«استانا» ءۇشىن تاعى ءبىر سىن

ويىن جايلى ازدى-كەم شولۋ جاساپ وتسەك. ەكى كوماندانىڭ دەڭگەيى ەكى ءتۇرلى. ءبىرى ەۋروپا ليگاسىنىڭ توپتىق كەزەڭىنەن شىعىپ, تۇڭعىش رەت پلەي-وففقا ءوتتى. ەكىنشىسى, چەمپيوندار ليگاسىنىڭ توبىنان شىعا الماي, ءۇشىنشى ورىنمەن ەۋروپا ليگاسىنا جول تارتتى. پورتۋگاليالىق ءباسپاسوزدى قاراپ وتىرساق, «سپورتينگ» ءۇشىن بۇل ءبىر قىزىقتى كەزدەسۋ بولماق ەكەن. سەبەبى, بۇل كوماندا قازاقستاننىڭ كوماندالارىمەن ءبىرىنشى رەت كەزدەسكەلى تۇر. ەكىنشى جاعىنان «سپورتينگ» ەۋروكۋبوكتاردا مۇنشاما الىسقا بارماعان. ليسسابون مەن استانانىڭ اراسى 6000 شاقىرىمنان اسادى.

ال «استانا» «سپورتينگتىڭ» ەجەلگى قارسىلاسى «بەنفيكامەن» چەمپيوندار ليگاسىندا ۇشىراسقان. پورتۋگاليادا 2:0 جەڭىلىپ, ءوز الاڭىندا 2:2 تەڭ تارقاستى. ءوز الاڭىندا 17 ماتچ بويى جەڭىلىپ كورمەگەن ەلوردالىقتار ەندى تاعى ءبىر جاڭا سەريانى باستاۋعا دايىن سەكىلدى. وتاندىق كلۋبقا وسى جولى ەلوردانىڭ ايازى, جاساندى الاڭى, ۇزاق ۋاقىت جول جۇرگەن قارسىلاستىڭ شارشاڭقى قالپى – بارلىعى دا جاقسى اسەر ەتۋى ءتيىس. ونىڭ ۇستىنە ستاتيستيكاعا سۇيەنەتىن بولساق «استانا» ەۋروكۋبوكتاعى سوڭعى 8 ويىندا 18 گول سوققان. ياعني, ماتچ سايىن ورتاشا ەسەپپەن العاندا 2,25 گول.

ءۇشىنشى جىل قاتارىنان ەۋروكۋبوكتا ونەر كورسەتىپ كەلە جاتقان «استانا» وسى ماتچتىڭ قارساڭىندا ءۇش ويىنشى الدى. ولار: باقتيەر زاينۋتدينوۆ, يۋري پەرتسۋح جانە ماركو ستانوەۆيچ. بىراق, ءبىر وكىنىشتىسى كوماندا نەگىزگى شابۋىلشىسى دجۋنيور كابانانگانى ساۋد ارابيانىڭ ء«ال-ناسىر» كومانداسىنا 2 ميلليون ەۋروعا ساتىپ جىبەردى. سونىمەن قاتار, وتكەن جىلى «سلاۆياعا» قارسى ويىندا سارى قاعاز العان سەرىكجان مۇجىقوۆ وسى ماتچقا قاتىسپايدى.

ەندى قارسىلاس جايلى قوزعاساق, «سپورتينگ» سوڭعى 9 ماۋسىمدا 7-رەت ەۋروپا ليگاسىندا ويناعالى تۇر. كوماندا وسى جاقىندا عانا فرەدي مونتەرو, برايان رۋيس سەكىلدى تانىمال فۋتبولشىلاردى ساتىپ الدى. الايدا, نەگىزگى شابۋىلشىسى باست دوست جاراقات الىپ قالىپتى. سوڭعى مالىمەت بويىنشا نيدەرلاندىلىق شابۋىلشى العاشقى ماتچتا الاڭعا شىقپايدى ەكەن. «سپورتينگ» قاقپاشىسى رۋي پاتريسيۋ 30-عا تولىپ, ەلوردادا وردا بۇزباقشى. 15-اقپان كۇنگى تۋعان كۇنىن ول ماتچتان كەيىن قانداي كوڭىلمەن تويلايتىنى كەزدەسۋدىڭ ناتيجەسىنە بايلانىستى بولار. ايتپاقشى, بۇل قاقپاشى 2016جىلعى ەۋرودا پورتۋگاليا قۇراماسىمەن قۇرلىق چەمپيونى اتانعانىن دا ۇمىتپايىق.

«سپورتينگكە» بايلانىستى ستاتيستيكانى ايتا كەتەتىن بولساق, بۇل كوماندا ەۋروكۋبوكتەگى سىرتتا وتكىزگەن سوڭعى 8 ماتچىنىڭ 6-اۋىندا جەڭىلىس تاۋىپتى. وسىنداي مالىمەتتەردەن كەيىن ارينە, ەلوردالىق «استانا» ءوز الاڭىندا جەڭىلمەۋى ءتيىس دەپ سانايمىز. دەگەنمەن, فۋتبولداعى قاعيدا «الاڭ تەگىس, دوپ دومالاق» دەگەن ءسوزدى دە ەستەن شىعارمايمىز.

ەرمۇحامەد ماۋلەن,

«ەگەمەن قازاقستان»