سىرتقى ىستەر مينيسترلىگىندە قازاقستاننىڭ سىرتقى ساياسات ۆەدومستۆوسىنىڭ بۇۇ دامۋ باعدارلاماسىمەن (بۇۇ دب) جانە جاپونيا حالىقارالىق ىنتىماقتاستىق اگەنتتىگىمەن (JICA) ارىپتەستىكتە ىسكە اسىرىپ جاتقان «اۋعانستان مەن درك (دامۋعا رەسمي كومەك) سالاسىنداعى ىنتىماقتاستىعىنا قازاقستانعا جاردەمدەسۋ» جوباسىن باسقارۋ كوميتەتىنىڭ II وتىرىسى ءوتتى. جوبانى ىسكە اسىرۋ تۋرالى ۋاعدالاستىق قازاقستان پرەزيدەنتى نۇرسۇلتان نازارباەۆ پەن جاپونيا پرەمەر-ءمينيسترى سيندزو ابەنىڭ 2015 جىلعى قازانداعى بىرلەسكەن مالىمدەمەسىندە بەكىتىلگەن بولاتىن.
ءىس-شارادا ءسىم سىرتقى ەكونوميكالىق ساياسات دەپارتامەنتىنىڭ ديرەكتورى – جوبانىڭ ۇلتتىق ۇيلەستىرۋشىسى ولجاس يسابەكوۆ, اۋعانستاننىڭ قازاقستانداعى توتەنشە جانە وكىلەتتى ەلشىسى كادام شاح شاحيم, بۇۇ دامۋ باعدارلاماسىنىڭ قازاقستانداعى تۇراقتى وكىلىنىڭ ورىنباسارى مۋنحتۋيا التانگەرەل, جاپونيا ەلشىلىگىنىڭ ديپلوماتتارى جانە ەلىمىزدىڭ مەملەكەتتىك ورگاندارى مەن ۇيىمدارىنىڭ وكىلدەرى قاتىستى. سەمينارعا ارنايى قاتىسۋ ءۇشىن JICA-نىڭ توكيوداعى شتاب-پاتەرىنىڭ ساراپشىلارى, سونداي-اق جاپونيا اگەنتتىگىنىڭ بىشكەكتەگى وڭىرلىك كەڭسەسىنىڭ وكىلدەرى كەلدى.
ءوزىنىڭ العى سوزىندە و.يسابەكوۆ وتىرىسقا قاتىسۋشىلاردى ەلىمىزدە دامۋعا رەسمي كومەك (درك) ۇلتتىق جۇيەسىن قالىپتاستىرۋ بويىنشا جۇرگىزىلىپ جاتقان ءىس-شارالار تۋراسىندا حاباردار ەتتى. درك سالاسىنداعى قازاقستاندىق قاناتقاقتى جوبالاردى ىسكە اسىرۋ ماسەلەلەرى بويىنشا قازاقستاننىڭ حالىقارالىق ارىپتەستەرمەن, سونىڭ ىشىندە JICA, بۇۇ دب-مەن جوعارى دەڭگەيدەگى ءوزارا ءىس-قيمىلدى ەرەكشە اتاپ ءوتتى. ول بولاشاقتا بۇل سالادا جاڭا قاناتقاقتى جوبالاردى ىسكە اسىرۋ بويىنشا بىرلەسكەن جۇمىس جۇرگىزۋگە قاتىستى قازاقستاندىق تاراپتىڭ دايىن ەكەندىگىن ءبىلدىردى.
وتىرىس اياسىندا بۇۇ دب وكىلدىگىنىڭ جوبا مەنەدجەرى گەنادي راۋ اتالعان جوبانى ىسكە اسىرۋ بارىسىنداعى 2017 جىلى ورىندالعان جۇمىس تۋرالى تانىستىرىلىم وتكىزدى. سونىمەن قاتار ول وتىرىسقا قاتىسۋشىلاردى 2018 جىلعى 30 ناۋرىز – 12 ءساۋىر ارالىعىندا استانا قالاسىندا اۋعانستاننىڭ مەملەكەتتىك قىزمەتكەرلەرى مەن ۇكىمەتتىك ەمەس ۇيىمدارى وكىلدەرىنە ارنالعان انا جانە بالا دەنساۋلىعىن ساقتاۋ سەمينارىن وتكىزۋدى كوزدەيتىن 2018 جىلعا ارنالعان جۇمىس جوسپارىمەن تانىستىردى.
جالپى بۇل جوبانىڭ بىرەگەيلىگى – مەملەكەتتىك باسقارۋ جانە دەنساۋلىق ساقتاۋ سالالارىندا اۋعان ماماندارىنىڭ الەۋەتىن ارتتىرۋمەن قوسا, ەلىمىزدىڭ مەملەكەتتىك ورگاندارى وكىلدەرىنىڭ درك سالاسىنداعى ساراپشىلىق الەۋەتىن دامىتۋ بولىپ تابىلادى. بۇعان دەيىن اتالعان جوبا اياسىندا قازاقستان مەملەكەتتىك ورگاندارى وكىلدەرىنىڭ دۋشانبە, بىشكەك جانە توكيوعا تانىستىرۋ ساپارلارى ۇيىمداستىرىلعانىن اتاپ وتكەن ءجون, دەپ حابارلادى ءسىم-ءنىڭ ءباسپاسوز قىزمەتى.