پاريج تورىندە ءان سالعان امىرە قاشاۋباي ۇلىنىڭ سارا جولىن جالعاستىرۋشىلار قاتارى كەيىنگى 100 جىلعا جۋىق ۋاقىت بويىنا ۇزىلگەن جوق دەسەك, قاتەلەسە قويماسپىز. ونىڭ دالەلى رەتىندە ارعى-بەرگى وقيعالاردى ساناپ شىقپاي-اق, كۇنى كەشە عانا فرانتسۋز جۇرتىنىڭ قۇلاق قۇرىشىن قاندىرىپ قايتقان قارشاداي بالا تۋرالى ايتساق تا بولار...
جاقىندا حالىقارالىق دەڭگەيدە وتەتىن «ساليۋت تالانتوۆ» بايقاۋى اياقتالدى. الەمدەگى تالانتتى بالالاردىڭ باسىن قوساتىن ونەر جارىسى بيىل پاريج قالاسىندا ۇيىمداستىرىلىپتى. وسى بايقاۋعا الماتى وبلىسىنىڭ اقسۋ اۋدانىنان 6- سىنىپ وقۋشىسى ديدار مۇقاتاي, قاتىسىپ كەلدى. جاي كەلگەن جوق, جۇزدەگەن ەلدىڭ ورەندەرىنىڭ اراسىنان توپ جارىپ, جۇلدەلى 1 ورىن يەلەنىپ قايتتى.
– اقسۋ اۋدانىنداعى ق.ساتباەۆ اتىنداعى مەكتەپتىڭ 6-سىنىبىندا وقيمىن. ءان ايتۋدى 2-سىنىپتان باستادىم. پاريجگە باراردان بۇرىن استانادا وتكەن «اق كوگەرشىن» بايقاۋىندا باس جۇلدە الدىم. شەتەلگە شىققانىمدا ازداپ تولقىدىم, بىراق وتە كوڭىلدى بولدى. جاڭادان دوستار تاپتىم, تانىستىم. بولاشاقتا قازاقتىڭ ءانىن الەمگە تانىتىپ, دۇنيەجۇزىن ارالاعىم كەلەدى. مەنى انشىلىككە باۋلىپ جۇرگەن ۇستازىم يلياس اعايىما العىس ايتامىن, – دەيدى تالاپكەر ءانشى.
بولاشاعىنان ۇلكەن ءۇمىت كۇتتىرەتىن ونەرلى ورەن فرانتسيا استاناسىنىڭ تورىندە «اق جايىق» ءانىن شىرقاپ, شەتەلدىكتەردىڭ تاڭدايىن قاقتىرعان ەكەن. ايتپاقشى, ديدار مۇقاتاي حالىقارالىق بايقاۋلاردا ونەر كورسەتىپ جۇرگەن جالعىز جەتىسۋلىق ونەرپاز ەمەس. ەسكەلدى اۋدانىنداعى «ايانا» جاس بيشىلەر توبى دا ديدارمەن بىرگە «اق كوگەرشىن» حالىقارالىق بايقاۋىنان ءبىرىنشى ورىن العان بولاتىن.
قالماحانبەت مۇقامەتقالي, «ەگەمەن قازاقستان»
الماتى وبلىسى