«استانا» ۆەلوكومانداسى تاعى دا تاماشا ونەر كورسەتىپ, قورجىنعا كەزەكتى جۇلدەسىن سالدى. بىرىككەن اراب امىرلىكتەرىندە ءوتىپ جاتقان «دۋباي تۋرى» كوپكۇندىگىندە سپرينتەرىمىز ريكاردو مينالي راس ال حايم دەپ اتالاتىن ەكىنشى كەزەڭدە كوزگە ءتۇستى. كەشە عانا ەكىنشى كەلگەن ماگنۋس كورتتىڭ كورسەتكىشىنەن كەيىن بۇل قاتارىنان كەلىپ تۇرعان ولجا ەدى.
- مارەگە جاقىنداپ قالعان تۇستا مەن جاقسى پوزيتسيادا بولدىم. سوڭعى بۇرىلىستى دا ءساتتى وتە ءبىلدىم. ال 300 مەتر قالعان تۇستا مەن ءسال كەيىنىرەك شەگىنشەكتەپ, ورتاعا قاراي ويىسىپ كەتتىم. ازىن-اۋلاق كۇتىپ تۇردىم دا, ءۆيۆيانيدىڭ ارتىن الا جىلدامدىققا باستىم. ناتيجەسىندە ءۇشىنشى كەلدىم. بالكىم ماعان ءسپرينتتى ءسال ەرتەرەك باۋتاۋ كەرەك پە ەدى, بىلمەدىم, الايدا وسى كورسەتكەن ناتيجەمنىڭ ءوزى جامان ەمەس. جالپى, جارىس كۇنى اۋىر وتكەنىنە قاراماستان جۇلدەلى بولعانىما قۋانىشتىمىن, - دەدى ريكاردو مينالي.
«دۋباي تۋرىنىڭ» ەكىنشى كەزەڭى سكايدايۆ دۋبايدان باستالىپ 190 شاقىرىمنان سوڭ راس ال حايمدا اياقتالدى. كوپشىلىك كۇتكەندەي-اق كەزەڭ جاپپاي سپرينتپەن اياقتالدى. «استانا» شاباندوزدارى جاندوس بيجىگىتوۆ, ترۋلس كورسەت جانە رۋسلان تىلەۋباەۆتار كوماندا سپرينتەرى ريككاردو مينالي ءدى العا شىعارۋ ءۇشىن سوڭعى 20 شاقىرىمدا كەرەمەت قىزمەت ەتتى. ال سوڭعى شاقىرىمدا مينالي جاقسى پوزيتسيا تاڭداي ءبىلىپ, كەزەڭ جەڭىمپازى ەليا ۆيۆياني مەن ەكىنشى كەلگەن گوللانديالىق ديلان گرۋنەۆەگەنمەن بىرگە مارە سىزىعىن كەستى.
ال «استانانىڭ» تاعى ءبىر سپرينتەرى ماگنۋس كورت دانيل فومينىح پەن لاۋرەنس دە ءۆريزدىڭ كومەگىمەن فينالدىق سپرينتتە جوعارعى ناتيجە تىركەپ, 6-ورىن الدى.
- كەزەڭ كەشەگىدەي جاقسى ءوتتى دەي الامىن. بۇل ءبىر ءوزى جىلدام جارىس بولدى عوي دەپ ويلايمىن. كەشە جاقسى پوزيتسيا الىپ, مارە سىزىعىندا باعىم جانعان. بۇگىن كەرىسىنشە جول-جونەكەي قارسى تۇرعان جەلگە تاپ بولىپ, كوپ كۇش جوعالتتىم. سونىڭ كەسىرىنەن بولسا كەرەك, سوڭعى مەترلەردە سارقىلىپ قالدىم. دەگەنمەن, كوماندامىزدىڭ تاعى ءبىر شاباندوزى ريكاردو جۇلدەلى ورىنعا يە بولدى. سوندىقتان دا, بۇگىنگى ناتيجەلەر ءبىز ءۇشىن جامان دەپ ايتا المايمىن. الەمنىڭ مىقتى سپرينتەرلەرىمەن باسەكەلەسە ءجۇرىپ وسىنداي ورىندارعا يە بولۋ مەن ءۇشىن زور ابىروي, - دەدى ماگنۋس كورت.
گوللانديالىق گرۋنەۆەگەن «دۋباي تۋرى» جارىسىندا باستى ەسەپتە ءبىرىنشى ورىندا. ول ەليا ءۆيۆيانيدى 2 سەكۋندقا وزىپ تۇر. «استانانىڭ» ەكى بىردەي شاباندوزى ماگنۋس كورت پەن ريككاردو مينالي 4-5 ورىنداردى الىپ تۇر. ولاردىڭ ليدەردەن قالىپ تۇرعان ۋاقىتى سايكەسىنشە 10 جانە 12 سەكۋند ۋاقىتتى قۇرايدى.
«دۋباي تۋرىنىڭ» ءۇشىنشى كەزەڭى سكايدايۆ دۋباي مەن ەل-فۋدجايرا ەميراتىنىڭ ارالىعىندا وتەدى (183 كم).
ەرمۇحامەد ماۋلەن
«ەگەمەن قازاقستان»