قازاقستاندا كەنجەلەپ قالعان سۋ سپورتى, ونىڭ ىشىندە سۋدا ءجۇزۋ سپورتى قارقىندى دامىپ كەلەدى. ريو وليمپياداسىندا سەنساتسيالىق تۇردە التىن مەدال العان دميتري بالاندين سونىڭ ايقىن دالەلى.
بالاندينگە دەيىن ءجۇزۋ سپورتىنان الەم جانە وليمپيا ويىندارىنا قاتىسقان سپورتشىلارىمىز بولدى. بىراق ولار دميتري بالاندين جەتكەن شىڭعا كوتەرىلە الماعان ەدى. ءدميتريدىڭ ستۋدەنتتەر اراسىنداعى جازعى ۋنيۆەرسيادادا ءبىر التىن, ءبىر كۇمىس جانە ەكى قولا مەدال جەڭىپ العانىن, ازيا ويىندارىنىڭ ءۇش دۇركىن چەمپيونى بولعانىن جانكۇيەر قاۋىم ۇمىتا قويماعان بولار.
جۋىردا عانا 23 جاسقا تولعان سپورتشىمىز كەشە ءتورت جىل بۇرىنعى جەتىستىگىن تاعى قايتالادى. بۇل جولى يسپانيانىڭ مالاگا قالاسىندا سۋ سپورتىنان وتكەن يسپانيا اشىق چەمپيوناتىندا. بيىلعى ماۋسىمنىڭ باستى دوداسى يندونەزيادا وتەتىن جازعى ازيا ويىندارىنا دايىندىقتارىن پىسىقتاپ جاتقان قازاقستان قۇراماسى اتالعان دودادا سەگىز مەدال ولجالادى. ونىڭ ۇشەۋىن دميتري بالاندين يەلەندى. ۇشەۋى دە التىن. يسپانيا بىرىنشىلىگىندە وتانداسىمىز 200, 100 جانە 50 مەتر قاشىقتىققا براسس ادىسىمەن جۇزۋدە قارسىلاس شاق كەلتىرمەدى.
سونداي-اق قازاقستان چەمپيوناتىنىڭ رەكوردشىسى ادىلبەك مۋسين باتتەرفلياي ادىسىمەن 100 جانە 50 مەتر قاشىقتىققا جارىسۋدان ءبىر كۇمىس, ءبىر قولا جۇلدە ەنشىلەدى. تاعى ءبىر وتانداسىمىز ءادىل قاسقاباي 100 مەترگە ەركىن ادىسپەن جۇزۋدە كۇمىس, 50 مەترگە جۇزۋدەن قولا الدى. ال ايبەك قامزەنوۆ 50 مەترگە براسس ادىسىمەن جۇزۋدە قولا مەدالعا قول جەتكىزدى.
ءالي بيتورە, «ەگەمەن قازاقستان»