ەلباسى نۇرسۇلتان نازارباەۆ وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن كەزدەستى, دەپ حابارلايدى Akorda.kz.
كەزدەسۋ بارىسىندا تاراپتار قازاقستان مەن وزبەكستان اراسىنداعى قارىم-قاتىناستاردىڭ احۋالىن جوعارى باعالاپ, ولاردى ءارى قاراي دامىتۋدىڭ پەرسپەكتيۆالارىن تالقىلادى.
مەملەكەت باسشىسى ساۋدا-ەكونوميكالىق, مادەني-گۋمانيتارلىق جانە باسقا دا سالالارداعى ەكىجاقتى ىنتىماقتاستىقتىڭ قارقىندى دامىپ كەلە جاتقانىنا توقتالدى. اتاپ ايتقاندا, ءوزارا ساۋدا اينالىمىنىڭ ۇلعايعانى, ەكى ەلدىڭ بيزنەس قاۋىمداستىعى وكىلدەرى اراسىندا تابىستى بايلانىستار ىلگەرىلەپ كەلە جاتقانى اتاپ ءوتىلدى.
قازاقستان پرەزيدەنتى حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا دا ەكىجاقتى ىقپالداستىقتىڭ تابىستى بولىپ وتىرعانىن ايتتى.
بۇدان بولەك, سامارقاند قالاسىنا جۇمىس ساپارى بارىسىندا نۇرسۇلتان نازارباەۆ شاۆكات ميرزيوەۆپەن بىرگە «حازىرەت قىزىر» مەموريالدى كەشەنىنە بارىپ, وزبەكستان رەسپۋبليكاسىنىڭ تۇڭعىش پرەزيدەنتى يسلام كارىموۆتىڭ رۋحىنا تاعزىم ەتتى.
سونداي-اق, ەكى مەملەكەت حالقىنا ورتاق ناۋرىز مەيرامى قارساڭىندا مەملەكەت باسشىسى وزبەكستان پرەزيدەنتىمەن بىرگە سامارقاند قالاسىنىڭ بىرقاتار مادەني-تاريحي ورىندارىن ارالاپ كوردى.