وسى جىلدىڭ قاڭتارىندا استانا قالاسى اكىمدىگىنىڭ حالىقتى جۇمىسپەن قامتۋ ورتالىعىنا جۇمىسقا ورنالاسۋ ماسەلەسىمەن 1673 ادام جۇگىندى, دەپ حابارلايدى ەلوردا اكىمدىگىنىڭ رەسمي سايتى.
حالىقتى جۇمىسپەن قامتۋ ورتالىعىنىڭ مالىمەتىنشە, 1673 ادامنىڭ 661-ءى جۇمىسسىزدىقتان الەۋمەتتىك قورعاۋ شارالارىمەن قامتىلدى.
«تۇراقتى جۇمىسقا – 302, الەۋمەتتىك جۇمىس ورىندارىنا – 4 ادام ورنالاستىرىلدى. 349 ادام قوعامدىق جۇمىستارعا جىبەرىلسە, 6 ادام «جاستار تاجىريبەسى» بويىنشا تاعىلىمدامادان وتەتىن بولادى», – دەپ جازىلعان تاراتىلعان حابارلامادا.
قاڭتار ايىندا ەلوردادا 1090 جاڭا جۇمىس ورنى اشىلعان. ونىڭ 25-ءى قۇرىلىس سالاسىندا, 71-ءى ءبىلىم بەرۋ سالاسىندا, 19-ى بولشەك ساۋدا سالاسىندا جانە 970-ءى بيزنەس پەن باسقا سالالاردا قۇرىلدى.
ايتا كەتەيىك, «ەلەكتروندى ەڭبەك بيرجاسى» (www.enbek.kz) پورتالىندا بۇگىن 4501 بوس جۇمىس ورنى بار.