وڭتۇستىك قازاقستان وبلىسىنىڭ جوعارى وقۋ ورىندارىندا ءبىلىم الاتىن 7200-دەن استام ستۋدەنت-جاستار تۇراتىن 26 جاتاقحانا بار. سوڭعى ەكى جىلدا وبلىستا ەكى مەملەكەتتىك جوعارى وقۋ ورنىندا 1000 ورىندىق جاتاقحانا سوعىلىپ, پايدالانۋعا بەرىلدى. ال اعىمداعى جىلدىڭ ءىى جارتى جىلدىعىندا ستۋدەنتتەرگە ارنالعان تاعى ەكى جاتاقحاننىڭ قۇرىلىس جۇمىستارىن باستاۋ كوزدەلىپ وتىر.
مەملەكەتتىك حاتشى گۇلشارا ابدىقالىقوۆانىڭ توراعالىعىمەن وتكەن قر پرەزيدەنتى جانىنداعى جاستار ساياساتى جونىندەگى كەڭەستىڭ ءححى كوشپەلى وتىرىسىندا وقو اكىمى ج.تۇيمەباەۆ وسىنداي دەرەكتەر كەلتىردى. ەلىمىزدەگى جاستار ۇيىمدارىنىڭ كوشباسشىلارى, جاستار ساياساتى سالاسىنداعى ساراپشىلار قاتىسقان پلەنارلىق وتىرىس اشىق اڭگىمە فورماتىندا ءوتتى. قاتىسۋشىلار الدىمەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ 1 جىلدىعىنا ارنالعان كەشەندى كورمەسىنە قويىلعان جۇمىستارمەن تانىستى. ال كەڭەس وتىرىسىنىڭ كۇن تارتىبىندە قوعامدىق سانانى جاڭعىرتۋ باعدارلاماسى اياسىنداعى قازىرگى قازاقستاندىق جاستاردىڭ قۇندىلىق پايىمدارى جانە وزەكتى اسپەكتىلەرى مەن جاستاردىڭ مادەني – دەمالىس قىزمەتتەرىن ۇيىمداستىرۋ جايى قارالدى. ءدىن ىستەرى جانە ازاماتتىق قوعام ءمينيسترى, قر پرەزيدەنتىنىڭ جانىنداعى جاستار ساياساتى جونىندەگى كەڭەس توراعاسىنىڭ ورىنباسارى دارحان كالەتاەۆ ەلىمىزدە جۇرگىزىلگەن ساۋالناما ناتيجەسىندە انىقتالعان وزەكتى ماسەلەلەرگە توقتالدى. مىسالى, جاستاردىڭ 97 پايىزى قازاقستان ازاماتى ەكەنىن ماقتان تۇتسا, 92 پايىزى ءوزىن ەل پاتريوتى سانايدى. «دەگەنمەن, بەتىن اۋلاق قىلسىن, ساۋالناماعا قاتىسقان جاستاردىڭ 8 پايىزى ەل قورعاۋ قاجەت بولسا قولعا قارۋ ۇستاۋعا دايىن ەكەندىكتەرىن ءبىلدىردى. سونداي-اق, جاستارىمىزدىڭ دەنساۋلىعى دا الاڭداتارلىق جاعدايدا», - دەدى د.قالەتاەۆ. زەرتتەۋ ناتيجەسىندە جاستاردىڭ 49,9 پايىزى كىتاپحاناعا بارماعانى, 83 پايىزى عالامتوردا كوپ وتىراتىنى انىقتالعان. دەگەنمەن جاستاردىڭ 82,8 پايىزى وتباسىن باستى قۇندىلىق سانايدى.
كەڭەستە قوعامدىق سانانى جاڭعىرتۋ جانە جاستاردىڭ مادەني – دەمالىس قىزمەتتەرىن ۇيىمداستىرۋ تۋرالى مادەنيەت جانە سپورت ءمينيسترى, «جاس وتان» جاستار قاناتىنىڭ, «قازاقستان-2050» جالپىۇلتتىق قوزعالىسىنىڭ توراعالارى, جاس كاسىپكەرلەر بايانداما جاسادى. تەك ستۋدەنتتەرمەن عانا ەمەس اۋىلداعى جاستارمەن, جۇمىسسىز جۇرگەندەرمەن جۇمىس ىستەۋ, ۇكىمەتتىك ەمەس ۇيىمدارمەن بىرلەسىپ جاستار جوبالارىن ازىرلەۋ جانە ۇلتتىق قۇندىلىقتاردى زەرتتەۋ, قولداۋ ورتالىقتارىن اشۋ قاجەتتىگى ايتىلدى. كەڭەس مۇشەلەرى جاستار ساياساتى جونىندەگى كەڭەستىڭ 2019 جىلعا ارنالعان جۇمىس جوسپارىن ماقۇلدادى.
جيىن قورىتىندىسىندا مەملەكەتتىك حاتشى گۇلشارا ابدىقالىقوۆا بىرقاتار مينيسترلىكتەر مەن اكىمدەرگە جاستاردىڭ مادەني-دەمالىس ورىندارىن قاجەتتى ماتەريالدىق-تەحنيكالىق بازامەن نىعايتۋ, سپورتپەن شۇعىلدانۋىنا جاعداي جاساۋ, سپورتتىق مادەني ۇيىرمەلەرگە تەگىن قاتىسۋىنا قولداۋ كورسەتۋ, جاستار اراسىندا كىتاپ وقۋدى كەڭىنەن ناسيحاتتاپ, كىتاپحانالارعا, تەاترلارعا, مۇراجايعا بارۋىنا جاعداي جاساۋ, باق-تا جانە الەۋمەتتىك جەلىلەردە جاستار ساياساتىنىڭ دامۋ بارىسى جانە جاستارعا قولداۋ شارالارى تۋرالى اقپارات تاراتۋ, جاستارعا جاسالاتىن جەڭىلدىكتەر مەن تومەن باعالار, سول ورىندارداعى جۇمىستار جايلى الدىن الا تانىستىرىپ وتىرۋدى تاپسىردى. جالپى وتىرىستان كەيىن كەڭەس مۇشەلەرى ءوڭىر جاستارىمەن «اشىق اڭگىمە» فورماتىندا كەزدەسۋلەر وتكىزدى.
ايتا كەتەلىك, وبلىستاعى جاستاردىڭ سانى 750 مىڭ شاماسىندا, ياعني, وبلىس حالقىنىڭ جالپى سانىنىڭ 26 پايىزىن جاستار قۇرايدى. سوندىقتان دا جاستاردى جۇمىسپەن قامتۋ جەرگىلىكتى بيلىكتىڭ باستى نازارىندا. ماسەلەن, «ديپلوممەن اۋىلعا» باعدارلاماسى بويىنشا 905 جاس مامان, «جاستار پراكتيكاسى» بويىنشا 5204 جاس جۇمىسقا ورنالاستى. ال «سەرپىن» باعدارلاماسى بويىنشا بولىنگەن 15 مىڭنان استام مەملەكەتتىك گرانتتىڭ 50 پايىزى نەمەسە 7587-ءسى وڭتۇستىك جاستارىنا تيەسىلى. مەملەكەتتىك باعدارلامالاردى پايدالانۋشى جاستاردىڭ سانى دا كۇننەن كۇنگە ارتىپ, 2015 جىلمەن سالىستىرعاندا 53,1 پايىزعا ارتقان.
ەركىن دوسىمباي,
وڭتۇستىك قازاقستان وبلىسى