قاراعاندىدان 80 شاقىرىم جەردە «شوپا» دەگەن شاعىن اۋىل بار. الماتىعا اپارار كۇرە جولدان 3 شاقىرىمداي شەتكەرىرەك ورىن تەپكەن. تەرريتوريالىق اۋماق بويىنشا شەت اۋدانىنا قارايدى. 140-تان استام تۇرعىنى بار وسى اۋىل جىل سايىن قارعىن سۋدىڭ زاردابىنان زار يلەيدى. شوپا بۇل كەپتى بيىل تاعى كيدى.
قىزىل سۋ جۇرگەن كەزدە اۋىلدىڭ جانىنداعى شاعىن وزەن تاسىپ, ەلدى مەكەنگە الىپ بارار جولدىڭ ءبارىن شايىپ ءوتىپ, تۇرعىندار «بارساكەلمەس» ارالىندا قالعانداي كۇي كەشتى. كورشى اۋىلعا بارىپ وقيتىن بالالار ساباقتان قالىپ, اۋىل تۇرعىندارى ءۇشىن سىرتتان ازىق-ت ۇلىك جەتكىزۋدىڭ ءوزى مۇڭعا اينالدى. قاراعاندىعا بارىپ-كەلىپ جۇمىس ىستەيتىندەر دە امال جوق, ومالىپ ۇيدە وتىر. «اۋىلدا مەكتەپتە وقيتىن 27 بالا بار. سۋ تارتىلمايىنشا ولاردى ەشقايدا جىبەرمەيمىز. وزەننەن وتەتىن كوپىردىڭ ءوزى سۋ استىندا قالدى. ءبىزدىڭ پروبلەماعا قۇلاق اساتىن ادام تابىلماي تۇر. جىلدا كورەتىنىمىز وسى», دەپ مۇڭ شاعادى اۋىل تۇرعىنى بەيبىت مۇحاممەد.
تاياۋدا وبلىس اكىمدىگىندە وتكەن اپپارات جيىنىندا ءوڭىر باسشىسى ەرلان قوشانوۆ شەت اۋدانىنىڭ اكىمى مارات جانداۋلەتوۆتى سىنعا الدى. «وسى ماسەلەلەردى ەرتەرەك شەشۋ كەرەك ەدى. بيىل نەگە شوپادا بوگەن تۇرعىزبادىڭىزدار؟ اۋدان اكىمى ۇيىقتاپ ءجۇر, بۇكىل ەلدىڭ الدىندا سوزگە قالدىق. اۋىلداعى ۇيلەردىڭ ءبارى, مىنە, بىرنەشە كۇن بولدى, سىرتقى الەمنەن ءبولىنىپ قالعان», دەدى وبلىس اكىمى.
شوپادا اۋىلدىڭ ماڭىنان وتەتىن وزەننىڭ سۋى ارناسىنان 30 سم-دەي كوتەرىلىپ, جول ۇستىنەن ءجۇرىپ وتكەن. وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى اسكەربەك حالتونوۆتىڭ ايتۋىنشا, شوپاعا دەيىن تارتىلعان 3 شاقىرىم جول كوپتەن بەرى قاراۋسىز قالىپ كەلگەن, ابدەن توزىعى جەتىپ ەسكىرگەن. «بۇل جول بىلتىر شەت اۋدانىنىڭ مەنشىگىنە بەرىلدى. قازىر جوبالاۋشىلار جولدىڭ سۋ وتكىزۋ مۇمكىندىگىن ارتتىرۋ ماسەلەلەرىمەن اينالىسىپ جاتىر. سۋ وتكىزگىش قۇبىرلار سانىن ارتتىرۋ تۋرالى شەشىم قابىلداندى», دەپ مالىمدەدى ول.
سونىمەن قاتار اتالعان جيىندا وبلىستاعى سۋ تاسقىنىنىڭ الدىن الۋ شارالارىنىڭ بارىسى دا جان-جاقتى ءسوز بولدى. بۇگىنگى كۇندە وڭىردەگى ەڭ ۇلكەن سۋ قويماسى – سامارقانداعى سۋدىڭ مولشەرى 195 ملن تەكشە مەتردى قۇرايدى. سۋدىڭ تولۋى 76,7%-عا تەڭ. وبلىس اكىمىنىڭ ورىنباسارى اناتولي شكارۋپا وڭىردەگى وزەندەردىڭ تاسقىن كەزىندەگى سۋ مولشەرىن تولىقتاي وتكىزە المايتىنىن ايتتى. سول سەبەپتى جول كارتاسىنا وزەندەر ارناسىن تۇزەتۋ بويىنشا جۇمىستار ەنگىزىلگەن. «بۇل ماقسات ءۇشىن جوبالاۋ-سمەتالىق قۇجاتتار ازىرلەندى, جۇمىس بيىل باستالادى. سۋ جولدان اسىپ كەتپەۋ ءۇشىن سۋ وتكىزگىش قۇبىرلاردى ورناتۋ جۇمىستارىن اياقتاۋ كەرەك. بۇل ءۇشىن جول بويىنداعى وسال دەگەن 56 ۋچاسكە انىقتالىپ, ونىڭ 13-ءى بويىنشا جۇمىستار اتقارىلدى. جولدىڭ قالعان ۋچاسكەلەرىندەگى قۇبىر ورناتۋ جۇمىستارى بيىل تولىقتاي اياقتالۋى كەرەك», دەپ حابارلادى ا.شكارۋپا.
جيىندى قورىتىندىلاعان وبلىس اكىمى تۋىنداي قالعان پروبلەمالاردى تابان استىندا شەشىپ تاستاۋدى قاتاڭ تاپسىردى.
قايرات ءابىلدا,
«ەگەمەن قازاقستان»
قاراعاندى وبلىسى