وسكەمەندەگى دارىندى بالالارعا ارنالعان جامبىل اتىنداعى مامانداندىرىلعان مەكتەپ-گيمنازيا-ينتەرناتىندا عىلىم كۇنى اياسىندا «قانيپا الەمى» اپتالىعى قورىتىندىلاندى.
اپتالىق شەڭبەرىندە وبلىسىمىزدىڭ وسكەمەن, سەمەي قالالارى مەن اۋداندارىنان كەلگەن وقۋشىلار ايگىلى ۇستاز, كسرو مەملەكەتتىك سىيلىعىنىڭ يەگەرى, ءتىل جاناشىرى, سانالى ءومىرىن ۇلتىمىزدىڭ ۇلىلارىنىڭ مۇرالارىن ناسيحاتتاۋعا باعىشتاعان قانيپا بىتىباەۆاعا ارناعان ولەڭدەرىن وقىپ, ناقىل سوزدەرىن جاتقا ايتىپ, ءسۇيىپ تىڭداعان اندەرىن ناقىشىنا كەلتىرە ورىندادى.
«بۇل اپتالىق وسىمەن ءتورتىنشى جىل قاتارىنان قاتارىنان ءداستۇرلى تۇردە ۇيىمداستىرىلىپ كەلەدى. اپتالىق اياسىندا توعىز قۇمالاق ويىنىنان قالالىق تۋرنير وتكىزىلدى. 8-10 سىنىپ وقۋشىلارى ۇستازعا ارناعان عىلىمي جوبالارىن قورعادى.
ءتورتىنشى كۇنى وقۋشىلار اسپانعا زىمىراندار ۇشىردى, ياعني ولار زىمىراندار بايقاۋىنا قاتىستى. اكەمىز ومارعاليدىڭ انامىزعا ايتقان وسيەتى كورىنىس رەتىندە ساحنالاندى. اپتالىق قورىتىندىسىندا قانيپا بىتىباەۆانىڭ دوسى شولپان جيەنباەۆا, شاكىرتتەرى ءتۇسىپحان تۇسىپبەكوۆ پەن ايگۇل قاپيراتقىزى ۇستازى تۋرالى تولقىپ سويلەپ, تەبىرەنە ەستەلىكتەرىن ايتتى. تۋىستارى مەن سىڭلىلەرى دە شاراعا بەلسەنە قاتىستى. وسى رەتتە ءىس-شارانىڭ جوعارى دەڭگەيدە وتۋىنە اتسالىسقان مەكتەپ ديرەكتورى نۇركەن اكيموۆقا, توعىز قۇمالاقتان جاتتىقتىرۋشى اسقار رامازانوۆقا, قازاق ءتىلى مەن ادەبيەتى ءپانىنىڭ مۇعالىمدەرى قارلىعاش ساعيەۆاعا, ءجانيا الدەباەۆاعا, مەرۋەرت مۇقاشەۆاعا العىسىمدى بىلدىرگىم كەلەدى», - دەيدى اپتالىقتى ۇيىمداستىرۋشى, جامبىل اتىنداعى مامانداندىرىلعان مەكتەپ-گيمنازيا-ينتەرناتى ديرەكتورىنىڭ عىلىمي يننوۆاتسيالىق جۇمىستارى جونىندەگى ورىنباسارى باقىتگۇل اۋعانباەۆا.
اپتالىقتىڭ قورىتىندىسىندا سەمەيدەگى №37 ورتا مەكتەپتىڭ مۇعالىمى قۇرالاي جاكەنوۆا «ۇزدىك زەرتحانا جەتەكشىسى», اياگوزدەگى №6 ورتا مەكتەپتىڭ ۇستازى جانار ساياجانقىزى «ۇزدىك ورتالىقتار» اتالىمدارىمەن ماراپاتتالدى.
ازامات قاسىم,
«ەگەمەن قازاقستان»