پحەنچحانداعى قىسقى وليمپيادا ويىندارىندا قولا جۇلدەگە يە بولعان يۋليا گالىشەۆانى بۇگىن وبلىس اكىمىنىڭ ورىنباسارى اسەم ءنۇسىپوۆا, قالا اكىمى قۋات تۇماباەۆ, وبلىستىق دەنە شىنىقتىرۋ جانە سپورت باسقارماسىنىڭ باسشىسى اسقار موجانوۆ باستاعان جەرلەستەرى, سپورت جانكۇيەرلەرى وسكەمەندەگى اۋەجايدان قۇشاق-قۇشاق گۇلمەن قۇشاق جايا قارسى الدى.
ء«سىزدى جانە جاتتىقتىرۋشىلاردى ايماق باسشىسىنىڭ اتىنان ءدۇبىرلى دودادا قولا مەدال يەلەنۋلەرىڭىزبەن شىن جۇرەكتەن قۇتتىقتايمىن. ارينە, بۇل – تاريحي ءسات. الداعى ۋاقىتتا دا ەلىمىزدىڭ ابىرويىن اسقاقتاتا بەرىڭىز», - دەدى ءوزىنىڭ قۇتتىقتاۋ سوزىندە وبلىس اكىمىنىڭ ورىنباسارى ءا.ءنۇسىپوۆا.
ء«وزىمنىڭ جۇلدەگەر اتانعانىمدى, مەدالدىڭ يەسى شىن مانىندە ءوزىم ەكەنىمدى الماتىعا, تۋعان جەرگە تابان تىرەگەن كەزدە شىنايى سەزىندىم. شىنىن ايتقاندا, وڭتۇستىك كورەيادا مۇنداي سەزىمدى باستان كەشكەن جوقپىن», - دەدى وسكەمەندىك فريستايلشى جۋرناليستەرگە بەرگەن سۇحباتىندا.
قولا جۇلدەگەر وسى وليمپيادا الدىندا كانادا تاراپىنان وزىنە ۇسىنىس تۇسكەنىن, 2015 جىلى رەسەي قۇراماسى دا وزدەرىنە شاقىرعانىن ايتىپ, بىراق ەشۋاقىتتا ەلدەن كەتپەيتىنىن, قازاقستاننىڭ كوك بايراعىن عانا كوتەرۋ جولىندا ەڭبەك ەتەتىنىن جەتكىزدى. سونىمەن قاتار وڭتۇستىك كورەياداعى كورسەتكەن ونەرىنە ءوزىنىڭ كوڭىلى تولاتىنىن, تورەشىلەرگە ەشقانداي وكپەسى جوق ەكەندىگىن, ازىرگە دەمالىس المايتىنىن, ءبىر جارىم ايداي جارىستارعا قاتىساتىنىن, كەلەسى قىسقى وليمپياداعا بارۋدان دا باس تارتپايتىنىن تىلگە تيەك ەتتى.
ازامات قاسىم,
«ەگەمەن قازاقستان»
وسكەمەن