جەكسەنبى كۇنى پرەمەر-ليگا كوماندالارى قازاقستان چەمپيوناتىنىڭ كەزەكتى تۋرىن وتكىزدى. ءار ويىنعا شاققاندا ورتاشا ەسەپپەن 2 گولدان سوعىلعان ەكەن! ءبىرىنشى تۋردا 14, ەكىنشى تۋردا 12 گول سوعىلعان ەدى. ال بۇل تۋردا 11 دوپ قاقپا تورىنەن تابىلدى.
ءۇشىنشى تۋرداعى ايشىقتى جەڭىس استانادا تىركەلدى. بىلتىرعى ەل چەمپيونى – «استانا» ءوز الاڭىندا «قايسار» كومانداسىن قابىلداپ, تۆۋماسي مەن مۇرتازاەۆتىڭ گولى ارقاسىندا جەڭىسكە جەتتى. ءسويتىپ تۋرنير كەستەسىندە 9 ۇپايمەن كوش باستاپ تۇر. «استانانىڭ» ءىزىن الا شىمكەنتتىڭ «ورداباسى» كومانداسى كەلەدى. وتكەن تۋردا «ورداباسى» اتىراۋعا قوناققا بارىپ, 1:0 ەسەبىمەن جەرگىلىكتى كلۋبتان باسىم ءتۇستى. شىمكەنتتىڭ كومانداسىندا دا 9 ۇپاي بار, بىراق سوعىلعان گولدىڭ «استانادان» كەمدىگىنە بايلانىستى كەستەدە ەكىنشى ورىندا تۇر.
بۇل تۋردىڭ سەنساتسيالىق ويىنى ءبىرىنشى تۋردا جەڭىلىپ, ەكىنشى تۋردا تەڭ ويناعان «اقجايىق» پەن ءəلى جەڭىلىستىڭ اششى ءدəمىن تاتپاعان «ەرتىس» اراسىندا وتكەن بولاتىن. تارتىستى ماتچتا ويىن تاعدىرىن جالعىز گول شەشىپ, «اقجايىق» تۋرنير كەستەسىندەگى جاعدايىن ءبىرشاما جاقسارتىپ الدى. چەمپيونات باستالعالى جەڭىلىپ كورمەگەن «قايرات» بۇل تۋردا «اقتوبەمەن» 1:1 ەسەبىمەن تەڭ ويناپ, ەكى ۇپايدان ايىرىلدى. Əزىرگە الماتىنىڭ كومانداسى ءۇشىنشى ورىندا كەلەدى.
كوش سوڭىندا كەلە جاتقان «قىزىلجار» ءوز الاڭىندا 1:2 ەسەبىمەن «توبىلدان» جەڭىلسە, «جەتىسۋ» استانادا «شاحتەرمەن» تەڭ وينادى. ەسەپ – 1:1.
ءۇشىنشى تۋردىڭ ويىندارى مىناداي نəتيجەلەرمەن اياقتالدى:
«اقتوبە – «قايرات» 1:1 (1:1), باتو شەلدون, 11 ء(وز قاقپاسىنا) (1:0), يساەل دا سيلۆا باربوسا, 18 (1:1). «اقجايىق» – «ەرتىس» 1:0 (0:0), يۆان انتيپوۆ, 81 (1:0). «استانا» – «قايسار» 2:0 (2:0), پاتريك تۆۋماسي, 9 (1:0), رومان مۇرتازاەۆ 15 (2:0). «اتىراۋ» – «ورداباسى» 0:1 (0:0), ابدۋللاي دياكاتە پەنالتيدەن 71 (0:1). «شاحتەر» – «جەتىسۋ» 1:1 (1:0), سەرگەي شافف, 45 (1:0), ولەگ حرومتسوۆ, 80 (1:1). «قىزىلجار» – «توبىل» 1:2 (1:0), تيمۋر مۋلدينوۆ, 23 (1:0), تاڭات نوسەرباەۆ, 53 (1:1), ماكسيم فەدين, 79 (1:2).
ءۇشىنشى تۋردىڭ قىسقاشا ستاتيستيكالىق ناتيجەلەرى مىناداي:
ءۇشىنشى تۋردىڭ التى ويىنىن تاماشالاۋعا – 14 900 كورەرمەن كەلدى. ەكىنشى تۋردا 20 900 جانكۇيەر كەلگەن-ءدى. ەڭ كوپ جانكۇيەر «قىزىلجار»- «توبىل» ماتچىندا جينالدى.
6 000 جانكۇيەر. ال ەڭ از جانكۇيەر «شاحتەر» – «جەتىسۋ» ويىنىنا كەلدى. 700 ادام.
ءۇشىنشى تۋردىڭ التى ويىنىندا – 11 گول سوعىلدى. ەڭ كوپ گول «قىزىلجار» – «توبىل» ماتچىندا سوعىلدى. 3 گول. ەڭ از گول «اتىراۋ» – «ورداباسى» جانە «اقجايىق» – «ەرتىس» ويىنىندا سوعىلدى. 1 گول. ەكى ماتچتا تەڭ ەسەپ تىركەلىپ, ەكەۋى دە 1:1 ەسەبىمەن اياقتالدى.
ءۇشىنشى تۋردىڭ التى ويىنىندا فۋتبولشىلارعا – 19 سارى قاعاز كورسەتىلدى. ەڭ كوپ سارى قاعازدى – «ورداباسى», «قايرات» جانە «قايسار» كومانداسىنىڭ فۋتبولشىلارى الدى. ءار كومانداعا 3 ەسكەرتۋ جاسالدى.
ءۇشىنشى تۋردان كەيىن – بەس فۋتبولشى 2 گولمەن مەرگەندەر كوشىن باستادى. ولار: ابدۋللاي دياكاتە («ورداباسى»), يساەل دا سيلۆا باربوسا («قايرات»), اسلانبەك كاكىموۆ («اقتوبە») جانە تيمۋر مۋلدينوۆ («قىزىلجار»).
ءسəۋىردىڭ 16-سى كۇنى وتەتىن ءتورتىنشى تۋردا مىنا كوماندالار ءوزارا وينايدى: «جەتىسۋ» – «قايسار», «ەرتىس» – «استانا», «قايرات» – «اقجايىق», «ورداباسى» – «اقتوبە», «توبىل» – «اتىراۋ», «شاحتەر» – «قىزىلجار».
ءالي بيتورە, «ەگەمەن قازاقستان»