اقمولا وبلىسىندا بالىق اۋلاۋ سپورتتىق سايىسىنىڭ تانىمالدىلىعى ارتىپ كەلەدى. تابيعات اياسىندا ۇيىمداستىرىلاتىن وسىنداي باسەكەگە قاتىسۋشىلار قاتارى دا جىل ساناپ كوبەيە تۇسكەن. جيىرما اۋەسقوي بالىقشى قاتىسقان وسىنداي جارىستىڭ ءبىرى جاقىندا بۇلاندى اۋدانىندا ءوتتى.
وسىنداي يگى شارالاردى ۇيىمداستىرۋ ارقىلى سالاماتتى ءومىر سالتىن ۇستانۋدى جانە قورشاعان ورتانى قورعاۋدى ۇيرەتۋگە بولاتىنىن كەيبىرەۋلەر قاپەرگە الا بەرمەيدى. سونداي-اق اتالعان سايىستاردى وتكىزۋ ارقىلى كاسىپقويلىق جانە سپورتتىق بالىق ۇستاۋ ماشىقتارىن جەتىلدىرۋ ماقساتى دا العا قويىلعان. بۇلاندى اۋداندىق دەنە شىنىقتىرۋ جانە سپورت ءبولىمى قاراوزەك اۋىلدىق وكرۋگىندە سپورتتىق بالىق اۋلاۋدان جارىس وتكىزۋى دە سوندىقتان.
سپورتتىق جارىس وتكىزۋ ارقىلى قاتىسۋشىلاردىڭ تابيعات بەرگەن ريزىقتى وزدەرى تاۋىپ جەۋىنە, شۇيىركەلەسىپ ءبىر-بىرىمەن پىكىر الماسۋىنا مۇمكىندىك بەرەدى. كول بەتىنەن قازىلعان ويىقتار بالىق اۋلاۋمەن قاتار سول بالىقتارعا اۋاداي قاجەت سۋدىڭ قۇرامىن وتتەگىمەن قۇنارلاندىرۋ ءۇشىن دە جاسالاتىندىعىن ەرەكشە اتاعان ءجون. كانىگى بالىقشىلار جاقسى اۋلاناتىن جەرلەردى ايتپاي تانيتىندىعى قاپەرگە الىنىپ, ولاردىڭ اراسىندا جەرەبە تاستالدى. ايتسە دە ولارعا ەكى قارماقپەن اۋلاۋعا, قانشا ىلمەك ىلسە دە وعان شەكتەۋ قويىلمادى. ءاربىر قاتىسۋشىنىڭ بالىقتى اۋلاۋداعى سان الۋان تاسىلدەرىنە دە رۇقسات ەتىلدى. ناتيجەسىندە كاپيتونوۆكا اۋىلىنىڭ كومانداسى كوپ بالىق اۋلاپ, چەمپيون اتاندى. ال ماكينسك قالاسىنىڭ بالىقشىلارى ەكىنشى تۇعىردان كورىندى. جەرگىلىكتى قاراوزەك اۋىلدىق وكرۋگىنىڭ سپورتشىلارى ءۇشىنشى ورىندى قاناعات تۇتتى.
اسقار تۇراپباي ۇلى, «ەگەمەن قازاقستان»
اقمولا وبلىسى