قوستاناي قالاسىنىڭ اكىمى بازىل جاقىپوۆ وبلىس ورتالىعىنداعى وتكەن جىلعى دامۋ باعىتىن بايانداپ بەردى.
ەكونوميكانىڭ دامۋىندا, الەۋمەتتىك جاعدايدىڭ جاقسارۋىندا دا, جالپى بارلىق سالادا العا جىلجۋ بار. بازىل شاحامان ۇلى الدىمەن ونەركاسىپ كاسىپورىندارىنىڭ كورسەتكىشىن تىلگە تيەك ەتتى. ولار وندىرگەن ءونىم بۇرناعى جىلمەن سالىستىرعاندا 25 پايىزعا ارتىق. ياعني 2017 جىلى وبلىس ورتالىعىندا 266 ملرد تەڭگەنىڭ ءونىمى وندىرىلگەن. قالا بيۋدجەتىنە 26 ملرد تەڭگە تۇسكەن. بۇل 2016 جىلعا قاراعاندا 10 پايىزعا كوپ.
دەگەنمەن, مەتاللۋرگيا, شاعىن جانە ورتا بيزنەس سالالارىنىڭ الدە دە شابان قيمىلدان اسا الماي وتىرعانى دا ايتىلدى. مىسالى, مەتاللۋرگيا سالاسى وندىرگەن ءونىمنىڭ كولەمى 2016 جىلعا قاراعاندا 71 پايىز بولسا, شاعىن جانە ورتا بيزنەس 76 پايىزدى قۇراعان.
كەزدەسۋدە قالا تۇرعىندارى اكىمگە ءتۇرلى پروبلەمالىق ماسەلەلەردى كوتەردى. اۋىز سۋ ماسەلەسى, جولدار, قالا ىشىندەگى كولىك باعىتتارى, ساياباقتار, جەر تەلىمى, اۋرۋ بالالاردى ساۋىقتىرۋ ورتالىعى جانە جەتىم بالالار باسپاناسى, كوشەدەگى اعاشتاردىڭ كەسىلۋى, «كازترانسگاز ايماك» كومپانياسىنىڭ تۇرعىندارمەن جۇمىسى تۋرالى كوپتەگەن سۇراقتار قويدى. قالا اكىمى بازىل جاقىپوۆ بارلىعىنا جاۋاپ بەردى, كوتەرگەن ماسەلەسىنە وراي تۇرعىنداردى قابىلداۋعا, ولارعا كومەك بەرۋگە دايىن ەكەندىگىن, وتكىر ماسەلەلەردىڭ شەشىمىن قاراستىراتىنىن ايتتى.
قالا اكىمىنىڭ قورىتىندى ەسەبىنە وبلىس اكىمى ارحيمەد مۇحامبەتوۆ قاتىسىپ, تۇرعىندار كوتەرگەن كەيبىر ماسەلەلەرگە ءوز پىكىرىن دە ءبىلدىردى. جانە قالا اكىمىنىڭ ەسەبىن قورىتىندىلادى. ول قوستاناي قالاسىندا كوپتەگەن ءىستىڭ اتقارىلعاندىعىن, تۇرعىندار كوتەرگەن ماسەلەلەردىڭ دۇرىس شەشىمىن قاراستىرۋ كەرەكتىگىن ايتتى.
ءنازيرا جارىمبەت,
«ەگەمەن قازاقستان»
قوستاناي