ورتالىق كوممۋنيكاتسيالار قىزمەتىندە قر ترانسپورتتىق-لوگيستيكالىق ينفراقۇرىلىمىن قولدانۋدىڭ تيىمدىلىگىن ارتتىرۋ تۋرالى ءباسپاسوز كونفەرەنتسياسى ءوتتى.
قاتىسۋشىلار ترانزيتتىك تاسىمالدىڭ دامۋىنداعى كەدەرگىلەر مەن پەرسپەكتيۆالارى, سونىمەن قاتار لوگيستيكا سالاسىندا جاڭا تەحنولوگيالاردى پايدالانۋ جايىندا ءسوز قوزعادى. ساراپشىلىق كەزدەسۋدىڭ مودەراتورى, قوعام قايراتكەرى مۇرات ابەنوۆ ايتقانداي, 2013 جىلى قىتايدىڭ باستاماسىمەن باستالعان «جىبەك جولى ەكونوميكالىق بەلدەۋى» «نۇرلى جول» مەملەكەتتىك باعدارلاماسى بويىنشا ينتەرفەيسى قازاقستاننىڭ اۋماعى ارقىلى ترانزيتتىك ترافيكتىڭ ءوسۋ ستراتەگياسىن جۇزەگە اسىرۋدا جانە قوسىمشا سينەرگيانى قامتاماسىز ەتتى.
ءوز كەزەگىندە, «ترانس-LOGISTICS قازاقستان» ترانسپورتتىق ىسكەري جۋرنالىنىڭ باس-رەداكتورى جاننا يسينگارينا كولىك سەكتورىندا قازاقستاندىق ىسكەري سەرىكتەستەرگە دە, جۇرتشىلىققا دا كەڭ اۋقىمدى وزگەرىستەردى جەتكىزۋ وتە ماڭىزدى ەكەنىن اتاپ ءوتتى. «جانە بۇل قازاقستاننىڭ كولىكتىك-لوگيستيكالىق كەشەنىن اقپاراتتىق سۇيەمەلدەۋگە مامانداندىرىلعان «TLK Media» كوممۋنيكاتسيالىق كومپانياسىنىڭ العا قويعان مىندەتى», دەپ اتاپ ءوتتى ول.
«قازاقستان تەمىر جولى» ۇلتتىق كومپانياسى» اق-نىڭ ۆيتسە-پرەزيدەنتى سانجار ەلۋباەۆ سوڭعى جىلدارى كولىكتىك-لوگيستيكالىق اكتيۆتەردى جاڭارتۋعا اۋقىمدى ينۆەستيتسيالار جىبەرىلگەنىن جەتكىزدى.
«مىسالى, 2 500 جاڭا تەمىرجول جەلىسى سالىندى, جىلجىمالى قۇرام, تەرمينال جانە پورت ينفراقۇرىلىمدارى جاڭارتىلدى. كاسپي ارقىلى مۋلتيمودالدى تاسىمالداۋلاردىڭ جوعارى الەۋەتىن جۇزەگە اسىرۋ ءۇشىن اقتاۋ جانە قۇرىق پورتتارى دامىپ كەلەدى, جۇك اعىنىن شوعىرلاندىرۋ ءۇشىن نەگىزگى تۇيىندەردە كولىك جانە لوگيستيكالىق ورتالىقتار جەلىسى قۇرىلۋدا», دەدى ول.
قازاقستاننىڭ «KAZLOGISTICS» كولىك قىزمەتكەرلەرى وداعىنىڭ باس ديرەكتورى قانات الماعامبەتوۆ كولىكتىك قىزمەت كورسەتەتىن كاسىپكەرلەردىڭ پروبلەمالىق ماسەلەلەرىن شەشۋدىڭ وڭ ءۇردىسى بار دەدى.
«وتكەن جىلى «اتامەكەن» ۇكپ» مەن «قتج» ۇك» اق بىرگە كولىكتىك-لوگيستيكالىق سالانى دامىتۋ ءۇشىن جول كارتاسىنىڭ شەڭبەرىندە كەدەرگىلەردى انىقتاۋ جانە جويۋ بويىنشا جۇمىستار جۇرگىزدى. اتاپ ايتقاندا, قازاقستاندىق ۆاگونداردى پايدالانۋدىڭ ۇلەسىن وتاندىق تاۋارلاردى تاسىمالداۋ ءۇشىن 90 پايىزعا دەيىن ارتتىرۋ جونىندە شارالار قابىلداندى», دەدى «KAZLOGISTICS» كولىك قىزمەتكەرلەرى وداعىنىڭ باس ديرەكتورى.
راۋان قايدار, «ەگەمەن قازاقستان»