«حابار» تەلەارناسى قىسقى وليمپيادا ويىندارىن كورسەتەدى

تەلەارنا 100 اسا ترانسلياتسيا جاسايدى, ەفيرلىك ۋاقىتتىڭ جالپى كولەمى 208 ساعات, ونىڭ 136 ساعاتى تىكەلەي ەفيردە كورسەتىلەدى. وليمپيادانىڭ اشىلۋ جانە جابىلۋ سالتاناتتارى 9 اقپان كۇنى 17.00-دە جانە 25 اقپان كۇنى 17.00-دە تىكەلەي ەفيردە كورسەتىلەدى.

پحيونچحان قالاسىنا ارنايى جىبەرىلگەن تىلشىلەر قوسىنى مانەرلەپ سىرعاناۋ, فريستايل, شاڭعىمەن سىرعاناۋ, حوككەي, كونكي سپورتى, بياتلون, شاڭعى سپورتى, كەرلينگ, تۇعىردان سەكىرۋ, ەكى ساتىلى شاڭعى سايىسى, سكەلەتون, سنوۋبورد, بوبسلەي سىندى جارىس تۇرلەرىنەن حابار تاراتىپ, قىزىقتى (ەكسكليۋزيۆتى) ماتەريالدار ازىرلەيدى. 

ءتۇسىرىلىم توبى تاجىربيەلى جۋرناليستەر مەن وپەراتورلاردان جينالعان, ولاردىڭ اراسىندا بۇرىننان بەرى وليمپيادا ويىندارىنان حابار تاراتىپ جۇرگەن ءتىلشى امانگەلدى سەيتحان مەن تەلەوپەراتور ەرسىن مۇحامبەتالين, سوچي قالاسىنداعى وليمپيادادا قىزمەت اتقارعان قانات بازىلحانوۆ, سونداي-اق ءبىرىنشى رەت وليمپيادا ويىندارىنان حابار تاراتاتىن جاس ءتىلشى ءسابي بايبوسىنوۆ بار.

«حابار» اگەنتتىگىنىڭ وڭتۇستىك كورەياداعى ارنايى ءتىلشىسى ۆلاديسلاۆ تسويعا پحيونچحانداعى جاعداي, وليمپيادا ويىندارى توڭىرەگىندە حاباردار ەتىپ وتىرۋ مىندەتى جۇكتەلگەن. 

ءدۇبىرلى دودانىڭ كوممەنتاتورلارى: جاندوس ايتباي, ەرجان جيرەنباەۆ, ايبەك قابىلشاەۆ, سەرگەي رايليان, اندرەي نەحليۋدوۆ, اسكات جاكاەۆ.

سونداي-اق وليمپيادا ءۇشىن ارنايى olympics.khabar.kz ينتەرنەت رەسۋرسى اشىلدى, وندا وزەكتى جاڭالىقتار, جارىس كەستەسى, سپورت سالاسىنداعى ساراپشىلاردىڭ پىكىرلەرى, سۇحباتتار مەن فوتولار, ەكسكليۋزيۆتى ماتەريالدار سالىنادى. اتالمىش قوسىمشاداعى اقپارات ۇنەمى جاڭارتىلادى.