ەلىمىزدە «رۋحاني جاڭعىرۋ» باعدارلاماسى جاريالانعالى بەرى باتىس قازاقستان وبلىسىندا 200-ءدىڭ ۇستىندە ءىس-شارا ۇيىمداستىرىلدى. جالپى 2018 جىلعا باعدارلاما اياسىندا 414 شارا وتكىزۋ جوسپارلانعان. بۇل جونىندە وبلىس اكىمىنىڭ ورىنباسارى عابيدوللا وسپانقۇلوۆ «JAIYK SMART IDEAS» جاستار كلۋبىنىڭ بەيرەسمي جيىنىندا حابارلادى.
«رۋحاني جاڭعىرۋ» اياسىندا بىلتىرعى وتكەن 143 ءىس-شارانىڭ باسىم بولىگى جەرگىلىكتى دەمەۋشىلەردىڭ قولداۋىمەن جۇزەگە اسقان. سونىڭ ىشىندە «قازاقستاننىڭ جەتى كەرەمەتى» تۋريستىك-ولكەتانۋ ايماقتىق ەكسپەديتسياسى, «جاس ەكولوگتەر» مەن «مەنىڭ ەلىم – قازاقستان» رەسپۋبليكالىق فورۋمى, كوللەدج ستۋدەنتتەرى اراسىندا «رۋحاني جاڭعىرۋ – بولاشاقتىڭ كەپىلى» فەستيۆالى, بالالار مەن جاسوسپىرىمدەر انسامبلدەرىنىڭ شەرۋى, «تۋعان ولكە News» ايماقتىق مەديا-فورۋمى, ء«بىلىم. تۋريزم. ينتەگراتسيا» حالىقارالىق عىلىمي-پراكتيكالىق كونفەرەنتسياسى ءوتتى. «اتامەكەن» كىشى باعدارلاماسى بويىنشا بارلىعى 93 جوبا تىزىلىمگە ەنىپ, سونىڭ 67-ءسى مارەگە جەتتى. «الەۋمەتتىك باستامالار كارتاسى» اياسىندا كاسىپكەرلەر تاراپىنان 60 جوبا جاسالدى. ءسويتىپ اقساي قالاسىندا سپورت كەشەنى, ءبورلى اۋدانىندا بالاباقشالار, قازتالوۆ اۋدانىندا 12 ملن تەڭگەگە اشىق اسپان استىنداعى مۋزەي بوي كوتەردى.
«رۋحاني قازىنا» كىشى باعدارلاماسى بويىنشا وڭىردە قازاقستان بويىنشا العاش رەت باتىس قازاقستان وبلىسىندا «رۋحاني جاڭعىرۋ» مۋزەيى اشىلدى. سونىمەن قاتار وبلىس اۋداندارىنا ەكسپەديتسيا جۇرگىزۋ ارقىلى قازاقستاننىڭ ۆيرتۋالدى كارتاسى ءۇشىن قاسيەتتى نىسانداردىڭ GPS كوورديناتتارى انىقتالىپ, «قاسيەتتى قازاقستان» عىلىمي-زەرتتەۋ ورتالىعىنا بەرىلدى.
بيىل باعدارلاما اياسىندا 414 ءىس-شارا جوسپارلانىپ وتىر. بۇل جوبالار دا نەگىزىنەن دەمەۋشىلەر ەسەبىنەن جۇزەگە اسپاق. «تاربيە جانە ءبىلىم» كىشى باعدارلاماسى بويىنشا 88 ءىس-شاراعا 60 مىڭعا جۋىق ادام تارتىلادى. « ۇلى جىبەك جولى – ۇلى دوستىق جولى» اتتى ورال-سارايشىق-اتىراۋ-پياتيگورسك باعىتىمەن حالىقارالىق تاريحي ەكسپەديتسيا جولعا شىعادى.
ۇلتتىق كودىمىزدى ساقتاۋدىڭ ءبىر جولى رەتىندە باتىس قازاقستان وبلىسىندا دومبىرانى كەڭىنەن ناسيحاتتاۋ قولعا الىندى. مەكتەپتەردە دومبىرا ۇيىرمەلەرى اشىلىپ, ۇزىلىستىك قوڭىراۋ ورنىنا كۇي اۋەنى ويناتىلادى. مامىر ايىنىڭ ەكىنشى ونكۇندىگىندە دومبىرا كۇنىن وتكىزۋ جوسپارلانعان. وبلىستا مەتسەناتتاردىڭ كومەگىمەن 247 جوبا اتقارىلماق. ولاردىڭ ىشىندە اۋىلدىق مادەنيەت ءۇيى, ساۋىقتىرۋ كەشەنى, تازا اۋىز سۋمەن قامتۋ جۇيەسى سەكىلدى ءىرى جوبالار دا بار. وسىنداي ۇلكەن جوبا – شىڭعىرلاۋ وزەنىنەن وتەتىن كوپىر قۇرىلىسىن كاسىپكەر ميربولات تاسماعامبەتوۆ سالىپ, اۋىلداستارىنا سىيلاپ ۇلگەردى.
رەسپۋبليكالىق جالپىۇلتتىق قاسيەتتى نىساندارى قاتارىنا كىرگەن ورتاعاسىرلىق جايىق قالاشىعى, بوكەي ورداسى تاريحي-مۋزەي كەشەنى, الاش مۋزەيى, تاقساي وبالار كەشەنى, جۇماعازى حازىرەت, اقىن, قوعام قايراتكەرى عۇمار قاراش پەن كۇيشى-كومپوزيتور داۋلەتكەرەي كەسەنەلەرىنە ەرەكشە نازار اۋدارىلىپ, كوڭىل بولىنەتىن بولادى. سىرىم اۋدانىنداعى الاش مۋزەيى كۇردەلى جوندەۋدەن ءوتتى. عۇمار قاراشتىڭ باسىنا كەسەنە تۇرعىزىلماق. جايىق قالاشىعى اۋماعىنا ورتاعاسىرلىق ستيلدە كىرەبەرىس قاقپا ورناتىلادى. بۇل سوڭعى اتالعان جۇمىستار دەمەۋشىلەردىڭ كومەگىمەن جۇزەگە اسىرىلماق.
قازبەك قۇتتىمۇرات ۇلى, «ەگەمەن قازاقستان»
ورال