وڭتۇستىك قازاقستان وبلىسىنداعى تۇلكىباس اۋدانى تۇرعىندارىنىڭ 96,4 پايىزى ورتالىقتاندىرىلعان اۋىز سۋ قۇبىرىمەن قامتاماسىز ەتىلگەن.
حالىق الدىنداعى ەسەپتى كەزدەسۋىندە, اۋدان اكىمى نۇربول تۇراشبەكوۆ 62 ەلدى مەكەننىڭ 59-ى, ياعني 107 مىڭنان استام حالىق تازا اۋىز سۋمەن قامتىلعانىن ءمالىم ەتتى. ال قالعان ءۇش ەلدى مەكەنگە اۋىز سۋ تاسىمالدانىپ جەتكىزىلەدى. سەبەبى, بۇل اۋىلدار شالعايدا ورنالاسىپ, حالىق از شوعىرلانعاندىقتان ەكونوميكالىق جاعىنان ءتيىمسىز بولىپ تابىلعان. سونداي-اق, اۋدان اكىمى جالپى وڭىرلىك ءونىم وتكەن جىلدىڭ قورىتىندىسىمەن 68,8 ملرد. تەڭگەنى قۇراعانىن اتاپ ءوتتى.
- اۋدان كولەمىندەگى ونەركاسىپ كاسىپورىندارى 22,7 ملرد. تەڭگەنىڭ ءونىمى وندىرىلسە, وسى سالا بويىنشا بارلىق دامۋ ينديكاتورلارى ورىندالدى. شاعىن جانە ورتا بيزنەستە 17 مىڭ 200 ادام جۇمىس اتقارۋدا, ال ولاردا اۋدان حالقىنىڭ 15 پايىزى ەڭبەك ەتەدى. بۇگىندە اۋدان بويىنشا بەلسەندى كاسىپكەرلىك سۋبەكتىلەردىڭ سانى 6310 بىرلىككە جەتىپ, 7,3 پايىزعا وسكەن. بۇلارمەن وندىرىلگەن ءونىم كولەمى 34,2 ملرد. تەڭگەنى قۇراسا, ولارمەن تولەنگەن سالىق تولەمدەرى 272,6 ملن. تەڭگەنى قۇراپ, 2,7 پايىزعا وسكەن, - دەدى ن.تۇراشبەكوۆ.
شاعىن جانە ورتا كاسىپكەرلىك قارقىن العان تاۋلى ايماقتىڭ باۋ شارۋاشىلىعىن دامىتۋعا مۇمكىندىگى مول. ەسەپتى كەزدەسۋگە جينالعان جۇرتشىلىق اۋدان اكىمىنىڭ اتقارعان جۇمىسىنا وڭ باعاسىن بەردى.
عالىمجان ەلشىباي,
«ەگەمەن قازاقستان»