بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا ساقتاندىرۋ جانە ساقتاندىرۋ قىزمەتى بويىنشا تۇزەتۋلەر ءبىرىنشى وقىلىمدا ماقۇلداندى, دەپ حابارلايدى ءماجىلىستىڭ ءباسپاسوز قىزمەتى.
زاڭ جوباسىن تالقىلاۋ كەزىندە دەپۋتاتتار شەتەلگە شىعاتىن كەزدەگى ءتۋريستى ساقتاندىرۋ ماسەلەسىنە نازار اۋداردى. حالىق قالاۋلىلارىنىڭ پىكىرىنشە, شەتەلگە شىققاندا تۋريستەر ءوز پروبلەمالارىمەن وزدەرى عانا قالماۋى كەرەك.
– ءبىزدىڭ كوپتەگەن ازاماتتارىمىز قازىرگى ۋاقىتتا ءوز دەمالىستارىن تۋريستىك جولداما بويىنشا شەتەلدە وتكىزەدى. ارينە, ول جاقتا جۇرگەن كەزدە ءارتۇرلى جاعدايلار بولۋى مۇمكىن. اۋىرىپ قالادى نەمەسە باسقا جاعدايلار ورىن الۋى مۇمكىن. بىراق تا, ەڭ باستىسى - تۋريستىك جولداما بويىنشا شەتەلدە جۇرگەن ازاماتتارىمىزدى وسى كەزەڭدە تولىقتاي ساقتاندىرۋ قاجەت. سوندىقتان, وسى ماسەلەنى ەكىنشى وقىلىمعا دەيىن قاراۋىمىز قاجەت, - دەدى نۇرلان نىعماتۋلين.
قولدانىستاعى زاڭ نەگىزىنەن ءتۋريستىڭ ەمەس, تۋروپەراتور مەن تۋراگەنتتىڭ م ۇلىكتىك مۇددەلەرىن قورعاۋعا باعىتتالعان بولاتىن. ەندىگى جەردە, وسى زاڭ جوباسىنا سايكەس, قازاقستاندىق تۋريستەردى قورعاۋ ماقساتىندا تۋريستىك فيرمالار شەتەلگە شىعاتىن ءتۋريستى مىندەتتى ساقتاندىرۋدى جۇزەگە اسىرۋ كوزدەلەتىن بولادى.