جاڭا كاسىپورىنداردا 3,4 مىڭ جۇمىس قۇرىلادى. بيىل ەكسپورتقا باعىتتالعان تاعى 4 ءىرى ونەركاسىپ ءوز جۇمىسىن باستايدى. بۇل تۋرالى قر پرەمەر-ءمينيسترى باقىتجان ساعىنتاەۆ جانە ۇكىمەت مۇشەلەرىنە "ارالتۇز" اق جۇمىسىمەن تانىسۋ بارىسىندا وبلىس اكىمىنىڭ ورىنباسارى ەۆگەني كيم مالىمدەدى.
بۇل "حايسي دەشەن سودا سالاسى" قىتايلىق كومپانياسىمەن بىرلەسكەن كالتسيلەندىرىلگەن سودا شىعاراتىن زاۋىت, تاۋ-كەن كومبيناتىنىڭ قۇرىلىسى جانە رەسەيلىك ينۆەستورلارمەن بىرلەسە تۇز ءوندىرۋ زاۋىتى, سونداي-اق, "بايقوڭىر" اكك قاتىسۋىمەن جىلىنا 1500 توننا ءونىم وندىرەتىن قۇس فابريكاسى جانە "بالاساۋىسقاندىق" ۆانادي كەن ورنىندا ۆانادي بەس وكيسىنىڭ ءوندىرىسىن ايىنا 50 تونناعا دەيىن ۇلعايتۋ.
"وسى جىلى ءبىز 3 مىڭنان استام جۇمىس ورنىن اشۋعا مۇمكىندىك بەرەتىن 301 ملرد.تەڭگەنىڭ 5 ينۆەستيتسيالىق جوباسىن ىسكە اسىرۋدى جوسپارلاپ وتىرمىز" - دەپ مالىمدەدى وبلىس اكىمىنىڭ ورىنباسارى ەۆگەني كيم.
ايتا كەتەيىك, 2017 جىلى امموني مەتاۆاناداتى ەكسپورتتالاتىن ەلدەر قاتارىنا ۇلىبريتانيا دا قوسىلدى, وتكەن جىلى كاسىپورىن ەكسپورت كولەمىن 3,2 ەسەگە ۇلعايتتى. سونىمەن قاتار, جىل سوڭىنا دەيىن وڭىردە تاعى 4 جوبا ىسكە قوسىلادى.
"2018 جىلى 102 ملرد.تەڭگەنىڭ 4 جوباسى ىسكە قوسۋدى مەجەلەپ وتىرمىز. 650 جۇمىس ورنى اشىلادى.بۇل موليبدەن ءۇش وكيسى ءوندىرىسى, تامپوناجدى تسەمەنت جانە شىنى شىعاراتىن زاۋىتتار, سونداي-اق, بالىق وڭدەۋ تسەحى. بۇل ەلىمىزدەگى ءىرى ءوندىرىس ورنىدارى, ەكسپورتقا بەيىمدەلگەن جانە جاڭا تەحنولوگيالاردى قولداناتىنكاسىپورىندار بولادى", - دەدى ەۆگەني كيم.
سونىمەن قاتار, قىتاي, يران, تۇركيا جانە تاتارستان ەلدەرىندەگى شەتەلدىك ارىپتەستەرمەن 9 باستامالى ينۆەستيتسيالىق جوبانى بىرلەسە جۇزەگە اسىرۋ جوسپارلانۋدا.
"قىتاي تاراپىمەن 5 جوبانى: كۇن پانەلدەرى, سمارتفوندار مەن پلانشەتتەرگە ارنالعان اسا جۇقا اينەك ءوندىرىسى; كۇن جانە سۋ ەلەكترستانتسيالارىنىڭ قۇرىلىسى; تۇرمىستىق قاتتى قالدىقتاردى وڭدەيتىن جانە جارىلعىش زاتتار شىعاراتىن زاۋىت سالۋ جوسپارلانۋدا. تۇرىك ەلىمەن 3 جوبا, ونىڭ ىشىندە "يۋلدىزلار سسس حولدينگ" كومپانياسىمەن قۋاتتىلىعى 138 مۆت بولاتىن گاز پورشەندى ەلەكتر ستانتسيا مەن كەراميكالىق پليتا شىعاراتىن زاۋىت قۇرىلىسى, سونداي-اق, تۇركيالىق "Tat" كومپانياسىمەن بىرىگىپ تومات پاستاسىن ءوندىرۋدى جۇزەگە اسىرامىز. ال, يراندىق ينۆەستورلارمەن قۇنى شامامەن 1 ملرد.تەڭگە بولاتىن ەت كومبيناتىنىڭ قۇرىلىسىن جۇرگىزۋ ماسەلەسى قارالىپ جاتىر", - دەپ اتاپ ءوتتى وبلىس اكىمىنىڭ ورىنباسارى ەۆگەني كيم.
ەستەرىڭىزگە سالا كەتسەك, قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ باستاعان ۇكىمەتتىك دەلەگاتسيا قىزىلوردا وبلىسىنا جۇمىس ساپارىمەن كەلدى. دەلەگاتسيا قۇرامىندا قر پرەمەر-ءمينيسترى كەڭسەسىنىڭ باسشىسى, ينۆەستيتسيا جانە دامۋ, ۇلتتىق ەكونوميكا, اقپارات جانە كوممۋنيكاتسيالار مينيسترلەرى, سونداي-اق, ورتالىق مەملەكەتتىك ورگانداردىڭ, ۇلتتىق كومپانيالاردىڭ جانە دامۋ ينستيتۋتتارىنىڭ باسشىلارى بار.
ساپار بارىسىندا باقىتجان ساعىنتاەۆ پەن دەلەگاتسيا مۇشەلەرى وبلىس اكتيۆىمەن جانە كاسىپكەرلەرمەن, سونداي-اق الەۋمەتتىك سالا وكىلدەرىمەن كەزدەستى. «قاراوزەك» گاز كومپرەسسورلىق ستانتسياسىندا بولىپ, ارال اۋدانىنداعى بالىق وڭدەۋ زاۋىتى مەن «ارالتۇز» اق جۇمىسىن كوردى. مۇندا قوعام وكىلدەرىمەن باسقوسۋ ءوتىپ, سولتۇستىك ارال جوباسىن جۇزەگە اسىرۋ, سۋارمالى جەرلەردى جاقسارتۋ, قر پرەزيدەنتىنىڭ 5 الەۋمەتتىك باستاماسى اياسىندا شاعىن نەسيەلەندىرۋ ءىسىن جەتىلدىرۋ ماسەلەلەرى تالقىلاندى. سونداي-اق, بايقوڭىر قالاسى مەن عارىش ايلاعىن دامىتۋ بارىسىمەن تانىسادى.