ازەربايجاندا پرەزيدەنت سايلاۋى باستالدى

قازىرگى كەزدە باكۋ قالاسىنداعى سايلاۋ ۋچاسكەلەرىندە داۋىس بەرۋگە كەلگەن تۇرعىنداردىڭ قاراسى كوپ.

ەل باسشىسىن انىقتايتىن شاراعا شەنەۋنىكتەر دە بەلسەندى تۇردە قاتىسىپ جاتىر. ماسەلەن, ەكولوگيا جانە تابيعي رەسۋرستار ءمينيسترى گۋسەين باگيروۆ №7 سايلاۋ ۋچاسكەسىنە كەلىپ داۋىس بەرگەن. سونداي-اق, مەملەكەتتىك قاۋىپسىزدىك قىزمەتىنىڭ باسشىسى, گەنەرال-لەيتەنانت مادات گۋليەۆ تە ءوز تاڭداۋىن جاسادى. پرەزيدەنت كومەكشىسى الي گاسانوۆ تا داۋىس بەرۋ راسىمىنە كەلدى.

ەل تۇرعىندارى كۇنى بويى 5426 تۇراقتى, 215 ۋاقىتشا سايلاۋ ۋچاسكەسى مەن 125 سايلاۋ وكرۋگتەرىندە ءوزى تاڭداعان كانديداتتى قولداپ داۋىس بەرە الادى.

ورتالىق سايلاۋ كوميسسياسى رەسمي سايتىندا سايلاۋ بارىسىن تىكەلەي ەفير ارقىلى تاراتىپ جاتىر. ەلدەگى 119 سايلاۋ ۋچاسكەسىندە ۆەب-كامەرا ورناتىلعان, سونىمەن بىرگە بەس ميلليوننان استام ەلەكتوراتتار بار.

ايتا كەتەرلىگى, پرەزيدەنت سايلاۋىن 894 حالىقارالىق جانە 58 175 جەرگىلىكتى باقىلاۋشى قاداعالاپ وتىر.ورتالىق سايلاۋ كوميسسياسى بەس رەت, 10:00, 12:00, 15:00, 17:00 جانە 19:00-دە شارانىڭ قالاي ءوتىپ جاتقانى تۋرالى مالىمەت تاراتادى. سايلاۋ كەشكى ساعات 19:00-دە اياقتالادى.

اباي وتار,

«ەگەمەن قازاقستان»

باكۋ