سەمەيدەگى ەرتىس وزەنىنىڭ سۋ دەڭگەيى كوتەرىلىپ كەتتى.
وزەننىڭ سەميپالاتينكا دەپ اتالاتىن اعىسىنىڭ تۇسىنداعى پولكوۆنيچي ارالى مەن شىعىس كەنتى, ميرنىي اۋىلى تۇرعىندارىن قۇتقارۋ جۇمىستارى قازىردە شۇعىل تۇردە ءجۇرىپ جاتىر. قالا اكىمى ەرماك ءسالىموۆ, اكىم ورىنباسارى نيكولاي ۋشاكوۆتار قر ىشكى ىستەر مينيسترلىگىنىڭ ۆيتسە-ءمينيسترى يۋري ۆيكتوروۆيچ يلين, شقو توتەنشە جاعدايلار دەپارتامەنتىنىڭ وكىلدەرى, ەرتىس باسسەينى ينسپەكتسياسىنىڭ ماماندارىمەن بىرگە وقيعا بولعان جەردى تىكۇشاقپەن دەرەۋ شولىپ ءوتتى. ولاردىڭ شەشىمىنشە ەرتىستىڭ سۋ دەڭگەيىن تومەندەتۋ ءۇشىن مۇزدى جارۋ تاسىلدەرى قولدانىلماق.
ال سۋ باسىپ كەتكەن جەرلەرگە ارنايى باقىلاۋ بەكەتتەرى ورناتىلدى. پولكوۆنيچي ارالىنىڭ تۇرعىندارى قوناق ۇيلەرگە ورنالاستىرىلۋدا. توتەنشە جاعداي قىزمەتىنەن 20 ادام ءتۇرلى بوگەتتەر قويىپ, سۋ اعىسىن بۇرىپ, تۇرعىنداردى كوشىرۋدە. تۇرعىندارعا قۇندى قۇجاتتارى مەن باعالى زاتتارىنا اباي بولۋدى ەسكەرتىپ جاتىر.
«ازىرشە وقيعانى باقىلاۋدا ۇستاپ وتىرمىز, ءبىر جاعدايلار بولىپ جاتسا, حالىققا كومەك كورسەتۋگە, ولاردى قۇتقارۋعا توتەنشە جاعداي باسقارماسىنىڭ ماماندارى ساقاداي ساي وتىر», دەدى سەمەي قالاسى اكىمدىگىنىڭ ىشكى ساياسات ءبولىمىنىڭ مامانى مەيىرجان امانگەلدى.
راۋشان نۇعمانبەكوۆا,
سۋرەتتەر اۆتوردىكى.
سەمەي