قىتايدىڭ سولتۇستىك-باتىسىندا حالال ءسوزىنىڭ ارابشا جازىلۋىنا تىيىم سالىندى. بۇل تۋرالى Global Times حابارلادى.
باسىلىمنىڭ حابارلاۋىنشا مۇنداي شەشىم نينسيا-حۋەيسك اۆتونومدى ايماعىندا قابىلدانعان. ۋچجۋن جانە ينچۋان وكرۋگىنداعى مەيرامحانالار مەن دۇكەندەر اراب تىلىندەگى حالال ءسوزىن الىپ تاستاۋعا مىندەتتەلدى. ەندى بۇل ءسوز يەروگليف جانە پينين ارقىلى جازىلماق. وسىعان بايلانىستى قازىر سۋپەرماركەتتەردە ارابشا حالال ءسوزى جازىلعان تاۋارلار سورەلەردەن ۋاقىتشا الىنىپ تاستالدى.
ايتا كەتەرلىك تاعى ءبىر جايت, ايماقتا مۇنداي وزگەرىستەر وسىعان دەيىن دە بولىپتى. ناۋرىز ايىندا ينچۋاندا اراب ارحيتەكتۋراسى مەن قىتاي ءداستۇرى ۇيلەسكەن كوشەگە جوندەۋ جۇمىستارى جۇرگىزىلگەن. ەندى جوسپار بويىنشا ونىڭ ءبارى ءداستۇرلى قىتاي ۇلگىسىنە وزگەرتىلمەك. بۇل اۋماق 2016 جىلى اراب الەمى مەن قىتاي اراسىنداعى جاقسى قارىم-قاتىناستاردى كورسەتۋ ءۇشىن قۇرىلعان ەدى.
ساراپشىلاردىڭ ايتۋىنشا قىتاي قوعامى ارابيزاتسيالاۋ ىسىنە, ياعني ەلدەگى كەيبىر مەشىتتەرگە جانە يسلاممەن بايلانىستى باسقا دا ماسەلەلەرگە ساق بولۋ كەرەك. ال ماماندار دىنگە قاتتى ءمان بەرۋدىڭ قاجەتى جوق ەكەنىن ايتادى. دەگەنمەن جاڭا شارالار قىتاي زاڭىنا ەش قارسىلىق كەلتىرمەيتىنىن دە اتاپ ءوتتى.
وتكەن جىلدىڭ شىلدە ايىندا قىتايدا حالال تاعامداردى جەتكىزۋشى Meituan قوسىمشاسى جەرگىلىكتى تۇرعىندار اراسىندا قاتتى سىنعا ۇشىرادى. كومپانيا ونىمدەردىڭ حالال ەكەنىن دالەلدەۋ ماقساتىندا تاپسىرىستاردى جەكە بۋمالار مەن كونتەينەرلەردە جەتكىزۋگە ۋادە بەردى. دەگەنمەن يسلام جولىن ۇستانبايتىن تۇتىنۋشىلار كومپانيانىڭ مۇنداي ارەكەتىن كەمسىتۋشىلىك رەتىندە قابىلدادى.
حالال دەپ يسلام ءدىنىنىڭ كوزقاراسىنا ساي ازىرلەنگەن تاعامداردى اتايدى. مۇسىلماندارعا دوڭىزدىڭ, جىرتقىش اڭداردىڭ, ت.ب. ەتىن جەۋگە تىيىم سالىنعان.