«استانا» حالىقارالىق قارجى ورتالىعى مەن «الماتى مەنەدجمەنت ۋنيۆەرسيتەتى» (بۇدان ءارى - AlmaU) ءوزارا تۇسىنىستىك تۋرالى مەموراندۋمعا قول قويىپ, قارجى تەحنولوگيالاردى دامىتۋ بويىنشا زەرتحانانى قۇرۋ تۋرالى كەلىسىمگە كەلدى.
قۇجاتتارعا «احقو اكىمشىلىگى» اق باسقارما توراعاسى نۇرلان قۇسايىنوۆ پەن AlmaU رەكتورى گۇلميرا قۇرعانباەۆا قول قويدى.
زەرتحانانىڭ قىزمەتى قارجى تەحنولوگيالارى سالاسىنداعى يننوۆاتسيالىق شەشىمدەردى زەردەلەۋدى, كادرلاردى دايارلاۋدى جانە قازاقستاندا پيلوتتىق فينتەح جوبالاردى ىسكە قوسۋدى كوزدەيتىن بولادى.
ء«بىزدىڭ باستى مىندەتىمىز فينتەح جوبالاردىڭ دامۋىنا بارىنشا قولايلى جاعداي جاساۋ. قويىلعان مىندەتكە قول جەتكىزۋدىڭ نەگىزگى فاكتورى رەتىندە قۇزىرەتتىلىك پەن نارىقتا كاسىبي كادرلاردىڭ بولۋىن ايتار ەدىم. سوندىقتان احقو مەن الماتى مەنەدجمەنت ۋنيۆەرسيتەتى اراسىنداعى ىنتىماقتاستىق قارجى تەحنولوگيالارى ەكوجۇيەسىنىڭ بارلىق قاتىسۋشىلارىنا پايدالى بولاتىنىنا سەنەمىن», - دەدى «احقو اكىمشىلىگى» اق تسيفرلىق تەحنولوگيالار جونىندەگى ديرەكتورى ءا. جيەنباەۆا.
AlmaU پرەزيدەنتى اسىلبەك قوجاحمەتوۆ احقو-نىڭ قولداۋىمەن AlmaU-دا فينتەح زەرتحانانىڭ قۇرىلۋى IT-تەحنولوگيالاردىڭ ناقتى بيزنەسپەن ىقپالداسۋىنداعى ماڭىزدى قادام ەكەندىگىن اتاپ ءوتتى.
«اسىرەسە ۋنيۆەرسيتەتىمىزدەگى Double Major قوس ديپلوم جانە Major Minor باعدارلامالارى ىسكە اسىرىلىپ وتىرعانىن جانە سول باعدارمالاردىڭ شەڭبەرىندە ستۋدەنتتەر قارجى ماماندىعىن وقي وتىرىپ, ەكىنشى قوسىمشا «اقپاراتتىق تەحنولوگيالار» ماماندىعىن نەمەسە كەرىسىنشە تانداي الاتىندىعىن ەسكەرسەك, «AlmaU ءۇشىن احقو-مەن وسى سالادا ىنتىماقتاستىق جاساۋى وتە ماڭىزدى. وسىلايشا, ءبىز وسى سالالاردى بىردەن قامتيتىن مامانداردى – وسى سالانىڭ تسيفرلىق دامۋى جونىندە وزىندىك وي-پىكىرى بار قارجىگەرلەردى دايىنداپ وتىرمىز», - دەدى AlmaU پرەزيدەنتى.
قۇجاتقا سايكەس, تاراپتار قارجى تەحنولوگيالارمەن جۇمىس ىستەۋ بويىنشا ستۋدەنتتەر مەن مامانداردىڭ قۇزىرەتتىلىگىن ارتتىرۋ ماقساتىندا بىرىككەن عىلىمي-ءبىلىم بەرۋ شارالارىن سەمينارلار, ترەنينگتەر جانە كونفەرەنتسيالاردى وتكىزۋگە نيەتتەنىپ وتىر.