرى سەنە مە, سەنگەن كۇننىڭ وزىندە بوكسشىنى كەشىرە مە؟ كوكتەمنىڭ ەڭ نەگىزگى جەكپە-جەگى ءدال وسى «ۋلانعان» ەتتىڭ سەبەبىنەن وتپەيتىن بولدى. تاريحقا كوز جۇگىرتسەك, كلەنبۋتەرولمەن ۇستالعان بوكسشىلاردىڭ اقتالىپ شىققاندارى دا بار. ماسەلەن, 2016 جىلى مەك­سي­كا­لىق الەم چەمپيونى فران­سيسكو ۆارگاستىڭ ورلاندو سا­لي­دو­مەن جەكپە-جەگى الدىندا كلەنبۋ­تەرولعا تاپسىرعان تەستى وڭ نا­تيجە كورسەتكەن. ول كەزدە دە سپورت­شىنىڭ قورعاۋشىلارى «ۋلان­عان» ەتتى العا تارتىپ, بۇل ىس­تە جەڭىسكە جەتكەن. ايقاس بەلگى­لەنگەن كۇنى ءوتىپ, تەڭ ناتيجەمەن اياقتالعان ەدى.

گولوۆكيننىڭ كومانداسى ال­ۆارەستىڭ ەتكە قاتىستى اقتالۋ­لارىنا اسا سەنە بەرمەيدى. ول قارسىلاسىن وتىرىكتى انىق­تاي­تىن دەتەكتوردا تەكسەرىپ كو­رۋدى ۇسىندى. «ولار بارىنە مەكسيكالىق ەت كىنالى دەپ وتىر ما؟ مۇنىڭ ءبارى سىلتاۋ عانا. الۆارەس پەن ونىڭ پروموۋتەرى وسكار دە لا حويا بۇزاقىلار. ولار دوپينگ قولدانىپ, ەشتەڭە بولماعانداي كۇيدە وتىر. وتكەن جەكپە-جەك الدىندا ونىڭ بۇل­شىق ەتتەرىنىڭ ۇلكەيگەنى كورىنىپ تۇردى. دەنەسىندە ينەك­تسيانىڭ ىزدەرى بولدى. كەز كەلگەن دارى­گەردەن سۇراپ كورىڭىز, مۇنىڭ قان­داي بۇلشىق ەتتەر ەكەنىن سولار ءتۇ­سىندىرىپ بەرسىن. ەڭ دۇرىسى – ءساۋلدى وتىرىكتى انىقتايتىن دەتەكتوردا تەكسەرىپ كورۋ كەرەك. سول كەزدە ەت تۋرالى دا, جەمىستەر تۋرالى دا, شوكولادقا قاتىستى دا بارلىق سۇراققا جاۋاپ تابامىز», دەدى گولوۆكين.

ال نۆو كوممەنتاتورى ماكس كەللەرماننىڭ پايىمداۋىنشا, الۆارەستىڭ ىسىنە قاتىستى شەشىم ونىڭ اعزاسىنان تابىلعان كلەنبۋتەرولدىڭ مولشەرىنە تىكەلەي قاتىستى بولماق. «كوبىسى كانەلونى كىناسىز دەپ ەسەپتەيدى. ولاردىڭ پىكىرىنشە, كلەنبۋتەرول ادامدى كۇشتى نەمەسە ءتوزىمدى ەتەتىندەي اسەرى جوق. وسى ورايدا مىناداي سۇراق تۋىندايدى: الۆارەس كلەنبۋتەرولدى نە ءۇشىن پايدالاندى؟ مەنىڭشە, بارلىعى دارىلىك زاتتاردىڭ دەڭگەيىنە بايلانىستى. ەگەر الۆارەستىڭ اعزا­سىندا كلەنبۋتەرول كوپ مول­شەردە بولسا, وندا ول الاياق رەتىن­دە ايىپتالۋى مۇمكىن. ال دارىلىك زاتتىڭ دەڭگەيى تومەن بولسا, فرانسيسكو ۆارگاستىڭ وقيعاسى قايتالانۋى مۇمكىن», دەيدى ماكس.

ساراپشىلار تاراپىنان ال­ۆارەسكە قاراتا قانشاما ايىپتاۋ مەن سىن تاعىلىپ جاتسا دا, ول ءالى قوعام الدىنا شىعىپ ەشبىر مالىمدەمە جاساعان جوق. 18 ءساۋىر كۇنى داۋلى وقيعاعا بايلانىس­تى سوت وتەدى. ساۋل بارلىق ما­سەلەگە سول سوتتا نۇكتە قويۋى كەرەك.

«گولوۆكيندى الداۋ وپەراتسياسى»

مەكسيكالىق بوكسشىنىڭ كو­مان­داسى وزدەرىنە جالا جا­بىل­­عا­نىن ايتىپ, ءىستىڭ سوتقا دەيىن بار­عانىنا نارازى بولىپ, 5 مامىر كۇنى وتەتىن جەكپە-جەكتەن باس تارتتى. سونداي-اق الۆارەس 18 ساۋىرگە (سوت وتىرىسى وتەتىن كۇن) دەيىن سپورتتان شەتتەتىلگەنىن العا تارتىپ, پسيحولوگيالىق قىسىم­نىڭ اسەرىنەن جەكپە-جەككە تولىق­قاندى دايىندالا المايتىنىن ايتقان.

«5 مامىرعا جوسپارلانعان ەكىنشى كەزدەسۋدەن باس تارتتىق. 18 ءساۋىر كۇنى كوميسسيا تىڭدالىمى ءوتىپ, رەسمي شەشىم شىعادى. وكىنىشكە قاراي, ودان كەيىن 5 مامىرعا دەيىن جەكپە-جەكتى كەڭ كولەمدە جارنامالاۋعا ۋاقىت از. ايقاستىڭ وتپەيتىنىنە نەگىزگى سەبەپ – مەكسيكالىق بوكسشىنىڭ دوپينگ داۋىنا ىلىككەنى بولىپ تۇر», دەدى Golden Boy Promotions پروموۋتەرلىك كومپانياسىنىڭ پرەزيدەنتى ەريك گومەس.

الۆارەستىڭ ءوزى كىناسىز ەكەنىن ايتىپ, ۇيىمداستىرۋشىلار مەن جانكۇيەرلەردەن كەشىرىم سۇرادى. «دوپينگ داۋى مەنى قاتتى تاڭعالدىردى. ماعان ەش­كىم­نىڭ كۇمان كەلتىرمەگەنىن قالاي­مىن. مەن بۇعان دەيىن دە, بۇدان كەيىن دە «تازا» سپورت­شى بولىپ قالا بەرەمىن. مەن سپورتتى قۇرمەتتەيمىن. ءوز جان­كۇيەرلەرىمدى جەرگە قاراتپاۋعا ۋادە بەرەمىن دەپ ايتقىم كەلەدى», دەيدى الۆارەس.

ال ابەل سانچەس ماسەلەنىڭ ەتتە بولۋى مۇمكىن ەكەندىگىنە سەنەدى, بىراق ءوز وتانداسىن اقتاۋعا تىرىسپايدى. «ولار بار ماسەلە ەتتە دەپ وتىر. الەمدە نەشە ەل بار, ال ولاردىڭ مەكسيكادان باسقا ەلدەن تاپسىرىسپەن ەت الدىرۋعا قارجىلارى جەتپەي قالعان با؟ مەكسيكادا ۋلانعان ەت ماسەلەسى راسىمەن بار. ەگەر الۆارەس ونى شىن مانىندە جەگەن بولسا, وعان قارسى ەشقانداي سانكتسيا قولدانباۋى كەرەك. بۇل ونىڭ جاي عانا اقىماق ەكەندىگىن كورسەتىپ تۇر. ال ەگەر ماسەلە تەك قانا ەتتە بولماسا, كوميسسيا مۇشەلەرى جازا قولدانۋلارى ءتيىس. جاتتىقتىرۋشىلاردى دا جازالاۋ كەرەك», دەدى سانچەس.

سانچەستىڭ ءسوزىنىڭ جانى بار. الۆارەستىڭ كومانداسى سانالى تۇردە مەكسيكانىڭ «ۋلانعان ەتىن» جەپ, دوپينگ قولداندى دەگەن ايىپپەن جەكپە-جەكتى كەيىنگە قالدىرۋ ءۇشىن ادەيى جاساعان بولۋى مۇمكىن. سەبەبى الۆارەس گولوۆكيننىڭ سوققىسى جويقىن ەكەنىن, بىراق ۋاقىت وت­كەن سايىن وتانداسىمىزدىڭ كۇشى سارقىلىپ بارا جاتقانىن دا بى­لەدى. سوندىقتان مامىرداعى كەزدەسۋدەن باس تارتىپ, جەكپە-جەكتى كۇزگە دەيىن شەگەرە تۇرۋدى ءجون ساناعان. جوعارىدا «ۋلانعان ەتتى» جەپ ۇستالعان بوكسشىلاردىڭ 90 پايىزى اقتالىپ شىققان دەپ ايتىپ قالدىق قوي. الۆارەستىڭ كومانداسى دا وسى جايتقا باسا نازار اۋدارعان سياقتى. 18 ءساۋىر كۇنى مەكسيكالىق بوكسشى اقتالىپ جاتسا, وعان تاڭعالۋعا بولمايدى. ال ءساۋلدىڭ دوپينگ قولدانعانى انىقتالاتىن بولسا, التى ايدان ءبىر جىلعا دەيىن بوكس­تان شەتتەتىلۋى مۇمكىن.

دەگەنمەن, گەننادي گولوۆ­كيننىڭ پروموۋتەرى توم لەف­­فلەردىڭ ايتۋىنشا, الۆارەسكە قارسى كەزدەسۋ وتپەسە دە گو­لوۆ­كين 5 مامىر كۇنى جەكپە-جەك ۇيىمداستىرۋدى كوزدەپ وتىر. اۋەلگى جوسپار بويىنشا گولوۆ­كين 5 مامىر كۇنى لاس-ۆەگاس­تا جەكپە-جەك وتكىزەتىنىن, جان­كۇيەرلەردىڭ بارلىعى سينكو دە مايو مەرەكەسى قارساڭىندا ءوزى­نىڭ جۇدىرىقتاسۋىن كورۋ ءۇشىن بيلەت الىپ, جوسپارلارى­نا ەنگىزىپ قويعانىن ايتقان بولا­تىن. الايدا Los Angeles Times باسىلىمىنىڭ ءجۋرناليسى لانس پاگمايەر كەزدەسۋدىڭ لوس-اندجەلەس قالاسىنداعى 27 مىڭ جانكۇيەر سىياتىن StubHub Center فۋتبول الاڭىندا وتەتىن بولدى دەپ اقپارات تاراتتى.

قازىر گولوۆكيننىڭ كومانداسى كەزدەسۋ ورنى ەمەس, تەزىرەك قارسىلاس تاۋىپ, جەكپە-جەك ۇيىمداستىرۋ ماڭىزدى بولىپ تۇر. ويتكەنى 5 مامىرعا دەيىن 20 كۇن ۋاقىت قالدى. بۇل ۋاقىت ارالىعىندا دايىن قارسىلاستى تاۋىپ, ونىڭ كوڭىلىنەن شىعاتىن كەلىسىمشارت ۇسىنا قويۋ ەكىتالاي. قازىر «الۆارەستىڭ ورنىن مەن اۋىستىرامىن» دەگەندەردىڭ ءبارى ارزان پيار ءۇشىن اۋىز جىبىرلاتىپ, باق بەتىنە ءبىر شىعىپ قالۋ ماقساتىندا جۇرگەن بوكسشىلار.

ال گولوۆكيننەن ناقتى ۇسىنىس تۇسكەندەر «جەكپە-جەككە از ۋاقىت قالدى, دايىندالىپ, بيلەت ساتىپ ۇلگەرمەيمىز, گونورار تىم از» دەپ سىلتاۋراتا باس­تادى. نەگىزى مۇنى سىلتاۋ دەپ تە ايتا المايمىز. ويتكەنى ءۇش اپتانىڭ ىشىندە راسىمەن بيلەت ساتىپ, جەكپە-جەكتى جارنامالاپ ۇلگەرمەيدى. جالپى, كاسىپقوي بوكسشىلاردىڭ كوزدەگەنى ابىروي ەمەس, اقشا ەكەنى ەشكىمگە جاسىرىن ەمەس. سوندىقتان گو­لوۆكيننىڭ كومانداسى گەن­نا­ديمەن جۇدىرىقتاسۋعا نيەتتى بوكسشىنىڭ سۇراعان اقشاسىن بەرىپ, كوڭىلىنەن شىعاتىن كەلى­سىم­شارت ۇسىنباسا, لايىقتى قار­سىلاس تابۋى وتە قيىن.

قورىتا ايتقاندا, كاسىپقوي بوكستا اقشا كىمدە كوپ بولسا, باسىمدىق تا, ىقپالدى ادام­داردىڭ ىرقى دا سول جاقتا بولادى عوي. سوندىقتان بوكستىڭ ءىرى بيزنەسمەنى سانالعان الۆارەس گەنناديدىڭ كوكتەمدە جەكپە-جەك وتكىزبەۋى ءۇشىن بار كۇشىن, ايلاسىن سالعان بولۋى مۇمكىن. سونداي-اق مۇنى Golden Boy كوم­پانياسىنىڭ الدىن الا جوس­پار­لانعان «گولوۆكيندى الداۋ وپەراتسياسى» دەپ قاراۋعا دا بولاتىن سياقتى.

ءالي بيتورە,

«ەگەمەن قازاقستان»