«استانا» حالىقارالىق قارجى ورتالىعى بيرجاسىندا Euroclear جۇيەسى ارقىلى تەڭگەمەن ەۆرووبليگاتسيالار شىعارۋ جوسپارلانىپ وتىر. بۇل تۋرالى بۇگىن قر ۇكىمەتىنىڭ وتىرىسىندا ەلىمىزدىڭ قارجى ءمينيسترى باقىت سۇلتانوۆ ايتتى, دەپ حابارلايدى قازاقپارات.
«2018 جىلدىڭ 1 قاڭتارىنان مەملەكەتتىك بورىش 13,5 ترلن تەڭگەنى (40,6 ملرد اقش دوللارى) نەمەسە جالپى ىشكى ءونىمنىڭ 26 پايىزىن قۇرادى. 2017 جىلى بيۋدجەتكە بورىشتىق جۇكتەمە كىرىستەردىڭ 15 پايىز ليميتىندە 8,8 دەڭگەيىندە قالىپتاستى», - دەدى مينيستر.
ونىڭ ايتۋىنشا, ۆاليۋتالىق تاۋەكەلدەردى نيۆەليرلەۋ ماقساتىندا 2016-2017 جىلدارى مەملەكەتتىك باعالى قاعازداردى شىعارۋ ىشكى نارىقتا عانا جۇزەگە اسىرىلدى. سونداي-اق 2016 جىلى مەملەكەت باسشىسىنىڭ تاپسىرماسىنا سايكەس 2017-2019 جىلدارعا ارنالعان سىرتقى قارىز الۋ قورجىنى وڭتايلاندىرىلدى.
«استانا» حالىقارالىق قارجى ورتالىعى بيرجاسىندا Euroclear جۇيەسى ارقىلى تەڭگەمەن ەۆرووبليگاتسيالار شىعارۋ جوسپارلانعان. قارىز الۋ كوزدەرىن ءارتاراپتاندىرۋ ماقساتىندا سونداي-اق, يسلام وبليگاتسيالارى سۋكۋكتى شىعارۋ دا جوسپاردا بار», - دەدى باقىت سۇلتانوۆ.
سونداي-اق, جيىندا قر ۇلتتىق ەكونوميكا ءمينيسترى تيمۋر سۇلەيمەنوۆ قازاقستاننىڭ مەملەكەتتىك قارىزدار دەڭگەيى ەرەكشە باقىلاۋعا الىناتىندىعىن اتاپ ءوتتى.