جەنەۆاداعى بۇۇ بولىمشەسى جانىنداعى قازاقستاننىڭ تۇراقتى وكىلدىگى لوندون ۋنيۆەرسيتەتىمەن بىرلەسىپ, «قارۋسىزداندىرۋ جانە جاڭا قارۋ تەحنولوگيالارىن دامىتۋ: سىندارى مەن مۇمكىندىكتەرى» تاقىرىبىندا دوڭگەلەك ۇستەل وتىرىسىن وتكىزدى.
ءىس-شارانىڭ اشىلۋىندا, قازاقستاننىڭ جەنەۆاداعى تۇراقتى وكىلى جانار ايتجانوۆا جاساندى ينتەللەكتىنى جانە كيبەرقاۋىپسىزدىكتى دامىتۋدىڭ, سونىمەن قاتار زاماناۋي يادرولىق قارۋلار جۇيەسىن جاڭعىرتۋمەن بايلانىستى جاڭا سىندارعا قارسى ارەكەت ەتۋگە ارنالعان حالىقارالىق شارالاردى قولدانۋدىڭ ماڭىزدىلىعىن اتاپ ءوتتى.
جيىندا تۇراقتى وكىل 2018 جىلعى 18 قاڭتاردا وتكەن بۇۇ قاۋىپسىزدىك كەڭەسىندەگى پرەزيدەنت نۇرسۇلتان نازارباەۆتىڭ: «عىلىمي-تەحنولوگيالىق پروگرەستىڭ قازىرگى مۇمكىندىكتەرى جانە جاھاندانۋدىڭ شىنايى بولمىسى جاپپاي قىرىپ-جوياتىن قارۋدى تاراتپاۋ مىندەتىن ادامزاتتىڭ امان ساقتالىپ قالۋ ماسەلەسىنە اينالدىرىپ وتىر», دەگەن سوزىنە ەكپىن بەردى. سول سەبەپتى جاپپاي قىرىپ-جويۋ قارۋىنىڭ جاڭا تۇرلەرىن جاساۋ ءۇشىن عىلىمي اشۋلاردى قولدانۋعا تىيىم سالۋ بويىنشا حالىقارالىق قۇجاتتاردى ازىرلەپ, مىندەتتى ورىنداۋ ماڭىزدى بولىپ كەلەدى. بۇل ورايدا «الەم. XXI عاسىر» مانيفەسىندە اتالىپ وتكەندەي, بۇۇ جاپپاي قىرىپ-جويۋ قارۋىن جاساۋعا جانە ونى جەتىلدىرۋ ءۇشىن قولدانۋى مۇمكىن عىلىمي اشۋلاردىڭ ەسەبىن جۇرگىزۋ بويىنشا رەەستر قۇرۋ قاجەت.
جەنەۆاداعى بۇۇ بولىمشەسىنىڭ باس ديرەكتورى, قارۋسىزداندىرۋ بويىنشا كونفەرەنتسيانىڭ باس حاتشىسى مايكل ميوللەر كەلەشەكتەگى داۋ-جانجالداردىڭ سيپاتىن وزگەرتەتىن جاڭا تەحنولوگيالاردى زەرتتەۋدىڭ جانە ولاردىڭ اسەر ەتۋىنىڭ ۋاقىتى كەلگەنىن ايتتى.
دوڭگەلەك ۇستەلگە شاقىرىلعان ساراپشىلار قاتىسۋشىلارعا دۇنيە ءجۇزىنىڭ جەتەكشى ەلدەرىندەگى اسكەري-وندىرىستىك كەشەندەردەن قابىلدانعان سوڭعى عىلىمي وڭدەۋلەر سالاسىنداعى قازىرگى زامانعى تەندەنتسيالار جونىندە ايتىپ, سونىمەن بىرگە قارۋسىزداندىرۋ جانە تاراتپاۋ رەجىمىنىڭ پوتەنتسيالدى سىندارىن باعالادى.
قارۋسىزداندىرۋ بويىنشا كونفەرەنتسيا جانىنداعى برازيليا ەلشىسى گۋلەرمە پاتريوتا قارۋسىزداندىرۋ سالاسىنداعى ءوز ەلىنىڭ باستامالارى مەن جاڭا تەحنولوگيالاردى دامىتۋ امالدارىن اتاپ ءوتتى.
پاگۋوش عالىمدارى قوزعالىسى جەنەۆا بولىمشەسىنىڭ ديرەكتورى سەرگەي باتسانوۆ يادرولىق قارۋدى جاڭعىرتۋدان قازىرگى ءدۇبىرلى حالىقارالىق جاعدايدا تۋىندايتىن قاۋىپ تۋرالى ەسكەرتتى.
سونىمەن قاتار ول قازاقستان پرەزيدەنتى ن.نازارباەۆتىڭ بۇۇ قاۋىپسىزدىك كەڭەسىندەگى ساياسي سەنىمدەگى حالىقارالىق ومىرگە قايتا ورالۋ جانە جۇيەلى ديالوگتىڭ قاجەتتىلىگى تۋرالى ءسوزىن ارنايى اتاپ كورسەتتى.
قك جانىنداعى گەرمانيا تۇراقتى وكىلدىگىنىڭ ورىنباسارى تورالف پيلتس جانە قارۋسىزداندىرۋ ماسەلەلەرىن زەرتتەۋ بويىنشا بۇۇ ينستيتۋتى ديرەكتورىنىڭ مىندەتىن اتقارۋشى كەرستين ۆيگنارد سۋىق قارۋدىڭ اۆتونومدىق جۇيەسىن دامىتۋ جانە اتالعان سالانى رەتتەۋ بويىنشا تۇششىمدى ۇسىنىستار جونىندە ايتىپ بەردى.
بارلىق قاتىسۋشىلار بەيبىتشىلىك پەن قاۋىپسىزدىكتى ساقتاۋ سالاسىنداعى وزەكتى ماسەلەلەردى تالقىلاۋعا مۇمكىندىك بەرگەنى ءۇشىن قازاقستان تاراپىنا العىس ءبىلدىردى. وسى پىكىرتالاستىڭ قارۋسىزداندىرۋ جانە تاراتپاۋ رەجىمىن نىعايتىپ, ونى رەتتەۋ مەحانيزمدەرىن وڭدەۋگە سەبەپ بولاتىندىعىنا سەنىم ءبىلدىرىلدى.
ءىس-شاراعا لوندون ۋنيۆەرسيتەتىنىڭ ستۋدەنتتەرى, مۇشە مەملەكەتتەردىڭ وكىلدەرى مەن بۇۇ بايقاۋشىلارى قاتىستى, سونىڭ ىشىندە عىلىمي-زەرتتەۋ ينستيتۋتتارىنىڭ جانە ۇكىمەتتىك ەمەس ۇيىمداردىڭ ساراپشىلارى بار.
«ەگەمەن-اقپارات»