بۇگىن «رۋحاني جاڭعىرۋ» باردارلاماسىنىڭ اياسىندا ءبىلىم باسقارماسى مەن وقۋشىلار سارايى بىرلەسىپ شىعارعان «استانانىڭ جالپىۇلتتىق كيەلى ورىندارى» اتتى كىتاپتىڭ تانىستىرىلىمى ءوتتى, دەپ حابارلايدى استانا قالاسى اكىمدىگىنىڭ رەسمي سايتى.
مادەنيەت پەن تاريحتىڭ ورداسى بولىپ سانالاتىن ەلوردانىڭ تاريحي نىساندارىن زەرتتەي كەلە وقۋشىلار سارايىنىڭ «جاس ولكە تانۋشىلار» ۇيىرمەسىنىڭ تاربيەلەنۋشىلەرى وسى كىتاپتى قاراپايىم ءارى تۇسىنىكتى تىلمەن جازىپ, مادەني نىسانداردىڭ سۋرەتتەرىن قوسقان.
«استانانىڭ جالپىۇلتتىق كيەلى ورىندارى» كىتابى ەلوردامىزدا ورنالاسقان تاريحي نىساندار تۋرالى. وعان باس قالامىزداعى تاريحي ءماندى, رۋحاني قۇندى جيىرما نىسان ەنگەن. ولاردىڭ قاتارىندا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, ساكەن سەيفۋللين اتىنداعى مۋزەي, بايتەرەك, «ماڭگىلىك ەل» قاقپاسى تاعى دا باسقا نىساندار ەنگەن.
«كىتاپ «جاس ولكە تانۋشىلار» ۇيىرمەسى تاربيەلەنۋشىلەرىنىڭ ەڭبەگى. نەگىزى كىتاپ شىعارامىز دەمەدىك. ۇيىرمەگە كەلىپ جۇرگەن بالالارعا قالا تاريحىن تەرەڭنەن ءبىلۋ ماقساتىندا وزدەرى قالاعان ءبىر نىسانمەن تانىسىپ, عىلىمي جۇمىس جازۋدى ۇسىندىق. بالالار ۇلكەن قىزىعۋشىلىق تانىتىپ, اقپاراتتى ينتەرنەتتەن الا سالماي, ءار نىسانعا بارىپ, تاريحىمەن تانىستى. وزدەرىنە دە تانىمدىق جۇمىس بولدى. سودان كەيىن وسى نىساندار تاريحىن باسقا دا بالالار ءبىلسىن, تانىسسىن دەگەن نيەتپەن كىتاپ قىلىپ شىعارۋدى ۇسىندى. ءبىلىم باسقارماسى ءبىزدىڭ ۇسىنىستى قولداپ كىتاپ شىعاردىق», – دەدى وقۋشىلار سايى ديرەكتورىنىڭ وقۋ جانە تاربيە ءىسى جونىندەگى ورىنباسارى ءنابيبوللا دوسبولوۆ.
جالپى كىتاپتىڭ تارالىمى – ءجۇز دانا. كىتاپپەن تانىسا وتىرىپ ەلىمىزدىڭ باس قالاسى استانامىزعا قاتىستى تاريحي دەرەكتەر تابا الاسىزدار.
ءاربىر ازاماتتىڭ وزىنە دەگەن قۇرمەتى – ءوزى تۇرىپ جاتقان قالاسىن, ەلىن, تاريحىن قۇرمەتتەۋدەن باستالادى. ءوز تاريحىن جاقسى بىلگەن, تانىعان ادام بۇگىنگى ءىس-ارەكەتىن باقىلاپ, بولاشاعىن ءمىنسىز جوسپارلاي الادى.