ەلىمىزدە بالالارداعى ونكولوگيالىق اۋرۋلاردى ەمدەيتىن ەكى ءىرى ورتالىق بار بولسا, ونىڭ ءبىرى – الماتىداعى پەدياتريا جانە بالالار حيرۋرگياسى عىلىمي ورتالىعى. اۋىر جاعدايداعى بالالاردىڭ كوبى دەرلىك وسى پەدياتريا ورتالىعىنا كەلىپ تۇسەدى. مۇندا جىلىنا 2500 بالا ەمدەلەدى.
اتالمىش ورتالىقتا اللادان ساۋىعىپ كەتۋىن تىلەگەن كىشكەنتاي تاعدىرلار كەزەگىمەن ەم قابىلداپ جاتىر. ولاردىڭ ءومىر سۇرۋگە دەگەن ەسسىز قۇشتارلىعى مەن ارمان-مۇراتتارى كوپ-اق. وسىندا ەمدەلىپ جاتقان ايدانانىڭ ءبىر تىلەگى ءوزىنىڭ سۇيىكتى ءانشىسى قايرات نۇرتاسپەن كوزبە-كوز جۇزدەسىپ, تىلدەسۋ بولعان. اپتا سوڭىندا ءانشى اۋىر دەرتكە شالدىققان ايدانانىڭ وتىنىشىمەن پەدياتريا ورتالىعىنا كەلىپ, ءحالىن ءبىلدى.
جاقىندا عانا وتادان شىققان ايدانا ءۇشىن بۇل ەستەن كەتپەستەي قۋانىش بولعانى ايتپاسا دا تۇسىنىكتى. ونەرىن باعالايتىن ءجاسوسپىرىم تىلەكشىسىمەن تانىسقان ءانشى ايدانانىڭ عانا ەمەس, بارشا ونكوگەماتولوگيا بولىمىندەگى بالالاردىڭ كوڭىلىن اۋلاپ, تەز ساۋىعىپ كەتۋلەرىن تىلەدى.
دارىگەرلەر كىشكەنتاي قىزدىڭ ءبىر اۋىز تىلەگىن ورىنداعان اق جۇرەكتى انشىگە دە, كەزدەسۋدى ۇيىمداستىرۋعا مۇرىندىق بولعان «اميلا» قورىنا دا ءدان ريزا. ناۋقاس بالالاردىڭ بىرىڭعاي كۇندەرىنە شۋاق شاشقان ءانشىنىڭ بۇل كەلگەنىنىڭ ءوزى دە شيپا.
وسىلايشا «اميلا» ونكولوگيالىق سىرقات بالالارعا كومەك كورسەتەتىن قوعامدىق قورىنىڭ باسقا دا ساۋاپتى تىرلىكتەرى جالعاسىن تابۋدا. قور «شۇعىل قاجەتتىلىكتەر» جوباسى اياسىندا ناۋقاس بالالارعا جورگەكتەن باستاپ, كەرەك-جاراقتارىن تۇگەندەپ تۇرادى.
قايرات نۇرتاس كەلگەننەن كەيىن «اميلا» قوعامدىق قورى تاعى ءبىر جاقسى ىسكە مۇرىندىق بولىپ, اناسىنىڭ وتىنىشىمەن اق قان اۋرۋىنا شالدىققان ۇلىنىڭ ارمانىن ورىندادى.
ازاتتىڭ ارمانى بۇركىت ەسىمدى لاقاپ اتىمەن تانىمال قازاق ەستراداسىنىڭ بەلگىلى ءانشىسى ايبەك سەيىتوۆپەن جۇزدەسۋ ەدى. «ورتالىقتا جاتقانىمىزعا ۇزاق ۋاقىت بولدى. ەكى اپتادان بەرى ۇلىمنىڭ ىستىعى تۇسپەي قويدى. كوڭىلى دە باياعىداي ەمەس, ۇنجىرعاسى ءتۇسىپ, سىرقاتپەن كۇرەسكىسى كەلمەيتىندەي كورىندى. بالاسىنىڭ مۇنداي ءحالىن كورۋ ءاربىر انا ءۇشىن اۋىر. نە ىستەسەم بولادى؟ قالاي كوڭىل كوتەرسەم ەكەن دەپ ۋايىمدادىم. بالام بۇركىتتى جانىنداي جاقسى كورەدى. ءوزى دە مۋزىكاعا جاقىن, ولەڭ جازادى, گيتارادا وينايدى. جاقسى كورەتىن ءانشىسىن شاقىرىپ, توسىن سىي جاساپ, قۋانتسام, ءبىر وزگەرىس بولار دەگەن ۇمىتپەن «اميلا» قورىنا حابارلاسقان ەدىم. كەزدەسۋدى ۇيىمداستىرىپ بەرگەن قور ەرىكتىلەرىنە, ءوتىنىشىمدى جەرگە قالدىرماي كەلگەن بۇركىتكە العىسىم شەكسىز. سەنەسىز بە, بالاما بۇل جاڭالىقتى ايتقان كۇنى ىستىعى ءتۇسىپ, بەتى بەرى قاراپ, ەم قونا باستادى. بۇل جۇزدەسۋ بالاما كۇش-قۋات, رۋح بەرەتىنىنە سەنەمىن», دەدى ازاتتىڭ اناسى حاليما اجىعۇلوۆا.
ال كەزدەسۋ جونىندە ءانشى ينستاگرامداعى پاراقشاسىندا: «...عالامتور جۇيەسىنەن ۆولونتەرلاردىڭ كومەگىمەن ازاتتىڭ اناسى ماعان شىعىپ, ۇلىنىڭ مەنى قاتتى كورگىسى كەلگەنىن جەتكىزدى. ءبىر كۇن وتكىزبەي, جاۋاپ قايتاردىم. ءسويتىپ بۇگىن @tumartime كومپانياسىنىڭ ادەمى ءبىر ەرلەر ساعاتىن الىپ, ەمxاناعا جونەلدىم! ەسىكتىڭ اۋىزىندا ازاتتىڭ اناسى قارسى الدى. كوزىنەن جاس كورىندى. بىردەن ماعان: «كەلگەنىڭىزگە راxمەت!» دەدى. مەن دە ول كىسىگە «وقاسى جوق! مەن ءۇشىن بۇل تۇككە تۇرمايدى!» دەدىم. قىسقاسى, ازاتتىڭ پالاتاسىنا كىرىپ, تانىسىپ, قال-جاعدايىن سۇراپ, ءبىراز اڭگىمەلەستىم. ءوزى ونەرلى جىگىتتەردىڭ ءبىرى ەكەن. مۋزىكا جازادى, بەينەكورىنىستەر تۇسىرەدى, ءان دە ايتادى. وكىنىشتىسى, وسىنداي اۋرۋعا شالدىعىپ قالىپتى. ەڭ باستىسى, بۇل ەم قوناتىن دەرت ەكەن. بىراق تەز جازىلا سالاتىن دەرت ەمەس. سوندىقتان دوستار ازاتقا بار جاقسىلىقتى تىلەيىك, ەمدەلىپ كەتسىن! دۇعالارىڭىزدى وقىڭىزدار!» دەپ جازادى.
ايناش ەسالي, «ەگەمەن قازاقستان» الماتى