كەنشىلەر استاناسىنداعى «تاير» جانە «التىن اربا» ءىرى ساۋدا ۇيلەرىندە قالاداعى يۋنەسكو كلۋبى №2 ونەر مەكتەبىنىڭ وقۋشىلارى مۋزىكالىق فلەش-موب ۇيىمداستىردى.
«رۋحاني جاڭعىرۋ» باعدارلاماسى اياسىندا وتكەن دومبىراشىلار فلەش-موبىنا 150 ونەرلى جاس قاتىسىپ, قازاقتىڭ ايگىلى كومپوزيتورلارىنىڭ كۇيلەرىن تامىلجىتا ورىندادى. دارىندى بالالاردىڭ اراسىندا حالىقارالىق, رەسپۋبليكالىق, وبلىستىق جانە قالالىق بايقاۋلاردا جۇلدەگەر اتانعان ونەرپازدار بولدى.
قالا تۇرعىندارى مەن قوناقتارى جاس دومبىراشىلاردىڭ ونەرىنە اياماي قول سوقسا, قوعامنىڭ بەلسەندى مۇشەلەرى بۇل فلەش-موبتى قاراعاندىنىڭ رۋحىن اسپانداتقان شاراپاتتى شارا دەپ باعالادى.
ايتا كەتۋ كەرەك, قالالىق قوسىمشا ءبىلىم بەرۋ ۇيىمى ۇيىمداستىرعان مادەني ماڭىزى زور بۇل شارا «ۇكىلى دومبىرا» بايقاۋىنىڭ شەڭبەرىندە وتكەن بولاتىن. ال قالالىق كونكۋرستىڭ ءوزى قاراعاندىدا وسىمەن ەكىنشى رەت ۇيىمداستىرىلدى. بايقاۋدا س.ءمۇرجانوۆ (№17 وم), ج.سامارقان (№6 وم), د.شاماتاەۆ (№54 وم) جانە №36 ورتا مەكتەپتىڭ دومبىراشىلار ءانسامبلى ءتۇرلى اتالىمدار بويىنشا باس بايگە يەگەرلەرى اتاندى.
قايرات ءابىلدا,
«ەگەمەن قازاقستان»
قاراعاندى