حالىقارالىق تۇركى اكادەمياسى حالىقارالىق ۇيىمىنىڭ باسشىسى دارحان قىدىرالى استانادا جاپونيانىڭ قازاقستانداعى توتەنشە جانە وكىلەتتى ەلشىسى يچيرو كاۆاباتانى TWESCO قۇرمەت گراموتاسىمەن ماراپاتتادى.
اكادەميا ماراپاتى ەلشى مىرزاعا «حالىقتار اراسىنداعى عىلىم مەن ءبىلىم سالاسىنداعى ىنتىماقتاستىقتى نىعايتۋعا قوسقان ۇلەسى ءۇشىن» تاعايىندالىپ وتىر. سالتاناتتى ماراپاتتاۋ ءراسىمى ۇلتتىق اكادەميالىق كىتاپحانادا «تۇلعالار تاعىلىمى» سەرياسى بويىنشا اكادەميا ۇيىمداستىرعان ەكىنشى سەمينار اياسىندا ءوتتى.
ايتا كەتۋ كەرەك, تۇركى اكادەمياسى مەن جاپونيانىڭ عىلىمي وردالارى اراسىندا بەرىك ىنتىماقتاستىق ورناعان. اتاپ ايتقاندا, اكادەميانىڭ «تۇركى الەمىندە تۇلعالار تاعىلىمى» سەرياسى بويىنشا وتكىزگەن العاشقى سەمينارىندا توكيولىق تانىمال تۇركىتانۋشى حيساو كوماتسۋ تاتار حالقىنىڭ كورنەكتى قايراتكەرى ءابدىراشيت يبراھيم جايلى تۇرىك تىلىندە ءدارىس وقىعان بولاتىن. بۇدان بولەك, 2017 جىلدىڭ قازان ايىندا اكادەميا باسشىسى باستاعان دەلەگاتسيا حالىقارالىق اكادەميالار وداعىنىڭ ارنايى شاقىرتۋىمەن جاپونيادا بولىپ, بىرقاتار كەزدەسۋلەر وتكىزگەن.