كەشە مەملەكەت باسشىسى نۇرسۇلتان نازارباەۆ ەلىمىزدەگى بىرقاتار ەلشىلەردەن سەنىم گراموتالارىن قابىلدادى.
اقوردادا وتكەن ارنايى راسىمدە ەلباسىنا رەسەي فەدەراتسياسىنىڭ توتەنشە جانە وكىلەتتى ەلشىسى الەكسەي بوروداۆكين, وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ, تۇرىكمەنستاننىڭ توتەنشە جانە وكىلەتتى ەلشىسى تويلى كومەكوۆ جانە يتاليا رەسپۋبليكاسىنىڭ توتەنشە جانە وكىلەتتى ەلشىسى پاسكۋالە د’اۆينو سەنىم گراموتاسىن تاپسىردى.
«بارشاڭىزدى قازاقستانداعى جاڭا ديپلوماتيالىق ميسسيالارىڭىزدىڭ رەسمي باستالۋىمەن شىن جۇرەكتەن قۇتتىقتايمىن. جاۋاپتى ءارى مارتەبەلى مىندەتتەرىڭىز ەلدەرىمىز اراسىنداعى ىنتىماقتاستىقتى ودان ءارى نىعايتۋعا سەرپىن بەرەدى دەپ سەنەمىن. سىزدەردىڭ ديپلوماتيالىق قىزمەتتەرىڭىز مازمۇندى ءارى ماڭىزدى وقيعالارعا تولى كەزەڭدەردە بولعالى تۇر», دەدى ەلباسى سالتاناتتى راسىمدە.
مەملەكەت باسشىسى قازاقستان شيرەك عاسىر ىشىندە ديپلوماتيالىق جۇيەسى ورنىققان, ازاماتتىق قوعامى كەمەلدەنگەن, ەكونوميكاسى دامىعان مەملەكەتكە اينالعانىن باسا ايتتى. سونداي-اق ەلىمىز قولعا العان يگى باستامالاردىڭ تۇپكى ماقساتى الەمدەگى وزىق دامىعان 30 ەلدىڭ قاتارىندا بولۋ ەكەندىگىن اتاپ ءوتتى.
«قازاقستان حالىقارالىق بايلانىستارىن دامىتا ءتۇسۋ ءۇشىن كوپجاقتى سىرتقى ساياسي باعىتىن جالعاستىرا بەرەتىن بولادى. ءبىز بەيبىتشىلىك پەن قاۋىپسىزدىكتى, حالىقارالىق قۇقىق نەگىزدەرىن نىعايتۋدى كوزدەيتىن ءىس-ارەكەتتەردى قولدايمىز. بۇعان قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە اتقارىپ كەلە جاتقان جۇمىستارىنىڭ ناتيجەسى دالەل», دەدى قازاقستان پرەزيدەنتى.
نۇرسۇلتان نازارباەۆ ەلىمىزدىڭ بىتىمگەرشىلىك جۇمىستارعا بەلسەندى اتسالىسىپ وتىرعانىنا نازار اۋدارىپ, سيرياداعى قاقتىعىستاردى رەتتەۋ ىسىندە استانا پروتسەسىنىڭ ايرىقشا ءرول اتقاراتىنىن ايتتى. سونىمەن قاتار ەۋرازيالىق ەكونوميكالىق وداق, شانحاي ىنتىماقتاستىق ۇيىمى, تمد جانە ۇجىمدىق قاۋىپسىزدىك تۋرالى شارت ۇيىمى سياقتى حالىقارالىق ۇيىمدار اياسىندا بىرلەسە ءىس-قيمىل جۇرگىزۋدىڭ ماڭىزدىلىعىن اتاپ ءوتتى. مەملەكەت باسشىسى ەلىمىزدىڭ الەۋمەتتىك-ەكونوميكالىق دامۋ ناتيجەلەرىنە توقتالىپ, قازاقستاندا ينۆەستيتسيا تارتۋ ءۇشىن قالىپتاسقان مۇمكىندىكتەر جونىندە ايتتى.
«قازاقستان ەاەو, شىۇ, تمد جانە ۇقشۇ ارنالارىنداعى ءىس-قيمىلعا ەرەكشە ءمان بەرەتىندىگىن بىلەسىزدەر. ەلىمىزدىڭ سىرتقى ساياساتىنداعى وڭىرلىك ىنتىماقتاستىقتى نىعايتۋ ماسەلەلەرىنىڭ ءمانى زور. 2017 جىلدىڭ قورىتىندىسى بويىنشا, قازاقستان وڭ ەكونوميكالىق كورسەتكىشتەرگە قول جەتكىزدى. ەكونوميكالىق جانە ينۆەستيتسيالىق ىقپالداستىقتى نىعايتۋ, شەتەلدىك ارىپتەستەرمەن ىنتىماقتاستىق نەگىزگى باعىتتارىمىزدىڭ ءبىرى. ءبىز ساۋدا-ساتتىق كولەمىن ۇلعايتىپ, ءوندىرىستى وركەندەتۋ ءۇشىن ءتيىمدى ينۆەستيتسيا اكەلۋگە مۇددەلىمىز. 2017 جىلى قازاقستان بيزنەس جۇرگىزۋ جەڭىلدىگى رەيتينگى بويىنشا 190 ەلدىڭ اراسىندا 36-ورىنعا يە بولدى», دەدى نۇرسۇلتان نازارباەۆ.
مەملەكەت باسشىسى سونىمەن قاتار ەكسپو-2017 كورمەسى بارىسىندا جاسىل تەحنولوگيالاردى دامىتۋ جونىندەگى حالىقارالىق ورتالىق پەن ءىت ستارتاپتاردىڭ حالىقارالىق تەحنوپاركى قۇرىلعانىن دا اتاپ ءوتتى. «استانا حالىقارالىق قارجى ورتالىعىنىڭ قىزمەتىن جانداندىرۋ قازاقستاننىڭ باستى باسىمدىقتارىنىڭ ءبىرى. وسىعان وراي سىزدەردە حالىقارالىق قارجى ورتالىعىن دامىتۋعا اتسالىسىپ, ونىڭ يگىلىگىن كورۋگە شاقىرامىز. ءوزارا ءتيىمدى ساۋدا-ەكونوميكالىق ىنتىماقتاستىقتى نىعايتۋ ءۇشىن قازاقستانداعى زور مۇمكىندىكتەردى كەڭىنەن پايدالانۋ قاجەت», دەدى مەملەكەت باسشىسى.
ەلباسى اعىمداعى جىلى ەلىمىزدە بىرقاتار ماڭىزدى حالىقارالىق ءىس-شارالار جوسپارلانىپ وتىرعانىنا توقتالدى. «اتاپ ايتقاندا, استانا ەكونوميكالىق فورۋمى, الەمدىك جانە ءداستۇرلى دىندەر كوشباسشىلارىنىڭ VI سەزى, دۇنيەجۇزىلىك يسلام ەكونوميكالىق فورۋمى وتەدى. وسى باسقوسۋلارعا سىزدەردىڭ ەلدەرىڭىز بەلسەنە قاتىسادى دەپ ويلايمىن», دەدى پرەزيدەنت.
نۇرسۇلتان نازارباەۆ بۇدان ءارى سەنىم گراموتالارىن تاپسىرعان ەلشىلەردىڭ مەملەكەتتەرىنىڭ ءبىزدىڭ ەلمەن قارىم-قاتىناسىنا جەكە-جەكە توقتالىپ, ىنتىماقتاستىق بايلانىسىن باياندادى. ماسەلەن, قازاقستان مەن رەسەي فەدەراتسياسى اراسىندا قالىپتاسقان مەملەكەتارالىق قارىم-قاتىناستىڭ جوعارى دەڭگەيدە ەكەنىن ايتىپ, ىنتىماقتاستىقتى ودان ءارى نىعايتا ءتۇسۋ باعىتى ەكى ەل حالقى تاراپىنان كەڭ قولداۋ تاۋىپ وتىرعانىن اتاپ ءوتتى. «قازاقستاننىڭ رەسەي فەدەراتسياسىمەن قارىم-قاتىناسى مەملەكەتارالىق بايلانىستىڭ ەتالونى سانالادى جانە ستراتەگيالىق سەرىكتەستىك پەن وداقتاستىقتىڭ جارقىن ۇلگىسى رەتىندە قىزمەت ەتەدى. ءبىزدىڭ تىعىز ىنتىماقتاستىعىمىزدىڭ ارقاسىندا ەۋرازيالىق ەكونوميكالىق وداق ينتەگراتسيالىق بىرلەستىگى تابىستى جۇمىس ىستەپ تۇر», دەپ اتاپ ءوتتى پرەزيدەنت.
مەملەكەت باسشىسى مەملەكەتتەر اراسىنداعى ىنتىماقتاستىقتى ودان ءارى دامىتۋعا باعىتتالعان باعدار ەكى حالىقتىڭ دا بارىنشا جوعارى قولداۋىنا يە بولىپ وتىرعاندىعىن باسا ايتتى. «مەن رەسەي پرەزيدەنتى ۆلاديمير ۆلاديميروۆيچ پۋتينمەن دوستىققا نەگىزدەلگەن جەكە قارىم-قاتىناسىمىزدى جوعارى باعالايمىن. ونىڭ تاياۋدا وتكەن سايلاۋداعى جەڭىسى – بۇل رەسەي حالقىنىڭ ەلدى ودان ءارى گۇلدەنۋى, گەوساياسي ءرولىنىڭ نىعايۋى جولىنداعى ءوز كوشباسشىسىنىڭ باعدارىنا دەگەن ەڭ جوعارى كەزەكتى باعاسى, سونىمەن قاتار ونىڭ ەلىنە دەگەن شەكسىز جان-تانىمەن بەرىلۋى دەپ ەسەپتەيمىن», دەدى ەلباسى. قازاقستان رەسەيمەن اراداعى ەكىجاقتى فورماتتاعى جانە حالىقارالىق كۇن ءتارتىبى اياسىنداعى بايلانىستارىن ەكى حالىقتىڭ يگىلىگى ءۇشىن كەڭەيتە بەرۋگە نيەتتى ەكەندىگىن ايتتى.
مەملەكەت باسشىسى نۇرسۇلتان نازارباەۆ وزبەكستان پرەزيدەنتى شاۆكات ميرزيوەۆتىڭ قازاقستان-وزبەكستان قارىم-قاتىناسىن ودان ءارى نىعايتۋعا زور ۇلەس قوسقانىنا توقتالدى. «وزبەكستان رەسپۋبليكاسىمەن ءبىزدى بىرنەشە عاسىرلىق مادەنيەتتەر مەن داستۇرلەر دوستىعىنىڭ دانەكەرى بايلانىستىرىپ تۇر. قازاقستاندىق-وزبەكستاندىق قارىم-قاتىناستىڭ ودان ءارى دامۋىنا وزبەكستاننىڭ قۇرمەتتى پرەزيدەنتى شاۆكات ميرزيوەۆ ۇلكەن ۇلەس قوسۋدا. ول كەلگەننەن كەيىن ءبىز استانا مەن تاشكەنت ىنتىماقتاستىعىنىڭ جاڭا جىلناماسىن اشتىق. سونىمەن قاتار ورتالىق ازيا ەلدەرىنىڭ ىنتىماقتاستىعىن نىعايتۋدا ايتارلىقتاي پروگرەسكە قول جەتكىزدىك», دەدى ەلباسى. مەملەكەت باسشىسى اعىمداعى جىلى بولعان ءوزارا ساپارلار, سونىمەن بىرگە ءتۇرلى حالىقارالىق الاڭدارداعى قارقىندى بايلانىستار ساياسي رۋحتى ايتارلىقتاي نىعايتا تۇسكەنىن باسا ايتتى. «العاش رەت ءوزارا ساۋدا ءوسىمىن 30 پايىزدان استامعا قامتاماسىز ەتتىك. بيىل وزبەكستاننىڭ قازاقستانداعى جىلىنىڭ باستالۋى, كەلەسى جىلى باۋىرلاس وزبەكستاندا قازاقستان جىلىن وتكىزۋ جاڭا جاڭالىقتاردىڭ مەجەسىنە اينالادى جانە ءبىزدىڭ ىنتىماقتاستىعىمىزدىڭ بارلىق سپەكترىنە تىڭ سەرپىن بەرەدى. قازاقستان وزبەكستانمەن كوپجوسپارلى ىنتىماقتاستىقتى ودان ءارى نىعايتۋعا نيەتتى», دەدى نۇرسۇلتان نازارباەۆ.
مەملەكەت باسشىسى, سونداي-اق قازاقستاننىڭ تۇرىكمەنستانمەن كوپجاقتى ىنتىماقتاستىقتى ودان ءارى نىعايتۋعا نيەتتى ەكەنىن ايتتى. «بۇگىندە ورتالىق ازياداعى باۋىرلاس مەملەكەتتەر – قازاقستان مەن تۇرىكمەنستاندى تاتۋ كورشىلىك قاتىناستار بايلانىستىرادى. ەلدەرىمىز اراسىندا سەنىمدى ءارى سىندارلى ديالوگ ورناپ, بارلىق باستى باعىتتار بويىنشا ءوزارا تۇسىنىستىكتىڭ جوعارى دەڭگەيىنە قول جەتكىزىلدى. 2017 جىلدىڭ ءساۋىر ايىنداعى تۇرىكمەنستان پرەزيدەنتى گۋربانگۋلى بەردىمۇحامەدوۆتىڭ استاناعا مەملەكەتتىك ساپارى, مەنىڭ وتكەن جىلدىڭ قىركۇيەگىندەگى اشحابادقا جۇمىس ساپارىم بارلىق باعىتتارداعى مەملەكەتارالىق قارىم-قاتىناس تاريحىمىزدىڭ جاڭا كەزەڭىن اشتى», دەدى ەلباسى. سونىمەن قاتار قازاقستان پرەزيدەنتى ستراتەگيالىق ارىپتەستىك جونىندەگى شارت, قازاقستان مەن تۇرىكمەنستان اراسىنداعى مەملەكەتتىك شەكارالاردى دەماركاتسيالاۋ تۋرالى كەلىسىم سىندى ماڭىزدى تاريحي قۇجاتتارعا قول قويىلۋى ەكىجاقتى قارىم-قاتىناستى ساپالى دەڭگەيگە كوتەرگەنىن اتاپ ءوتتى.
قازاقستان پرەزيدەنتى يتاليا رەسپۋبليكاسىمەن ساۋدا-ەكونوميكالىق بايلانىستاردىڭ دامىپ كەلە جاتقانىنا ەرەكشە توقتالدى. «يتاليا قازاقستاننىڭ ساۋدا سالاسىنداعى ارىپتەستەرىنىڭ ۇزدىك ۇشتىگىنە كىرەدى جانە بۇل كورسەتكىش بويىنشا ەۋرووداق ەلدەرى اراسىندا ءبىرىنشى ورىن الىپ وتىر. سونداي-اق يتاليا – ەلىمىزدىڭ ەكونوميكاسىنا قارجى قۇيىپ وتىرعان ءىرى ينۆەستورلاردىڭ ءبىرى. قازاقستان يتاليامەن جان-جاقتى ىنتىماقتاستىقتى, سونىڭ ىشىندە يننوۆاتسيالار مەن وزىق تەحنولوگيالار سالاسىنداعى بايلانىستاردى ودان ءارى دامىتۋعا نيەتتى», دەدى مەملەكەت باسشىسى.
سوڭىندا نۇرسۇلتان نازارباەۆ ديپلوماتتاردى تاعى دا قۇتتىقتاپ, ەكىجاقتى قارىم-قاتىناستاردى نىعايتۋ جولىنداعى قىزمەتتەرىنە تابىس تىلەدى.
دينارا بىتىك,
«ەگەمەن قازاقستان»