ەلباسىمىز ءوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا تابىستى بولۋدىڭ باستى فاكتورى ءبىلىم ەكەنىنە نازار اۋدارادى. «جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارت. سەبەبى قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى», دەپ اتاپ وتەدى مەملەكەت باسشىسى.
ەلىمىزدىڭ ءبىلىم تۋرالى زاڭنامالارىنا سايكەس, مۇعالىم مەملەكەتتىك ولشەم دەڭگەيىنەن تومەن بولمايتىن ءبىلىم بەرۋى ءتيىس. ال جاقسى ناتيجەگە جەتۋ ءۇشىن ۇستاز وقىتۋدىڭ بەلگىلەنگەن تەحنولوگياسىن يگەرىپ, ونى ساباق بارىسىندا پايدالانۋى قاجەت. وسىعان بايلانىستى ءبىزدىڭ مەكتەبىمىزدە وقۋشىلارعا ءبىلىم بەرۋدىڭ ءتيىستى تەحنولوگيالارى جاسالىپ, ولار تاجىريبەگە ەنگىزىلۋدە. مىسالى, تاريح ءپانىن الايىق.
جالپى ءبىلىم بەرەتىن مەكتەپتەردە تاريح ءپانىن وقىتۋداعى نەگىزگى ماسەلەنىڭ ءبىرى – وقۋشىلاردىڭ ءبىلىمدى ءوز بەتىنشە يگەرۋى. بۇل جەردە مۇعالىمنىڭ ساباق وتكىزۋدىڭ ۇلگىسىن قۇرىپ, ونى جەتىلدىرۋدىڭ جولدارىن تابۋى ەرەكشە ءرول اتقارادى. ءوز كەزەگىندە ول وقۋشىلاردىڭ بەلگىلى ءبىر تاريحي وقيعانى نەمەسە تاريحي تۇلعانى تانىپ-بىلۋگە دەگەن ىنتاسىن, ويلاۋ قابىلەتتەرىن ارتتىرادى. سونىمەن قاتار ولاردىڭ تانىمدىق بەلسەندىلىگى مەن ىزدەنۋشىلىك قاسيەتتەرىن قالىپتاستىرۋعا نەگىز قالايدى.
ءبىزدىڭ اۋداندا كونەدەن سىر شەرتەتىن تاريحي ورىندار مەن كەزىندە ەرەن ەڭبەگىنىڭ ارقاسىندا كوپشىلىككە ۇلگى بولعان اعالارىمىز, اتا-اجەلەرىمىز بارشىلىق. سولاردى وقۋشىلار نازارىنا ۇسىنىپ, يگى ىستەرىنەن حاباردار ەتۋ ۇستاز-مۇعالىمدەردىڭ مىندەتى دەسەك, قاتەلەسە قويماسپىز. ويتكەنى ءوز تۋعان ولكەڭنىڭ تاريحىن ءبىلۋ كەز كەلگەن ازاماتتىڭ بورىشى دەپ بىلەمىز.
اۋدان اۋماعىندا كۇللى الەمگە بەلگىلى شارىن شاتقالى بار. تاريحى ارىدەن باستالاتىن وسى ەسكەرتكىشتى كورۋگە, ونى تاماشالاۋعا ارنايى كەلەتىن تۋريستەر قاتارى جىل وتكەن سايىن كوبەيە تۇسۋدە. ونىڭ تاريحىن ءبىزدىڭ مەكتەپتىڭ مۇعالىمدەرى مەن وقۋشىلارى جاقسى بىلەدى. سەبەبى مەكتەپ باسشىلىعى وقۋشىلاردى شارىن شاتقالىنا ەكسكۋرسياعا تۇراقتى اپارۋعا بارلىق جاعدايدى جاساپ وتىرادى. ونىڭ ۇستىنە مەكتەپ وقۋشىلارىنا شارىن شاتقالىمەن قاتار, وزگە دە جەر اتاۋلارىنىڭ تاريحىنا قاتىستى قوسىمشا ساباقتار وتكىزىلەدى. ونداعى ماقسات – شاكىرتتەرگە ءوز تۋعان ولكەسىنىڭ كەشەگى جانە بۇگىنگى تاريحىنان حاباردار ەتۋ.
كەزىندە وسى اۋىلدا ومىرگە كەلىپ, ەلىمىزدىڭ وركەندەۋىنە ەلەۋلى ۇلەس قوسقان اتا-اجەلەرىمىزدىڭ ءومىر جولىن, ەڭبەك جولىن وقۋشىلار نازارىنا ۇسىنۋ تاجىريبەسى مەكتەبىمىزدىڭ وقۋ باعدارلاماسىنا ەنگىزىلگەن. مىسالى, بيىلعى وقۋ جىلىنىڭ ءبىرىنشى جارتىسىندا سوعىس جانە ەڭبەك ارداگەرى زامانبەك باتتالحانوۆتىڭ, سونداي-اق حالىق قاھارمانى ءموردىن تايىپوۆتىڭ ءومىر جولىنا ارنالعان ءىس-شارالار ۇيىمداستىرىلدى. وسىنداي ءىس-شارالاردىڭ جاسوسپىرىمدەردى ادالدىققا, ەڭبەكقورلىققا, باتىلدىققا تاربيەلەۋدە ورنى ەرەكشە بولەك ەكەنى داۋسىز.
ەلباسىمىزدىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىنداعى ء«وزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاھاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋى ءتيىس» دەگەن ءسوزى ەلىمىزدەگى ءبىلىم بەرۋ مەكەمەلەرىندە ىستەيتىن جانداردى جىگەرلەندىرىپ, العا قويعان مىندەتتەردى ىسكە اسىرۋعا جۇمىلدىرادى دەگەن سەنىمدەمىز. ارينە ولاردىڭ ىشىندە ۇلكەن ديحان مەكتەبىنىڭ ۇجىمى دا بار.
گۇلباقىت يگىسينوۆا, ۇلكەن ديحان ورتا مەكتەبى تاريح ءپانىنىڭ مۇعالىمى الماتى وبلىسى, ۇيعىر اۋدانى