كەري تاگاۆا, مايكل مەدسەن, باي لين, مارك داكاسكوس جانە ەريك روبەرتس سىندى گولليۆۋد جۇلدىزدارى بۇگىن وسكەمەنگە كەلدى.
ولاردى وڭىرگە باستاپ كەلگەن اكتەر, رەجيسسەر ەركەن ەلگاشەۆ پەن اكتەر, پروديۋسەر ارمان اسەنوۆ الەمگە ايگىلى اكتەرلەر شىعىس قازاقستان تۋرالى دەرەكتى فيلمگە ءتۇسۋ ءۇشىن ارنايى شاقىرىلعاندىعىن ايتادى. وسى ساپار بارىسىندا ولار وبلىستىڭ ءتورت اۋدانى مەن بۇرىنعى سەمەي پوليگونى اۋماعىندا بولىپ, ايماقتىڭ تاريحي جەرلەرىن ارالاماق.
«ەلباسىمىزدىڭ جاقىندا امەريكاعا جاساعان ساپارى الەم نازارىن قازاقستانعا اۋداردى دەسەك ارتىق ايتپاعان بولارمىز. وسى اكتەرلەر ارقىلى ۇلتتىق قۇندىلىقتارىمىزدى, قاسيەتتى جەرلەرىمىزدى كۇللى دۇنيە جۇزىنە پاش ەتۋدى جوسپارلاپ وتىرمىز. ويتكەنى, قازىر جاڭا تەحنولوگيا زامانى. ماسەلەن, شىعىس قازاقستانعا كەلگەن باي ءليننىڭ الەۋمەتتىك جەلىدەگى ءبىر عانا فوتوسى 60 ميلليون لايك جينايدى ەكەن. وسىنداي اكتەرلەر ەلىمىزدىڭ كوركەم تابيعاتىن الەم نازارىنا ۇسىنسا, بۇدان ۇتپاساق, ۇتىلمايتىنىمىز انىق», - دەيدى ارمان اسەنوۆ.
گوللۋۆۋد اكتەرلەرىن بۇگىن وبلىس اكىمى دانيال احمەتوۆ قابىلداپ, ولارعا شىعىس قازاقستاندى جان-جاقتى تانىستىرىپ, ساپارلارىنا ساتتىلىك تىلەدى. ايتپاقشى, شەت ەلدەن كەلگەن مەيماندارعا ءوزىنىڭ ءتىل بىلەتىنىن كورسەتكىسى كەلدى مە, الدە قوناقتارعا تۇسىنىكتى بولسىن دەدى مە, ايماق باسشىسى كەزدەسۋدى اعىلشىنشا باستاپ, ارى قاراي ورىسشا جالعاستىردى.
ازامات قاسىم, «ەگەمەن قازاقستان»