مەرەكەلىك ءىس-شارا اياسىندا مەملەكەت باسشىسى «جاڭارعان جەر, باق قونعان نۇرلى ەل» ميۋزيكلىن تاماشالادى. جوعارى تەحنولوگيالى مۋزىكالىق-حورەوگرافيالىق ەتنو-مودەرن قويىلىمىنا قازاقستاننىڭ بەلگىلى ونەر تارلاندارى مەن ساحنا ونەرىنىڭ جاس تالانتتارى قاتىستى.
سونداي-اق قازاقستان پرەزيدەنتى «ەكسپو» كورمە كەشەنى اۋماعىندا ورنالاسقان ەتنواۋىلدى ارالاپ كوردى. مۇندا مۋزىكامەن ارلەنگەن تەاترلاندىرىلعان كورىنىستەر قويىلىپ, دەكوراتيۆتى-قولدانبالى شىعارماشىلىق كورمە جانە ۇلتتىق سپورت سايىستارى ۇيىمداستىرىلدى.
مەملەكەت باسشىسى بۇقارالىق اقپارات قۇرالدارى وكىلدەرى الدىندا ءسوز سويلەدى. نۇرسۇلتان نازارباەۆ بارشا قازاقستاندىقتاردى ناۋرىز مەرەكەسىمەن قۇتتىقتاپ, بۇل مەيرام ۇرپاقتار ساباقتاستىعىنىڭ جانە حالقىمىزدىڭ تەرەڭنەن تامىر تارتاتىن سالت-ءداستۇرى مەن مادەنيەتىنىڭ سيمۆولىنا اينالعانىن ايتتى.
– ناۋرىز شىنايى جالپىحالىقتىق مەرەكەگە, ءاربىر ازاماتىمىزدىڭ بۇكىل قازاقستاننىڭ دامۋى مەن وركەندەۋىنە زور ۇلەس قوسىپ وتىرعانىن كورسەتەتىن ەل بىرلىگىنىڭ جارقىن ۇلگىسىنە اينالدى, – دەدى نۇرسۇلتان نازارباەۆ.
قازاقستان پرەزيدەنتى جالپىعا ورتاق جاڭارۋ مەن رۋحاني جاڭعىرۋدى تانىتاتىن بۇل قاستەرلى مەرەكەنىڭ ونەگەلىك ماڭىزى زور ەكەنىن ەرەكشە اتاپ ءوتتى.
– ەجەلدەن بۇل مەيرام ادامداردى بەرەكە-بىرلىككە باستاپ, ولاردى جاقسىلىق پەن مەيىرىمدىلىككە, ماحاببات پەن شاتتىققا بولەپ كەلەدى. بۇل كۇندەرى ءبىز ءبىر-بىرىمىزگە قولداۋ كورسەتىپ, وكپە-رەنىشىمىزدى كەشىرەمىز, ۇيلەسىمدىلىك پەن بىرلىككە ۇمتىلامىز. ەلىمىزدىڭ جاھاندىق باسەكەگە قابىلەتتىلىگىنىڭ بەرىك نەگىزىن قالىپتاستىرىپ, ءوزارا قۇرمەت پەن كەلىسىم قۇندىلىقتارىن نىعايتۋ ءبارىمىز ءۇشىن اسا ماڭىزدى, – دەدى ەلباسى.
مەملەكەت باسشىسى قازاقستاننىڭ تاۋەلسىزدىك جىلدارىندا باستى بارلىق باعىتتار بويىنشا زور ناتيجەلەرگە قول جەتكىزگەنىنە ەرەكشە نازار اۋدارىپ, بۇگىندە ەلىمىز ودان دا ءورشىل ماقساتتى – الەمنىڭ وزىق دامىعان وتىز ەلىنىڭ قاتارىنا قوسىلۋدى كوزدەپ وتىرعانىن اتاپ ءوتتى.
– ءومىرىمىزدىڭ بارلىق سالاسىن تەرەڭ جاڭعىرتۋ – وسى زاماننىڭ سىن-تەگەۋرىندەرىنە قارسى ءبىزدىڭ ناقتى ءىس-قيمىلىمىز. الەمدەگى جاڭا تەحنولوگيالىق رەۆوليۋتسيا جاعدايىندا ادام كاپيتالى, سونىڭ ىشىندە ازاماتتارىمىزدىڭ ءبىلىمى, قابىلەتتەرى مەن ءپاتريوتيزمى ەلىمىزدىڭ باستى بايلىعى بولىپ سانالادى. اقىلدى, تابىستى جانە وزىنە سەنىمدى ازاماتتارى بار ۇلت قانا مىقتى ءارى وركەندەگەن قازاقستاندى دامىتا الادى, – دەدى نۇرسۇلتان نازارباەۆ.
مەملەكەت باسشىسى ءاربىر ازاماتىمىزعا جاڭا مۇمكىندىك بەرەتىن «بەس الەۋمەتتىك باستامانى» ىسكە اسىرۋ ماسەلەسىنە ەرەكشە توقتالدى.
– «7-20-25» اتتى جاڭا يپوتەكالىق باعدارلامانىڭ ارقاسىندا ەلىمىزدىڭ بارلىق وڭىرىندەگى كوپتەگەن وتباسى باسپانالى بولا الادى. جەڭىلدەتىلگەن شاعىن نەسيەنىڭ بەرىلۋى وز كاسىبىن باستايمىن دەگەندەردىڭ قاتارىن كوبەيتەدى. قوسىمشا 20 مىڭ گرانت ءبولىپ, جاڭا جاتاقحانالار سالۋ ارقىلى مىڭداعان جاستارىمىزعا جاڭا مۇمكىندىكتەر ۇسىنىلادى. وسى ايتىلعان ناقتى شارالار – جاستار مەن جاس وتباسىلاردى قولداۋدىڭ كورىنىسى. سول ارقىلى حالىقتىڭ ءومىر ءسۇرۋ ساپاسىن جاقسارتۋعا جانە ەلىمىزدىڭ ءال-اۋقاتىن ارتتىرۋعا تىڭ سەرپىن بەرىلەدى, – دەدى نۇرسۇلتان نازارباەۆ.
سوڭىندا ەلباسى وتانىمىز – قازاقستان رەسپۋبليكاسىنىڭ وركەندەۋى جولىندا بارشا جۇرتقا باقىت, بەرەكە-بىرلىك پەن تولاعاي تابىس تىلەدى.