قاراعاندىلىق جاس اقىندار اراسىندا «جىر قاعانى» انىقتالدى

سول ماقساتتا قولعا الىنعان اتالمىش جىر كەشى وتكەن سەنبىدە س.سەيفۋللين اتىنداعى وبلىستىق قازاق دراما تەاترىندا ءوز شىمىلدىعىن ءتۇردى. كەشكە قازاقستاننىڭ ەڭبەك سىڭىرگەن قايراتكەرى, اقىن سەرىك اقسۇڭقار ۇلى باستاعان ءبىر توپ ادەبيەتشى قاۋىم وكىلدەرى قاتىستى. كەشكە سونداي-اق, ەلوردامىز استانا قالاسىنان دا جاس قالامگەرلەر قارا كورسەتكەن. اتاپ ايتقاندا, ەربول الشىنباي, الماس ءنۇسىپ, باعاشار تۇرسىنباي ۇلى, ىقىلاس شالعىنباي, ءالىمجان الىشەر, قايرات سەيتقازى سىندى جاس اقىن-جازۋشى, سىنشى, دراماتۋرگتەر كورىكتى كەشتىڭ كوكجيەگىن كەڭەيتىپ كەتكەن.

الدىمەن, كەش جۇرگىزۋشىسى كورەرمەن قاۋىمعا قازاقستان جازۋشىلار وداعىنىڭ قاراعاندى وبلىسىنداعى فيليالىنىڭ جاڭا ديرەكتورى سەرىك ساعىنتايدى تانىستىردى.

پوەتيكالىق دۋەلدىڭ بەتاشار ءسوزىن سەرىك اقسۇڭقار ۇلى ايتىپ, جاس قالامگەرلەرگە ساتتىلىك تىلەدى. «مۇنداي پوەتيكالىق دۋەلدەر تاريحتا بولعان. وعان اتاقتى ەسەنين مەن ماياكوۆسكيدى ايتساق تا جەتكىلىكتى. سول ءداستۇردى جاڭعىرتىپ, جاڭارتىپ تۇرۋ كەرەك. بۇل اقىنداردىڭ ولەڭىن تەڭەستىرۋ نەمەسە تالاستىرۋ ەمەس, شىن مانىندەگى ونەر جارىسى دەپ ءتۇسىنۋىمىز كەرەك», دەدى س.اقسۇڭقار ۇلى.

ەرەكشە فورماتتا وتكەن جىر دوداسىندا اقىندار 4 كەزەڭ بويىنشا باقتارىن سىنادى. سايىسقا قاتىسۋشى 17-25 جاس ارالىعىنداعى 14 ۇمىتكەردىڭ ىشىنەن قاراعاندىلىق جاس اقىن ايدىن بايىس «جىر قاعانى» دەپ تانىلدى. ەرەجە بويىنشا جەرەبە تارتىلىپ, تاق سان تاڭداعان اقىندار قارسىلاس تاڭداۋعا مۇمكىندىك الدى.

ءادىل باعاسىن بەرىپ, قازىلىق ەتكەن اقىندار ب.مۇباراك, ق.اسقار, ج.جاڭقاش ۇلى, ج.ءاليمان, ج.بايبۇلانوۆا ءبىر اۋىزدان تاڭداعان دۋەل جەڭىمپازى ا.بايىس كەش قۇرىلتايشىسى, بەلگىلى ءبىلىم مەتسەناتى بەكزات التىنبەكوۆتىڭ تاعايىنداعان اقشالاي سىيلىعىنا قول جەتكىزدى.

كەشتىڭ كورىكتى وتۋىنە قاراعاندى وبلىسىنىڭ اكىمدىگى مەن قازاقستان جازۋشىلار وداعىنىڭ قاراعاندى وبلىستىق فيليالى كومەك قولىن سوزعان.

شارا سوڭىندا قاراعاندىلىق جاس اقىندار اتالمىش ەستافەتانى تارازدىق اقىندارعا جولدادى. ونى قاراعاندى گۋمانيتارلىق كوللەدجىنىڭ ديرەكتورى, تاراز قالاسىنىڭ تۋماسى ەسجان ءامىروۆ قابىلداپ الدى.

«ەگەمەن-اقپارات»