سيرياداعى جاعدايدى رەتتەۋ بويىنشا استانا پروتسەسىنىڭ كەلەسى راۋندىن اقپان ايىنىڭ 20-نا تاياۋ وتكىزۋ جوسپارلانىپ وتىر. بۇل تۋرالى قر سىرتقى ىستەر ءمينيسترى قايرات ءابدىراحمانوۆ ءمالىم ەتتى, دەپ حابارلايدى «قازاقپارات».
«استانا پروتسەسىنىڭ كەپىلگەر-مەملەكەتتەرىنىڭ وكىلدەرى بەرىپ وتىرعان اقپاراتقا سايكەس, تاراپتار استانادا كەلىسسوزدەردىڭ كەزەكتى راۋندىن وتكىزۋگە دايىندىق جۇمىستارىن جۇرگىزىپ جاتىر. ول شامامەن اقپان ايىنىڭ جيىرماسىنا قاراي ءوتۋى مۇمكىن. بىراق, بۇل اقپارات كەپىلگەر-مەملەكەتتەر تاراپىنان ناقتى راستاۋدى قاجەت ەتەدى», - دەپ اتاپ ءوتتى مينيستر بۇگىنگى ۇكىمەت وتىرىسىنان تىس تىلشىلەرگە بەرگەن سۇحباتىندا.
ەسكە سالا كەتسەك, استانا پروتسەسىنىڭ كەزەكتى وتىرىسى 2017 جىلدىڭ 21-22 جەلتوقسانىندا وتكەن بولاتىن.
كەزدەسۋدىڭ قورىتىندىسىنا وراي يران, رەسەي جانە تۇركيا بىرلەسكەن مالىمدەمە قابىلدادى. قۇجاتتا بۇل جولى دا سيرياداعى تەرروريزممەن كۇرەستەگى جەتىستىكتەر اتالىپ, دايش-قا قارسى كۇرەس جانە اتالعان لاڭكەستىك ۇيىمداردان ەل اۋماعىن تازارتۋداعى جەتىستىكتەر ايتىلعان. سونىمەن قاتار كەپىلگەر ءۇش ەل تەرروريستىك ۇيىمداردىڭ تامىرىنا تۇبەگەيلى بالتا شابۋ جانە ولاردىڭ وزگە دە ەلدەر مەن اۋماقتارعا قونىس اۋدارۋىنا جول بەرمەۋدەگى تۇبەگەيلى شەشىمدەرىن راستاپ وتىر.
سونىمەن قاتار قۇجاتتا سيريانىڭ بارلىق قوعام وكىلدەرىنىڭ قاتىسۋىمەن 2018 جىلدىڭ 29-30 قاڭتارى ارالىعىندا سوچيدە وتەتىن سيريالىق ۇلتتىق ديالوگ كونگرەسىنە دايىندىق جانە ونى وتكىزۋ بارىسىنداعى تىعىز ءوزارا ءىس-قيمىل اتالىپ وتكەن. يران, رەسەي جانە تۇركيا سيريانىڭ ۇكىمەت جانە وپپوزيتسيا وكىلدەرىن بەلسەندى ىنتىماقتاستىققا شاقىرادى.