شايماردان ساريەۆ اتىنداعى اتىراۋ وبلىستىق كوركەمسۋرەت جانە قولدانبالى-ساندىك ونەر مۋزەيىندە مادەني قۇندىلىقتاردى ناسيحاتتاۋ باعىتىندا شارالار ءجيى ۇيىمداستىرىلادى. ەلباسىنىڭ «رۋحاني جاڭعىرۋ» باعدارلاماسى اياسىندا وتكەن «اسىل مۇرا» اتتى وبلىستىق بايقاۋ-كورمەگە 61 قولونەر شەبەرى قاتىستى.
قولدانبالى-ساندىك ونەردى دامىتۋ, ۇلت مادەنيەتى مەن ونەرىنىڭ باي مۇراسىن, دامۋ كەزەڭدەرىن, ءداستۇرىن, دۇنيەتانىمىن ونەرتانۋ عىلىمىمەن ۇشتاستىرا وتىرىپ, جاس ۇرپاققا تانىستىرۋ, قولونەر تۇرلەرىن ناسيحاتتاپ, ولاردى كۇندەلىكتى قولدانىسقا ەنگىزۋگە مۇمكىندىك جاساۋدى ماقسات ەتكەن بايقاۋدا قازىلار القاسى 256 جۇمىستى باعالادى. ءبۇتىن اعاشتان دومبىرانى ويىپ جاساعان قولونەر شەبەرى مازەن شاكيەۆتىڭ ەڭبەگى جۇلدەلى ءبىرىنشى ورىنعا لايىق دەپ تانىلدى. زەرگەر قايرات شاپاباەۆ پەن سۋرەتشى-قولونەرشى مۇرات راحمەتوۆ ەكىنشى ورىندى يەلەنسە, شەبەر كەڭەس ايتقاليەۆ, زەرگەر شەرۋەن مۇحتار ءۇشىنشى جۇلدەنى ءبولىستى.
– قىلقالامنىڭ قۇدىرەتى مەن تىلسىمىنان سىر ۇقتىرىپ, قالىڭ جۇرتشىلىقتىڭ رۋحاني ورداسىنا اينالعان وبلىستىق شايماردان ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيى قاي كەزەڭدە دە تالانتتاردى تاني ءبىلىپ, ولاردىڭ شىعارماشىلىعىن دامىتۋدا ەلەۋلى ەڭبەك ەتىپ كەلەدى. مۋزەيدە ەلىمىزگە تانىمال سۋرەتشىلەر, قولونەر شەبەرلەرىنىڭ ءتۇرلى كورمەلەرى مەن بايقاۋلارى ۇيىمداستىرىلادى. بۇل بايقاۋ-كورمە دە وڭىردەگى تالانتتى شەبەرلەردىڭ جۇمىستارىن ناسيحاتتاۋدى ماقسات ەتتى, – دەيدى ونەر مۋزەيىنىڭ باسشىسى تولەگەن ورىنباسار ۇلى.
باقىتگۇل باباش, «ەگەمەن قازاقستان»
اتىراۋ