ورالدا جالپىحالىقتىق سەنبىلىك باستالدى

- بۇگىننەن باستاپ ماۋسىم ايىنا شەيىن ءار سەنبى سايىن قالامىزدا وسىنداي سەنبىلىك وتەتىن بولادى. ماقساتىمىز – قالانى الداعى مەيرامدارعا, جاز ايلارىنا دايىنداۋ. بۇگىن ءبىرىنشى سەنبىلىك نەگىزىنەن قالانى سانيتارلىق تازالاۋعا ارنالعان. سونداي-اق 120 ءتۇپ شىرشا وتىرعىزامىز. ال كەلەسى سەنبى, 21 ءساۋىر – بۇكىل قازاقستان بويىنشا تەرەك وتىرعىزۋ كۇنى بولىپ جاريالاندى.

بۇيىرسا ءبىر ايدىڭ ىشىندە ورال قالاسىندا 10 مىڭ ءتۇپ كوشەت وتىرعىزامىز. ونىڭ 2 مىڭ ءتۇبى – قالالىق اكىمدىك وتىرعىزادى. قالعان 8 مىڭىن – قالا تۇرعىندارى, جەكە كاسىپكەرلەر, پيك مەكەمەلەرى ەگەدى, - دەيدى ورال قالاسى اكىمىنىڭ ورىنباسارى التىنبەك قايساعاليەۆ. قالاعا ءسان بەرتىن ساياباقتارعا, جول جيەكتەرىنە, الاڭقايلارعا وتىرعىزۋ ءۇشىن اعاشتىڭ التى ءتۇرى – شىرشا, ۇيەڭكى, اكاتسيا, سيرەن, تەرەك, قاراعاش كوشەتتەرى تاڭداپ الىنعان.

قالالىق اكىمدىك وكىلىنىڭ ايتۋىنشا, ورال قالاسىندا كوكتەمگى سۋ تاسقىنى قاۋپى سەيىلگەن. بىراق وبلىس ورتالىعىن اينالىپ اعىپ جاتقان دەركۇل, شاعان, جايىق وزەندەرىندە ەندى-ەندى سەڭ ءجۇرىپ, سۋ دەيگەيى كوتەرىلىپ جاتىر. «سۋ دەڭگەيى تومەندەپ, وزەندەر ءوز تاڭعارىنا تۇسكەن سوڭ جاعالاۋلاردى تازالاۋ جۇمىسىن باستايمىز» بۇل ماۋسىم ايىنا جوسپارلانعان» دەيدى التىنبەك كەڭەس ۇلى.

بەلگىلەنگەن ءتارتىپ بويىنشا ءاربىر مەكەمە مەنشىك تۇرىنە قاراماستان ءوز عيماراتىنىڭ اينالاسىن 5 مەترگە دەيىن تازا ۇستاۋى, اباتتاندىرۋى, اعاش, گۇل وتىرعىزۋى, ۆيترينالارى مەن تەرەزەلەرىن جۋىپ, تازا ۇستاۋى تالاپ ەتىلەدى.

جاڭا شىرشا كوشەتتەرى وتىرعىزىلعان مۇرات موڭكە ۇلى كوشەسىندەگى ادەمى مۇيىسكە – «الاش اللەياسى» اتاۋى بەرىلەتىندىگى جونىندە وسىدان بىرنەشە جىل بۇرىن حابارلانعان بولاتىن. ء«يا, ونداي جوسپار بولدى, بىراق ءالى رەسمي بەكىتىلگەن جوق. قازىر بۇل ماسەلە ونوماستيكالىق كوميسسيا قاراۋىندا» دەدى التىنبەك قايساعاليەۆ.

ورال قالاسىنىڭ تازالىعىن ساقتاۋ, كوشەتتەر مەن گۇلدەر وتىرعىزۋ, اباتتاندىرۋ جۇمىستارىنا 2018 جىلى 140 ملن. تەڭگە جوسپارلانعان.

قازبەك قۇتتىمۇرات ۇلى,

«ەگەمەن قازاقستان»

ورال قالاسى

سۋرەتتى تۇسىرگەن تەمىربولات توقمامبەتوۆ