لاتىن الىپبيىنە كەزەڭ-كەزەڭ بويىنشا كوشۋدىڭ جوسپارى نەگىزىندە 2021 جىلدان باستاپ, قازاقستاندىقتاردىڭ تولقۇجاتىن, جەكە كۋالىكتەرى مەن باسقا دا قۇجاتتارىن لاتىن گرافيكاسى نەگىزىندە مەملەكەتتىك تىلدە بەرۋ كوزدەلۋدە. بۇل تۋرالى بۇگىن ۇكىمەت وتىرىسىندا مادەنيەت جانە سپورت ۆيتسە-ءمينيسترى ەرلان قوجاعاپانوۆ ءمالىم ەتتى, دەپ حابارلايدى «قازاقپارات».
«مەملەكەت باسشىسىنىڭ كەڭەيتىلگەن ۇكىمەت وتىرىسىندا بەرگەن تاپسىرمالارىنا قاتىستى كەلەسىنى بايانداۋدى رۇقسات ەتىڭىز. لاتىن الىپبيىنە كەزەڭ-كەزەڭ بويىنشا كوشۋدىڭ جوسپارى ازىرلەندى. ءبىرىنشى كەزەڭ - 2018-2020 جىلدارى نورماتيۆتىك-قۇقىقتىق بازانى جەتىلدىرۋ بويىنشا دايىندىق جۇمىستارى مەن ءىس-شارالار جۇرگىزىلەتىن بولادى. لاتىن گرافيكاسى نەگىزىندە جاڭا قازاق الىپبيىندە دۇرىس جازۋ قاعيدالارى, ءماتىندى لاتىن الىپبيىنە اۋدارۋدىڭ ءىت قوسىمشالارى ازىرلەنەدى», - دەدى ۆيتسە-مينيستر.
ەرلان قوجاعاپانوۆ ەكىنشى كەزەڭ 2021-2023 جىلداردى قامتيتىنىن اتاپ ءوتتى.
«2021-2023 جىلدارى لاتىن گرافيكاسى نەگىزىندە مەملەكەتتىك تىلدە قازاقستان رەسپۋبليكاسىنىڭ تولقۇجاتىن, جەكە كۋالىگىن جانە باسقا دا قۇجاتتاردى بەرۋدى قامتاماسىز ەتۋ كوزدەلگەن. فيلولوگتار مەن عالىم-لينگۆيستەردى تارتا وتىرىپ, ورتالىقتاردىڭ وقىتۋشىلارى مەن ەرەسەك حالىقتى ۇيرەتۋ ءۇشىن سەمينارلار مەن لەكتسيالار, كۋرستار ۇيىمداستىرىلادى. ءۇشىنشى كەزەڭ 2024-2025 جىلدارى مەملەكەتتىك ورگاندارىنىڭ, ءبىلىم بەرۋ ۇيىمدارىنىڭ, مەملەكەتتىك باق جانە باسپالاردىڭ قۇجات اينالىمدارىن كەزەڭمەنەن كوشىرۋ جوسپارلانعان. مينيسترلىك جانىندا جۇمىستى ۇيلەستىرۋ ماقساتىندا ء«تىل قازىنا» ورتالىعى قۇرىلۋدا», - دەپ ءتۇيدى ەرلان قوجاعاپانوۆ.