ورتكە قارسى قاۋىپسىزدىك سالاسىنداعى بۇزۋشىلىقتىڭ الدىن الۋ ماقساتىندا باس پروكۋراتۋرا ورتكە قارسى قىزمەت ورگاندارىنا بارلىق رەسپۋبليكا بويىنشا ساۋدا نىساندارىن جوسپاردان تىس تەكسەرۋدى ۇيىمداستىرۋدى تاپسىردى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
ەكى اي ىشىندە 1,5 مىڭ شارشى مەتر جانە ودان دا ۇلكەن قۇرىلىس اۋدانى بار 1151 نىساندى قامتۋ جوسپارلانعان.
ساۋدا نىساندارىنان باسقا, پروكۋراتۋرانىڭ تالابى بويىنشا مەكتەپكە دەيىنگى تاربيە مەن وقۋدى جۇزەگە اسىراتىن جەكە مەكەمەلەر, سونداي-اق جالپى ءبىلىم بەرەتىن وقۋ ورىندارى تەكسەرىلەدى.
اتالعان ءىس-شارالاردىڭ ماقساتى – ورتكە قارسى قاۋىپسىزدىك تالاپتارىن ورەسكەل بۇزىپ وتىرعان نىسانداردىڭ قىزمەت جولىن كەسۋ, وسىنداي ءىس-ارەكەتتەرگە ىقپال ەتەتىن سەبەپتەردى جويۋ.
ورتكە قارسى قىزمەت ورگاندارى وسى جىلدىڭ ءبىرىنشى جارتىجىلدىعىنا جوسپارلانعان ساۋدا ورتالىقتارىن عانا تەكسەرە الادى.
ۋاكىلەتتى مەملەكەتتىك ورگاندارعا ادامنىڭ ءومىرى مەن دەنساۋلىعىنا زيان كەلتىرۋ قاۋپى بولعان كەزدە جوسپاردان تىس تەكسەرىس جۇرگىزۋدى تاپسىرۋ قۇقىعى پروكۋراتۋرا ورگاندارىنا تيەسىلى.