«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ارنايى ساپارمەن ماڭعىستاۋ وبلىسىنا كەلدى. ساپار بارىسىندا ول ناۋرىز مەيرامىنا وراي اقتاۋ قالاسىندا ۇيىمداستىرىلعان ءوڭىردىڭ باستى مەرەكەلىك ءىس-شاراسىنا قاتىسىپ, ۇلىستىڭ ۇلى كۇنىن جەرگىلىكتى حالىقپەن بىرگە قارسى الدى, دەپ حابارلايدى پارتيانىڭ ءباسپاسوز قىزمەتى.
سونداي-اق, پارتيانىڭ وبلىستىق اكتيۆىمەن كەزدەسىپ, ماڭعىستاۋلىق نۇروتاندىقتارمەن پرەزيدەنتتىڭ بەس الەۋمەتتىك باستاماسىن كەڭىنەن تالقىلادى.بيىل اقتاۋلىقتار ناۋرىز مەيرامىن تەڭىز جاعالاۋىندا تويلادى. الاڭعا اق شاڭقاي كيىز ۇيلەر تىگىلىپ, ۇلتتىق قۇندىلىقتارىمىز دارىپتەلدى. كۇمبىرلەگەن كۇي مەن «قۇلاقتان كىرىپ, بويدى الار» اسەم اننەن شاشۋ شاشىلدى. ءار جەردە ۇلتتىق سپورت تۇرلەرىنەن سايىستار ۇيىمداستىرىلىپ, حالىق ارقا-جارقا بولىپ, مارە-سارە كۇيگە بولەندى. بۇل كورىنىستەر ناۋرىزدىڭ جالپىحالىقتىق سيپاتقا يە بولعانىنىڭ ايقىن ايعاعى.
ماۋلەن اشىمباەۆ وبلىس اكىمى ەرالى توعجانوۆپەن بىرگە اتالعان مەرەكەلىك ءىس-شاراعا ارنايى قاتىستى. ماڭعىستاۋلىقتاردى جانە بارشا قازاقستان حالقىن ناۋرىز مەيرامىمەن قۇتتىقتاعان پارتيا توراعاسىنىڭ ءبىرىنشى ورىنباسارى حالقىمىز ەجەلدەن بۇل كۇندى جاڭارۋ مەن جاسارۋدىڭ باستاۋى, بەرەكە مەن بىرلىكتىڭ ارقاۋى دەپ بىلەتىنىن ايتتى.
– اتا-بابامىز ءاز-ناۋرىزدى قاشاندا ەڭسەسى بيىك ەلدىكتىڭ, ىرگەسى سوگىلمەس بىرلىكتىڭ مەرەكەسى رەتىندە اتاپ ءوتىپ كەلەدى. حالقىمىزدى ورتاق مۇددەگە, بەرەكە-بىرلىككە, ىنتىماققا ۇيىستىراتىن بۇل مەيرام بەيبىتشىلىك پەن كەلىسىمنىڭ قازاقستاندىق ۇلگىسىنىڭ جارقىن كورىنىسى, – دەدى ماۋلەن اشىمباەۆ.
پارتيا توراعاسىنىڭ ءبىرىنشى ورىنباسارى كەزىندەگى سولاقاي ساياساتتىڭ سالدارىنان ۇزاق جىل بويى ءتول جاڭا جىلىمىزدى لايىقتى دەڭگەيدە تويلاي الماي كەلگەنىمىزگە دە توقتالىپ ءوتتى. ونىڭ ايتۋىنشا, ءتۇپ-تامىرىمىزعا قان جۇگىرتكەن تاۋەلسىزدىگىمىزدىڭ ارقاسىندا ۇلتتىق قۇندىلىقتارىمىز ورتامىزعا قايتا ورالىپ, بۇل كۇن بۇرىنعى بيىگىنە كوتەرىلدى. ناتيجەسىندە ناۋرىز مەملەكەتتىك مەرەكە رەتىندە جاريالانىپ, جالپىحالىقتىق مەيرامعا اينالدى. وسىناۋ ۇلىق مەيرامدى باق قونىپ, قۇت دارىعان كيەلى ماڭعىستاۋ جەرىندە قارسى الۋىنىڭ تەرەڭ ءمانى بار ەكەنىنە نازار اۋدارعان ماۋلەن اشىمباەۆ:
– ماڭعىستاۋ – بۇكىل ەلىمىز ءۇشىن قاستەرلى دە قاسيەتتى مەكەن. ناۋرىزدى تويلاۋ دا وسى باتىس وڭىرلەردەن باستالاتىنىن بىلەمىز. بارشامىز «امال», «كورىسۋ» مەرەكەلەرىن ناۋرىزدىڭ باسى رەتىندە قابىلدايمىز. بۇگىندە «امال» مەرەكەسىن تەك باتىس وڭىرلەرىمىزدە عانا ەمەس, ەلىمىزدىڭ وزگە دە وبلىستارىندا كەڭىنەن اتاپ ءوتۋ ءۇردىسى بايقالادى. بۇل ءبىزدىڭ رۋحاني بىرلىگىمىزدىڭ ايعاعى, – دەدى.
شىن مانىندە ناۋرىزدىڭ باستاۋى سانالاتىن «امال» مەرەكەسى ءدال وسى ولكەدەن تامىر جاياتىنى بارشاعا بەلگىلى. ونىڭ ۇستىنە اۋليەلى مەكەن ماڭعىستاۋدىڭ حالقىمىز ءۇشىن الار ورنى دا ەرەكشە. وڭىردە بەكەت اتا, شوپان اتا, قارامان اتا, ماسات اتا, شاقپاق اتا, سۇلتان ءۇپى سياقتى جەراستى مەشىتتەرى بار. قويناۋىنا عاسىرلار سىرىن جاسىرعان كەنتى بابا قورىمى دا اسىل مۇرالارىمىزدىڭ ءبىرى. تابيعات انانىڭ ءوزى تارتۋ ەتكەن تىلسىمعا تولى ساۋرا سايى, قاراقيا ويپاتى, تامشالى كولى جانە شەرقالا مەن وتپان تاۋ دا كيەلى مەكەنگە كورىك بەرىپ تۇرعان قۇندى جادىگەرلەرىمىز. وسى تۇرعىدان كەلگەندە ماڭعىستاۋ وبلىسىنىڭ ۇلتتىق قۇندىلىقتاردى ناسيحاتتاۋدا ماڭىزى زور.
– اتا-بابالارىمىزدىڭ ەجەلدەن كەلە جاتقان سالت-ءداستۇرىن دارىپتەپ, ۇلتتىق قۇندىلىقتارىمىزدى ناسيحاتتاۋدا ماڭعىستاۋلىقتاردىڭ ءرولى ەرەكشە. ەلباسى ايتقان ۇلتتىق كودتى ساقتاۋدا «كورىسۋ كۇنى» سياقتى مەرەكەلەردىڭ دە ماڭىزى زور. سوندىقتان ۇلىستىڭ ۇلى كۇنىندە تاريح تۇنعان ولكەگە ادەيىلەپ كەلىپ, جاڭا جىلدى ماڭعىستاۋلىق اعايىنمەن بىرگە قارسى الۋدى ءجون دەپ شەشتىم, – دەدى ماۋلەن اشىمباەۆ.
سونداي-اق, «نۇر وتان» پارتياسى توراعاسىنىڭ ءبىرىنشى ورىنباسارى جەرگىلىكتى تۇرعىندارمەن, ارداگەرلەرمەن, ءوڭىردىڭ قۇرمەتتى ازاماتتارىمەن جانە قازاقستان حالقى اسسامبلەياسىنىڭ وكىلدەرىمەن كەزدەسىپ, ناۋرىزدىڭ ادامزاتتىڭ اسىل قۇندىلىقتارى دارىپتەلەتىن مەيرام ەكەنىن ايتتى. الاڭعا تىگىلگەن مەرەكەلىك كيىز ۇيلەرگە ارنايى باس سۇعىپ, ناۋرىز كوجەدەن ءدام تاتتى. « ۇلىس كۇنى – ۇلى كوش» اتتى كەرۋەن شەرۋى مەن ۇلتتىق تاعامدارىمىزدى ناسيحاتتايتىن ءتۇرلى جارمەڭكەلەردى تاماشالادى.
جالپى ماڭعىستاۋ قاشاندا تىڭ باستامالارىمەن ەرەكشەلەنگەن ءوڭىر. بيىل دا ەلباسىمىزدىڭ بەس الەۋمەتتىك باستاماسىن جۇزەگە اسىرۋ ماقساتىندا قارقىندى جۇمىستار جۇرگىزۋدە. بۇل جونىندە وبلىس اكىمى ەرالى توعجانوۆ: «ەلباسىنىڭ بەس الەۋمەتتىك باعىتىنىڭ ءبىرى ءار قازاقستاندىق وتباسىنىڭ باسپانالى بولۋىن كوزدەيدى. وتكەن جىلدىڭ وزىندە وبلىسىمىزدا 7 مىڭ وتباسى باسپانامەن قامتىلدى. بيىل جاڭا باعدارلاما ارقىلى بۇل كورسەتكىش ەسەلەنە تۇسەتىنى انىق. وسى ماقساتتا ءبىز ناۋرىزدىڭ العاشقى كۇنى وبلىسىمىزدا «اسار – جومارت جۇرەك» اكتسياسىن جاريالادىق. اكتسيا بارىسىندا 25 ملن. تەڭگە كولەمىندە قاراجات جينالىپ, 3500 وتباسىعا كومەك كورسەتىلدى», – دەدى.
ماۋلەن اشىمباەۆ پەن ەرالى توعجانوۆ اتالعان اكتسيانىڭ شاپاعاتىن كورىپ, باسپانالى بولعان كوپ بالالى انا, «كۇمىس القا» يەگەرى, ءىى توپتاعى مۇگەدەك مونشاق جولماعامبەتوۆانىڭ شاڭىراعىنا ارنايى بارىپ, مەرەكەمەن قۇتتىقتادى.
پرەزيدەنتتىڭ بەس الەۋمەتتىك باستاماسىن جۇزەگە اسىرۋ ءۇشىن ماڭعىستاۋلىقتاردىڭ تاعى ءبىر تىڭ جوبانى قولعا العانىن ايتا كەتەيىك. ول – شاعىن نەسيە كولەمىن كوبەيتۋ باستاماسىنا وراي كاسىپكەرلەرگە 1 پايىزبەن نەسيە الۋعا مۇمكىندىك بەرەتىن «نۇر-كاپيتال» جوباسى. سول ارقىلى شاعىن جانە ورتا بيزنەستىڭ جالپى ايماقتىق ونىمگە قوساتىن ۇلەسىن نەگىزگى كولەمنىڭ 50 پايىزىنان كەم بولماۋى قامتاماسىز ەتىلمەك.
سونىمەن قاتار ساپار بارىسىندا پارتيا توراعاسىنىڭ ءبىرىنشى ورىنباسارى «نۇر وتاننىڭ» وبلىستىق اكتيۆىمەن كەزدەستى. وندا پارتيا قىزمەتىن جاڭعىرتۋ جانە پرەزيدەنتتىڭ بەس الەۋمەتتىك باستاماسىن جۇزەگە اسىرۋعا نۇروتاندىقتاردىڭ بەلسەنە قاتىسۋ ماسەلەسى كەڭىنەن ءسوز بولدى. ەلباسى, پارتيا توراعاسى نۇرسۇلتان ءابىش ۇلى نازارباەۆتىڭ پارتيا قىزمەتىن جاڭعىرتۋ جونىندە ناقتى تاپسىرما بەرگەنىن ايتقان ماۋلەن اشىمباەۆ بۇل مىندەتتەردى ءتيىمدى ءارى مەرزىمىندە ورىنداۋ ءۇشىن الداعى ۋاقىتتا بىرقاتار ناقتى ىستەردى قولعا الۋ كەرەكتىگىنە ەرەكشە نازار اۋداردى.
اتاپ ايتقاندا, «نۇر وتاننىڭ» ەشقانداي دا مينيسترلىك نە اتقارۋشى ورگان ەمەس, ساياسي پارتيا ەكەنىن, سوندىقتان اشىق, كرەاتيۆتى بولۋعا ۇمتىلۋ, يدەولوگيالىق جانە مەديا كەڭىستىكتەگى جۇمىس ءتاسىلىن وزگەرتۋ, پارتيالىق جوبالاردى جانداندىرىپ, جاڭا باستامالاردى قولعا الۋ, سايلاۋالدى باعدارلامادا كورسەتىلگەن يگى ىستەردى جۇزەگە اسىرۋ, ەلىمىزدەگى اۋقىمدى تسيفرلاندىرۋ ۇدەرىسىنە بەلسەنە قاتىسۋ, جەرگىلىكتى قوعامدىق-ساياسي احۋالعا ۇدايى مونيتورينگ جۇرگىزۋ, جالپىۇلتتىق كۇن ءتارتىبىن, مەملەكەتتىك باعدارلامالار مەن زاڭ جوبالارىن دايىنداۋعا قاتىساتىن ساراپتاما ورتالىعىن قالىپتاستىرۋ, مامانداردىڭ بىلىكتىلىگىن ارتتىرۋ جانە «جاس وتان» جاستار قاناتىنىڭ جۇمىسىن جاڭعىرتىپ, الداعى سەزگە بەلسەنە قاتىسۋ ماسەلەلەرى اتاپ ءوتىلدى.
– پارتيا قىزمەتىن جاڭعىرتۋدىڭ نەگىزگى ماقساتى – «نۇر وتاندى» زاماناۋي, يننوۆاتسيالىق, قازىرگى زاماننىڭ بارلىق سىن-قاتەرلەرىنە بەيىمدەلگەن, ءححى عاسىردىڭ ساياسي ۇيىمى رەتىندە قالىپتاستىرۋ. ول ءۇشىن ەڭ الدىمەن, پارتيا الدىنداعى ميسسيانى ايقىنداپ الۋىمىز كەرەك. ءوزىمىزدىڭ كۇندەلىكتى جۇمىستارىمىزبەن قاتار ستراتەگيالىق باسىمدىقتارىمىزدى دا ەشقاشان ەستەن شىعارماۋىمىز قاجەت. پارتيا ەلىمىزدە جۇزەگە اسىرىلىپ جاتقان جان-جاقتى جاڭعىرۋ پروتسەسستەرىنە بەلسەنە قاتىسىپ, ونىڭ نەگىزگى قۇندىلىقتارىنىڭ باستى دارىپتەۋشىسى جانە ەلباسىنىڭ سەنىمدى تىرەگى بولۋى ءتيىس, – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
جيىندا پرەزيدەنتتىڭ بەس الەۋمەتتىك باستاماسىن جۇزەگە اسىرۋداعى نۇروتاندىقتاردىڭ ءرولى دە نازاردان تىس قالمادى. سونىڭ اياسىندا الەۋمەتتىك جاڭعىرۋ قازاقستاندىقتاردىڭ ءومىر ءسۇرۋ ساپاسىن جاقسارتۋعا باعىتتالعانى جانە ءار باستاما بۇگىندە حالىقتى الاڭداتىپ وتىرعان وزەكتى دە اسا ماڭىزدى ماسەلەلەردى قامتيتىنى ايتىلدى. – قازىرگى تاڭدا پارتيا الدىندا تۇرعان ەڭ باستى مىندەت – پرەزيدەنتتىڭ بەس الەۋمەتتىك باستاماسىن حالىققا ءتۇسىندىرۋ جانە ونىڭ جۇزەگە اسىرىلۋ بارىسىنا قوعامدىق باقىلاۋ جۇرگىزۋ. ەلباسى جۇكتەگەن وسى مىندەتتەردى ابىرويمەن اتقارۋىمىز كەرەك. بۇل بارشا قازاقستاندىقتاردىڭ جاعدايىن جاقسارتىپ, ءال-اۋقاتىن ارتتىرۋعا باعىتتالعان الەۋمەتتىك وزگەرىستەردىڭ كەشەندى باعدارلاماسى, – دەدى ماۋلەن اشىمباەۆ.
باسقوسۋدا پارتيا ارداگەرلەرى, وبلىستىق ءماسليحات دەپۋتاتتارى, جاستار وكىلدەرى جانە تاعى باسقا بەلسەندى نۇروتاندىقتار ءسوز الىپ, پارتيا قىزمەتىن جاڭعىرتۋ جانە پرەزيدەنتتىڭ بەس الەۋمەتتىك باستاماسىن جۇزەگە اسىرۋ جونىندە ءوز ۇسىنىستارى مەن پىكىرلەرىن ءبىدىردى. ءىس-شارا سوڭىندا «نۇر وتان» پارتياسى توراعاسىنىڭ ءبىرىنشى ورىنباسارى ەلباسى جۇكتەگەن مىندەتتەردى تابىستى ورىنداۋ ءۇشىن وبلىستىق اكتيۆكە بىرقاتار ناقتى تاپسىرمالار بەردى.