بيىلعى جىلدىڭ تامىز ايىنىڭ ەكىنشى جارتىسىندا يندونەزيا استاناسى – جاكارتا قالاسىندا XVIII جازعى ازيا ويىندارىنىڭ الاۋى تۇتاناتىنى بەلگىلى. وكىنىشكە قاراي, قازاقستاننىڭ كەيبىر مىقتى بوكسشىلارى سول جارىسقا قاتىسپايتىن بولدى.
كۇنى كەشە عانا ايبا باسشىلىعى مەن ايتۋلى جارىستى ۇيىمداستىرۋشىلار ءوزارا كەلىسە وتىرىپ, بوكسشىلار باسەكەسىنىڭ باعدارلاماسىنا ءبىراز وزگەرىس ەنگىزۋدى ءجون كورگەن ەكەن. اتاپ ايتساق, ەرلەر اراسىنداعى سايىستا ادەتتەگىدەي 10 ەمەس, نەبارى 7 سالماق دارەجەلەرى بويىنشا جۇلدەلەر ساراپقا سالىنادى. سوعان سايكەس, 81 كەلى, 91 كەلى جانە +91 كەلى سالماقتار XVIII جازعى ازيا ويىندارى باعدارلاماسىنان الىنىپ تاستالدى.
ايبا تاراپىنان قابىلدانعان وسى توسىن ءارى قيسىنسىز شەشىمدى بوكسشىلار قاۋىمى ءالى دە قابىلداي الاتىن ەمەس. بۇل «يدەيا» سان ميلليون جانكۇيەرلەرگە دە ۇنامادى. باپكەرلەر دە, باسقالار دا جاعالارىن ۇستادى. قازىردىڭ وزىندە كەيبىر ۇلتتىق فەدەراتسيالار اشىق تۇردە ءوز نارازىلىقتارىن ءبىلدىرىپ, الەمدىك بوكس سالاسىنىڭ تىزگىنىن ۇستاعان ازاماتتاردان ولاردىڭ وسىنداي ويسىز قادامعا بارۋىنا نە تۇرتكى بولعانىن ءتۇسىندىرۋدى تالاپ ەتۋدە.
جوعارىداعى «جاڭاشىلدىق» قازاقستاندىقتارعا دا جاققان جوق. سەبەبى, ايتۋلى سالماق دارەجەلەرى بويىنشا وتەتىن باسەكەلەردىڭ باس جۇلدەسىنەن باستى ۇمىتكەرلەر قاتارىندا ءبىزدىڭ دە بىلعارى قولعاپ شەبەرلەرى بار. ماسەلەن, 81 كەلى سالماقتا ادىلبەك نيازىمبەتوۆ ونەر كورسەتۋگە ءتيىس ەدى. ول وليمپيا ويىندارى مەن الەم چەمپيوناتتارىندا ەكى رەتتەن كۇمىس مەدالدى موينىنا ءىلدى. 2014 جىلى ازيا ويىندارىنىڭ جەڭىمپازى اتاندى. 91 كەلى سالماقتاعى ۆاسيلي لەۆيت ريو وليمپياداسى مەن گامبۋرگتەگى دۇنيەجۇزىلىك دودادا جۇلدەگەرلەر ساناتىنا قوسىلدى. ازيا بىرىنشىلىگىندە ءۇش مارتە توپ جاردى. +91 كەلى سالماقتا قامشىبەك قوڭقاباەۆ بار. نار تۇلعالى قانداسىمىز بىلتىرعى الەم چەمپيوناتىندا كۇمىس مەدال يەلەندى. مىنە وسى ساڭلاقتار ءۇشىن جاكارتاعا باراتىن جول جابىلدى.
عالىم سۇلەيمەن,
«ەگەمەن قازاقستان»